ខេត្ដកំពង់ឆ្នាំង ៖ ទារិកាអាយុ៧ខែម្នាក់ បានរងរបួសដោយជង់ក្បាលជាប់នឹងកែងចោតស្បែកជើងរបស់ម្ដាយ ខណៈដែលទារិកានោះធ្លាក់ពីលើអង្រឹងកំពស់ប្រហែល១ម៉ែត្រ ។ ហេតុការណ៍អកុសលនេះ បានកើតឡើងកាលពីវេលាម៉ោង៤ និង១៥នាទី រសៀលថ្ងៃទី១១ មិថុនា នៅភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ។តាមប្រភពព័ត៌មានពីមន្ដ្រីប៉ូលិសប៉ុសិ៍្ដប្អេរ បានឱ្យដឹងថា មុនពេលកើតហេតុចៃដន្យនេះ ម្ដាយទារិការងគ្រោះឈ្មោះមាន ស្រីម៉ៅ អាយុ២៧ឆ្នាំ ដែលជាមន្ដ្រីយោធាម្នាក់បានដាក់កូនដេកលើអង្រឹងកំពស់ប្រហែល១ម៉ែត្រពីដី ប៉ុន្ដែមានគ្រែមួយនៅពីក្រោម គឺអង្រឹងចងពីលើបញ្ឆិតមេគ្រែ ។
ពេលនោះ ម្ដាយបានដេកលើគ្រែដោយយោលអង្រឹងបណ្ដើរសំងំសំរាកបណ្ដើររំពេចនោះស្រាប់តែទារិកាក្រឡាប់ធ្លាក់ពីលើអង្រឹងទៅដី ហើយក៏ជង់ក្បាលជាប់នឹងកែងចោតស្បែកជើងរបស់ម្ដាយបណ្ដាលឱ្យផុងលលាដ៍ ។ ភ្លាមៗ នោះម្ដាយបានស្ទុះលើក កូនបីហើយដឹកមក មន្ទីរពេទ្យទាំងជាប់កែងចោតស្បែកជើងនៅ នឹងក្បាលពីក្រោយខាងឆ្វេង ។ ក្រោយពីវះកាត់យកស្បែកជើងចេញ គ្រូពេទ្យប្រាប់ថា កែងស្បែកជើងបានមុតផុងដល់ខួរក្បាលត្រូវ ប្រញាប់យកទៅមន្ទីរពេទ្យនៅឯរាជធានីភ្នំពេញជាបន្ទាន់ ។
មានការពិចារណាថា កែងស្បែកជើង ទាលដូចម្រាមដៃទេ ហេតុអ្វីមុតជ្រៅផុង ចូលលលាដ៍ តែត្រូវពេទ្យប្រាប់ថា ក្បាលទារក៧ខែ គឺនៅខ្ចីទន់ណាស់ ហើយធ្លាក់កំពស់១ម៉ែត្រទៀតអាចថា ពេលធ្លាក់នោះ ម្ដាយកំពុងយោលពង្រឹងផង ដូចចាប់បោកបន្ថែម។ គ្រោះថ្នាក់នេះពិតជាកម្រកើតមានណាស់ ។
ចែករំលែកព័តមាននេះ