ខេត្តស្ទឹងត្រែង ៖ ប្រជាពលរដ្ឋជាច្រើនគ្រួសារបានអំពាវនាវសុំឱ្យអាជ្ញាធរជួយរកយុត្តិធម៌ទាំងឈឺចាប់ និងពុះកញ្ជ្រោលក្នុងចិត្ត ខណៈក្រុមហ៊ុនបូណារីតា យកគ្រឿងចក្រខ្នាតធំទៅឈូសឆាយ ដុតខ្ទម និងដំណាំហូបផ្លែបន្លែបង្ការរបស់ពួកគាត់ស្ទើរគ្មានសល់ ក្នុងបំណងយកធ្វើជាកម្មសិទ្ធិក្រុមហ៊ុនផ្ទាល់ និងជាការរំលោភបំពានគ្មានការអៀនខ្មាស បើទោះបីជាបានដឹងថា ពួកគាត់បានបង្កបង្កើនផល និងរស់នៅលើផ្ទៃដីនេះមិនតិចជាង១០ឆ្នាំមកហើយក្តី។
នៅព្រឹកថ្ងៃទី១៤ មិថុនា គ្រឿងចក្ររបស់ក្រុមហ៊ុនបូណារីតា បានឈូសផ្លូវកាត់ប្រឡាយព្រំដីឆ្លងចូលទៅឈូសឆាយលើផ្ទៃដីរបស់ប្រជាពលរដ្ឋបង្កឱ្យខូចខាតដល់ផលដំណាំជាច្រើនដើម្បីវាតយកដីជាកម្មសិទ្ធិរបស់ខ្លួន។ សកម្មភាពនេះត្រូវបានចេញមុខហាមឃាត់ពីម្ចាស់ដីដែលសំអាងថា បានកាន់កាប់ជាបន្តបន្ទាប់ តែទោះបីជាយ៉ាងណាក្តីការហាមឃាត់នេះមានប្រសិទ្ធភាពតែនៅពេលដែលម្ចាស់ដីនៅប៉ុណ្ណោះ។
លោកស្រីមាស សុគន្ធ ក្រុមប្រឹក្សាអ្នកច្បាប់នៃរាជរដ្ឋាភិបាល និងជាមេធាវី ហើយក៏ជាម្ចាស់ដីក្នុងចំណោមប្រជាពលរដ្ឋទាំងនោះបានបញ្ជាក់ប្រាប់សមត្ថកិច្ច និងអ្នកយកព័ត៌មានថា ផ្ទៃដីរបស់គាត់បានទិញតាំងពីឆ្នាំ២០០១មកម្ល៉េះ ដោយមានចុះហត្ថលេខាទទួលស្គាល់ដឹងឮពីមេភូមិ មេឃុំ ។ ក្នុងផ្ទៃដីគាត់គ្រប់គ្រងនេះមានក្បាលប្រវែង១៣៤ម៉ែត្រ និងបណ្តោយប្រវែង៤១០ម៉ែត្រ មានកាយប្រឡាយព័ទ្ធជុំវិញធ្វើជាព្រំសម្គាល់។
លោកស្រីបន្តថា ដីដែលគាត់កាន់កាប់ជាកម្មសិទ្ធិផ្ទាល់ខ្លួនតាំងពីឆ្នាំ២០០១មកនេះបានដាក់បញ្ចូលក្នុងទ្រព្យសម្បត្តិ និងបានប្រកាសព័ត៌មានផ្ទាល់ខ្លួនរបស់អ្នកប្រកាសទ្រព្យសម្បត្តិ និងបំណុលក្នុងអង្គភាពប្រឆាំងអំពើពុករលួយរួចជាស្រេចហើយ និងមានលិខិតស្នាមទទួលស្គាល់ពីអង្គភាពប្រឆាំងអំពើពុករលួយរួចទៀតផង ។ ដូច្នេះគាត់មិនសុខចិត្តចំពោះការរំលោភបំពានទាំងស្រស់ៗបែបនេះបានទេ ។ គាត់បានដាក់ពាក្យប្តឹងក្រុមហ៊ុននោះទៅតុលាការខេត្តស្ទឹងត្រែង។
លោកស្រីបញ្ជាក់ថា មុនពេលគាត់ដាក់ពាក្យបណ្តឹងទៅតុលាការនេះ គាត់បានឱ្យបញ្ឈប់សកម្មភាពឈូសឆាយលើផ្ទៃដីរបស់គាត់ ហើយបានហៅមេការក្រុមហ៊ុនសួរនាំជាច្រើនលើកច្រើនសា តែយកលេសថា ពេលនេះ ពេលនោះ និងឆ្លើយតាមទូរស័ព្ទថា ចង់ជួប ចង់និយាយទៅថ្នាក់ខេត្តចុះ ព្រោះខេត្តជាអ្នកឱ្យធ្វើ។
លោកចាន់ នី មេការក្រុមហ៊ុន បូណារីតា បានប្រាប់នៅព្រឹកថ្ងៃទី១៥ មិថុនា ថា «ខ្ញុំមិនអាចផ្តល់ព័ត៌មានឱ្យអ្នកសារព័ត៌មានបានទេ បើចង់ច្បាស់ឱ្យម្ចាស់ដីមកក្រុមហ៊ុនរបស់ខ្ញុំ បើមិនអ៊ីចឹងឱ្យទៅជួបអភិបាលខេត្តទៅខ្ញុំមិនអាចឆ្លើយបានទេ ព្រោះធ្វើតាមតែបញ្ជារបស់គេប៉ុណ្ណោះ»។
ភាគីដែលនិយាយថា ជាជនរងគ្រោះកំពុងដាក់ពាក្យបណ្តឹងទៅតុលាការស្វែងរកយុត្តិធម៌ ឯសកម្មភាពគ្រឿងចក្រឈូសឆាយកំពុងនៅទ្រឹងក្រោយពីមានការទប់ស្កាត់ពីម្ចាស់ដីរួចមក។ ក្រុមហ៊ុនបូណារីតា ធ្លាប់ប៉ះទង្គិចជាមួយប្រជាពលរដ្ឋនៅចំណុចដុងក្រឡ ជិតព្រំប្រទល់កម្ពុជា-ឡាវ ហើយក្រុមហ៊ុននេះពុំបានដាំដុះដំណាំកសិឧស្សាហកម្មអ្វីលើផ្ទៃដីដែលទទួលបានសម្បទានឡើយគ្រាន់តែឈូសឆាយវាតផ្ទៃដីបង្កកចោលប៉ុណ្ណោះ ៕
ចែករំលែកព័តមាននេះ