រាជធានីភ្នំពេញ ៖ លោកជំទាវ ម៉ក់ វណ្ណស៊ីថា អភិបារងរាជធានីភ្នំពេញ ក្នុងនាមរដ្ឋបាលរាជធានីភ្នំពេញ នាព្រឹកថ្ងៃទី១១ ខែកក្កដា ឆ្នាំ២០១៦ បាននាំយកថវិកាចំនួន១០លានរៀល និងទឹកសុទ្ធ១០០កេស
រាជធានីភ្នំពេញ ៖ លោកជំទាវ ម៉ក់ វណ្ណស៊ីថា អភិបារងរាជធានីភ្នំពេញ ក្នុងនាមរដ្ឋបាលរាជធានីភ្នំពេញ នាព្រឹកថ្ងៃទី១១ ខែកក្កដា ឆ្នាំ២០១៦ បាននាំយកថវិកាចំនួន១០លានរៀល និងទឹកសុទ្ធ១០០កេស ទៅចូលរួមរំលែកទុក្ខក្នុងបុណ្យសពលោកបណ្ឌិត កែម ឡី ប្រធានអង្គការអភិវឌ្ឍន៍សង្គម និងជាអ្នកវិភាគសង្គម និង នយោបាយដ៏ល្បីល្បាញ ដែលសពរបស់លោកត្រូវបានតម្កល់ធ្វើបុណ្យទក្ខិណានុប្បទានតាមប្រពៃណីព្រះពុទ្ធសាសនានៅវត្តចាស់ ក្នុងសង្កាត់ជ្រោយចង្វារ ខណ្ឌជ្រោយចង្វារ ។
លោកជំទាវ ម៉ក់ វណ្ណស៊ីថា បានលំអោនកាយវាចារចិត្តនៅចំពោះមុខកម្រងផ្កាដែលតម្កល់នៅមុខមឈូសសពលោកបណ្ឌិតកែម ឡី និងនៅចំពោះមុខភរិយាមេម៉ាយ ព្រមទាំងកូន និងសាច់ញាតិនៃសពប្រកបដោយទឹកចិត្តក្តុកក្តួល និងសូមឲ្យវិញ្ញាណក្ខន្ធលោកបណ្ឌិត កែម ឡី ទៅសោយសុខក្នុងឋានសុគតិភពកុំបីឃ្លៀងឃ្លាតឡើយ ។
សូមបញ្ជាក់ថា លោកបណ្ឌិត កែម ឡី ត្រូវបានឃាតករបាញ់សម្លាប់នៅម៉ោងប្រមាណជា៩ព្រឹក ថ្ងៃទី១០ ខែកក្កដា ឆ្នាំ២០១៦នៅក្នុងស្តារម៉ាត នៃស្ថានីយប្រេងឥន្ធនៈបូកគោ កែងមហាវិថីព្រះមុនីវង្ស និងមហាវិថីម៉ៅសេទុង ស្ថិតក្នុងសង្កាត់បឹងកេងកងទី១ ខណ្ឌចំការមន ។
គួររំលឹកថា ក្នុងពិធីសម្ពោធអាគារ បញ្ជាការកងរាជអាវុធហត្ថលើផ្ទៃប្រទេស កាលពីព្រឹកថ្ងៃទី១១កក្កដា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្តែងមរណទុក្ខយ៉ាងក្រៀមក្រមចំពោះអំពើបាញ់ប្រហារដ៏ឃោរឃៅព្រៃផ្សៃនេះ និងបានដាក់បញ្ជាដល់កម្លាំងសមត្ថកិច្ចធ្វើការស្រាវជ្រាវឲ្យបានហ្មត់ចត់ និងបើកយុទ្ធនាការទ្រុងទ្រាយធំ ដើម្បីពង្រឹងសន្តិសុខនៅទូទាំងប្រទេស ។ សម្តេចតេជោបានអំពាវនាវដល់មជ្ឈដ្ឋាននានា ពិសេសអ្នកនយោបាយ សូមកុំប្រើប្រាស់សោកនាដកម្មនេះលាបពណ៌ទៅជារឿងនយោបាយ ៕
ចែករំលែកព័តមាននេះ