រាជធានីភ្នំពេញ ៖ ឡៅ ចិត្រា មកពីក្លិបកងទ័ពឆត្រយោង៩១១ ត្រូវបានគេផ្គូផ្គងឱ្យជួបប្រកួតជាមួយកីឡាករថៃឈ្មោះAnon ក្នុងប្រភេទទម្ងន់៥៤គីឡូក្រាម ចំណែក ព្រំ សំណាង មកពីក្លិបកងទ័ពឆត្រយោង៩១១ ត្រូវជួបប្រកួតជាមួយកីឡាករថៃឈ្មោះPhak Nunក្នុងប្រភេទទម្ងន់៧៣គីឡូក្រាម នៅលើសង្វៀនទូរទស្សន៍អប្សរាថ្ងៃសៅរ៍ ទី២៧ សីហា ក្រោមការឧបត្ថម្ភដោយណាហ្គាវើល ។
តាមការឱ្យដឹងពីអ្នករៀបចំការប្រកួតថា កីឡាករថៃទាំង២រូបនេះមិនធ្លាប់មកប្រកួតនៅស្រុកខ្មែរទេ ប៉ុន្តែថ្វីដៃប្រកួតមិនអន់នោះទេ ជាពិសេសAnonតែម្ដងដែលជាជើងខ្លាំងទម្ងន់ស្រាលក្នុងប្រទេសថៃ ។ សម្រាប់ការមកស្រុកខ្មែរលើកនេះ គេមិនហ៊ានអះអាងទុកមុនថា អាចយកឈ្នះឡៅ ចិត្រា បានឬអត់នោះទេ ។ ចំណែកឡៅ ចិត្រា ជាអ្នកប្រដាល់ជើងថ្មីមួយរូបដែលកំពុងតែឡើងកូដយ៉ាងខ្លាំង ជាក់ស្ដែងក្នុងចំណោមការប្រកួតទាំងជាង២០លើកមកនេះអត់ទាន់ស្គាល់ចាញ់ម្ដងណាឡើយ មិនតែប៉ុណ្ណោះ ថែមទាំងផ្ដួលគូប្រកួតឱ្យសន្លប់បានចំនួន១៧ដងទៀតផង ។ ដូច្នេះសម្រាប់ឡៅ ចិត្រា ត្រូវបានអ្នកតាមដានការប្រកួតភាគច្រើនហ៊ានវាយតម្លៃទុកមុនថា នឹងឈ្នះច្រើនជាងចាញ់។
ចំណែក ព្រំ សំណាង វិញគេមិនហ៊ានទាយទុកមុនពីលទ្ធផលចុងក្រោយនោះទេ ព្រោះស្នៀតប្រយុទ្ធរបស់កីឡាកររូបនេះអត់មានអ្វីដែលពិសេសឡើយដោយភាគច្រើនគេវាយអាងកម្លាំងបាយប៉ុណ្ណោះ ។ ម្យ៉ាងវិញទៀត គេមិនស្គាល់ប្រវត្តិកីឡាករថៃរូបនេះច្បាស់ផងនោះ កាន់តែពិបាកសង្ឃឹមថែមទៀត ។ ចាំមើល ព្រំ សំណាង ជួបកីឡាករថៃ Phak Nun លើកនេះមានសំណាងដូចឈ្មោះឬអត់ ?
នៅលើសង្វៀនដដែលក៏មានការប្រកួតមិត្តភាពរវាងកីឡាករកម្ពុជាគ្នាឯងផងដែរដូចជាកីឡាករ គង់ បញ្ញា មកពីសមាគមកីឡាប្រដាល់ខេត្តកោះកុង ប្រកួតជាមួយកីឡាករ សំណាង ហនុមាន មកពីក្លិបដួងសែនសុខគុនខ្មែរ ។ កីឡាករ សូត្រ រដ្ឋសុភា មកពីក្លិបសាលវ័ន្តកីឡា ប្រកួតជាមួយកីឡាករ ងួន សប្បត្តិ មកពីសមាគមកីឡាប្រដាល់ខេត្តកោះកុង ។ កីឡាករ សិត សាមៀន មកពីសមាគមកីឡាប្រដាល់ខេត្តកោះកុង ប្រកួតជាមួយកីឡាករ សុខ ប៉ាក់ មកពីក្លិបសុភានូមានជ័យនិងគូចុងក្រោយកីឡាករ កំពែង ខ្មៅ មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករ ភួង ពិសិដ្ឋ មកពីក្លិបតាឡីដំរីមានរិទ្ធ ៕
ចែករំលែកព័តមាននេះ