នគរបាលរាប់រយនាក់ហ្វឹកហ្វាត់ជំនាញទប់ស្កាត់បាតុកម្ម
ខេត្តកំពង់ចាម ៖ ដើម្បីពង្រឹងសន្តិសុខ និងសណ្តាប់ធ្នាប់ឲ្យកាន់តែប្រសើរឡើង និងដើម្បីទប់ស្កាត់នូវរាល់បាតុភាពអសកម្មដែលបង្កឡើងដោយក្រុមជនអគតិណាមួយ …
ខេត្តកំពង់ចាម ៖ ដើម្បីពង្រឹងសន្តិសុខ និងសណ្តាប់ធ្នាប់ឲ្យកាន់តែប្រសើរឡើង និងដើម្បីទប់ស្កាត់នូវរាល់បាតុភាពអសកម្មដែលបង្កឡើងដោយក្រុមជនអគតិណាមួយនោះ និងអនុវត្តតាមបទបញ្ជារបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោក លន់ លឹមថៃ អភិបាល នៃគណៈអភិបាលខេត្ត កម្លាំងនគរបាលចំនួន៤០០នាក់ត្រូវបានទទួលការបំប៉នជំនាញដើម្បីទប់ទល់នឹងបាតុកម្មដែលកើតឡើងដោយយថាហេតុណាមួយ ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្តមានប្រសាសន៍ឲ្យដឹងនៅព្រឹកថ្ងៃទី២០ ខែតុលា ឆ្នាំ២០១៦ថា ដោយអនុវត្តតាមផែនការរបស់ប្រមុខរាជរដ្ឋាភិបាលកម្ពុជា ក៏ដូចជាថ្នាក់ដឹកនាំគ្រប់លំដាប់ថ្នាក់ ស្របតាមសភាពការណ៍ជាក់ស្តែងលើកការពង្រឹងសន្តិសុខ នយោបាយ នាពេលបច្ចុប្បន្នក្នុងការបង្ការទប់ស្កាត់ សកម្មភាពបង្កចលាចល ការធ្វើមហាបាតុកម្ម និងបាតុភាពមិនប្រក្រតីផ្សេងៗដែលបង្កដោយការញុះញង់ប្រឆាំងរាជរដ្ឋាភិបាលក្នុងភូមិសាស្ត្រខេត្តកំពង់ចាម ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត មានប្រសាសន៍បន្តថា ដើម្បីធានាបានម្ចាស់ការទាំងស្រុង រូបលោកបានរៀបចំបើកវគ្គបំប៉នជំនាញការពារទប់ទល់បាតុកម្ម សម្រាប់វគ្គទី១ត្រូវបានជ្រើសរើសមកពីតាមបណ្តាការិយាល័យជំនាញ និងអធិការដ្ឋាននគរបាលក្រុងកំពង់ចាម សរុបមានចំនួន១២០នាក់ ដោយបានធ្វើការហ្វឹកហាត់រយៈពេល៤៥ថ្ងៃ ចាប់ផ្តើមពីថ្ងៃទី១៣ ខែតុលា ដល់ថ្ងៃទី២៨ ខែវិច្ឆិកា ឆ្នាំ២០១៦ ។ វគ្គទី១នេះត្រូវបានបែងចែកជា២វេន ព្រឹក និងល្ងាច ប្រៀបនឹងដូចសំលៀងកាំបិត ហើយបានរំលឹកឡើងវិញនូវមេរៀនក្រោយពីបានបញ្ចប់វគ្គទី១ ហើយវគ្គទី២នឹងត្រូវបន្តធ្វើឡើងក្នុងនោះមានទាំងការអន្តរាគមន៍ពន្លត់អគ្គិភ័យ គ្រោះថ្នាក់ធម្មជាតិផ្សេងៗដូចជា ខ្យល់ព្យុះ គ្រោះទឹកជំនន់ ។ល។ ពិសេសការរៀបចំសន្តិសុខ និងសណ្តាប់ធ្នាប់សង្គមជូនពលរដ្ឋឲ្យបានល្អ ។
គួររំលឹកថា នាពេលកន្លងមកនៅលើទឹកដីខេត្តកំពង់ចាម ធ្លាប់មានកម្មករនៅតាមរោងចក្រមួយចំនួនបានធ្វើបាតុកម្មទាមទារលក្ខខណ្ឌការងារមួយចំនួនរហូតដល់ទៅផ្ទុះអំពើហឹង្សា តែត្រូវបានកម្លាំងសមត្ថកិច្ចបានធើ្វការទប់ស្កាត់បានទាន់ពេលវេលាផងដែរ ៕
ចែករំលែកព័តមាននេះ