រាជធានីភ្នំពេញ ៖ ប្រដាល់ដណ្ដើមខ្សែក្រវាត់គោជល់ ក្នុងប្រភេទទម្ងន់៧៤គីឡូក្រាមនៅលើសង្វៀនទូរទស្សន៍ភីអិនអិន នាថ្ងៃអាទិត្យ ទី២០ វិច្ឆិកា ខាងមុខនេះ ឈានចូលដល់សប្ដាហ៍ទី៧ហើយ ។
សមាសភាពគូប្រកួតដណ្ដើមខ្សែក្រវាត់នៅក្នុងសប្តាហ៍នេះមានកីឡាករសុខ ទូច មកពីក្លិបដែនសមុទ្រមានរិទ្ធ នឹងជួបប្រកួតជាមួយកីឡាករថៃឈ្មោះ ផេត បូផា និងកីឡាករ អ៊ុង វិរៈ មកពីក្លិបទ័ពពិសេសឆត្រយោង៩១១ ជួបប្រកួតជាមួយកីឡាករថៃ កាំ ឡាយផេត។ សុខ ទូច លើកនេះប្រសិនជាចាញ់គឺលែងមានឱកាសឡើងទៅកាន់វគ្គបន្តទៀតហើយព្រោះប្រកួត២លើកកន្លងមកនេះមិនទាន់ស្គាល់ឈ្នះម្ដងណាឡើយ ។ ម្យ៉ាងវិញទៀត រូបមន្តប្រកួតនៅលើសង្វៀនទូរទស្សន៍ភីអិនអិន ដែលមាន២ពូលនោះទាំងពូលខ្មែរ និងពូលថៃ ក្នុង១ពូលគេយកតែកីឡាករមួយរូបប៉ុណ្ណោះដើម្បីឡើងទៅប្រកួតនៅវគ្គផ្ដាច់ព្រ័ត្រជាបន្តទៀត ។
នៅក្នុងពូលខ្មែរ អ៊ុង វិរៈ គឺជាបេក្ខភាពដែលមានសង្ឃឹមជាងគេក្នុងការឡើងទៅប្រកួតនៅវគ្គបន្តទៀត ។ អ៊ុង វិរៈ ប្រកួតបាន២លើកឈ្នះទាំង២លើកដោយសុទ្ធតែផ្ដួលគូប្រកួតឱ្យសន្លប់នៅក្នុងទឹកទី៤និងទី១ទៀតផង ។ ទោះបីយ៉ាងណា អ៊ុង វិរៈ ក៏ត្រូវប្រជែងជាមួយកីឡាករព្រំ សំណាង ដែលជាមិត្តរួមក្លិបប្រកួតបាន២លើកឈ្នះទាំង២លើកដូចគ្នា ក្នុងនោះផ្ដួលគូប្រកួតឱ្យសន្លប់នៅទឹកទី២បានម្ដងទៀតផង ។ យ៉ាងណាក៏ដោយ អ្នកធ្លាប់តាមដានការប្រកួតភាគច្រើនគេមានជំនឿចិត្តលើ អ៊ុង វិរៈ ច្រើនជាងដោយសារកីឡាកររូបនេះមានកាយសម្បទានិងល្បិចប្រយុទ្ធល្អថែមទាំងមានចិត្តសឿងទៀតផង ។
ប៉ុន្តែសម្រាប់ សុខ ទូច វិញលើកនេះត្រូវជួបកីឡាករជើងខ្លាំងថៃឈ្មោះ ផេត បូផា ដែលធ្លាប់ប្រកួតបាន១២៥ដង ឈ្នះ១០០ដងចាញ់២៥ដង ខណៈរូបគេទើបតែប្រកួតបាន៧២ដង ឈ្នះ៥១ដង ចាញ់១៨ដង និងស្មើ៣ដង ។ តាមរយៈប្រវត្តិប្រកួតនេះ គេហ៊ានវាយតម្លៃថា ការប្រកួតរបស់សុខ ទូច លើកនេះធ្វើឡើងដើម្បីបង្គ្រប់កិច្ចប៉ុណ្ណោះព្រោះបើទោះជាឈ្នះក៏គ្មានសង្ឃឹមឡើងទៅប្រកួតនៅវគ្គបន្តដែរ ។
ក្រៅពីគូដណ្ដើមខ្សែក្រវាត់ទាំង២គូនេះទៅ នៅលើសង្វៀនដដែលក៏មានការប្រកួតលក្ខណៈមិត្តភាពចំនួន៣គូទៀតដែរដូចជាកីឡាករ ចៅ រស់ មកពីក្លិបសុភានូគុនខ្មែរ ប្រកួតជាមួយកីឡាករម៉ុន ស៊ីម៉ាក់ មកពីក្លិបអមតគុនខ្មែរ ។ កីឡាករ ពុទ្ធ ថនកុសល មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករ នន់ ជំនិត មកពីមជ្ឈមណ្ឌលសកម្មភាពកម្ចាត់មីនកម្ពុជា និងគូចុងក្រោយកីឡាករ ពុយ ឈិន មកពីក្លិបឃ្លាំងមឿងកីឡា ប្រកួតជាមួយកីឡាករ ជ័យ សុខគា មកពីក្លិបទ័ពពិសេសឆត្រយោង៩១១ ៕
ចែករំលែកព័តមាននេះ