រាជធានីភ្នំពេញ ៖ លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់ កម្ពុជា បានប្រកាសឱ្យដឹងតាមរយៈសន្និសីទកាសែតមួយ ដែលបានធ្វើឡើងនៅទីស្នាក់ការសហព័ន្ធកីឡាវាយកូនបាល់កម្ពុជា ស្ថិតក្នុងពហុកីឡដ្ឋានជាតិអូឡាំពិក កាលពីថ្ងៃទី៥ កក្កដាកន្លងមកនេះថា ព្រឹត្តិការណ៍ Davis Cup អាស៊ីអូសេអានីកម្រិត៣ ឆ្នាំ២០១៦ នឹងប្រព្រឹត្តទៅនៅទីក្រុងTehranប្រទេសអុីរ៉ង់ពីថ្ងៃទី១១ ដល់ថ្ងៃទី១៦ កក្កដា ខាងមុខនេះ ។
លោក ទេព រិទ្ធីវិទ្ធ បានឱ្យដឹងថា ចាប់តាំងពីឆ្នាំ២០១២ រហូតមក ការប្រកួតនៅក្នុងកម្រិត៣នេះ មានតែ៨ក្រុមប៉ុណ្ណោះចូលរួម ដោយឡែកសម្រាប់ឆ្នាំ២០១៦នេះ មានក្រុមចំនួន៩ចូលរួមប្រកួតដើម្បីរកក្រុមខ្លាំង២ឡើងទៅប្រកួតយកកម្រិត២ ។ ចំណែកប្រទេសទាំង៩ចូលរួមនោះមានដូចជា កម្ពុជា អីុរ៉ង់ លីបង់ ស៊ីរី តួកមេនីស្ថាន ហុងកុង កាតារ ប៉ាស៊ីហ្វិកអូសេអានី និងសិង្ហបុរី ។ ចំណែកប្រតិភូកីឡាកម្ពុជាដែលត្រូវទៅចូលរួមប្រកួតលើកនេះ មានលោក ទេព រិទ្ធីវិទ្ធ ប្រធានប្រតិភូ លោក Braen Aneiros គ្រូបង្វឹក លោក ជា ពៅ គ្រូជំនួយ លោក សេង ងឹម គ្រូពេទ្យចលនា និងកីឡាករ៥នាក់ទៀតមាន ប៊ុន កេន្នី, ម៉ម ផល្គុន ម៉ម វិទូ, ឡុង សំនៀង និងតាន់ នីសាន់ ។
គួររំលឹកផងដែរថា កីឡាករវាយកូនបាល់កម្ពុជាទាំង៥រូបដែលទៅចូលរួមប្រកួតលើកនេះ សុទ្ធសឹងតែជាអ្នកមានបទពិសោធន៍ខ្ពស់ ជាក់ស្ដែងកីឡាករ តាន់ នីសាន់ ធ្លាប់ដណ្ដើមបានមេដាយសំរឹទ្ធពីការប្រកួតកីឡាស៊ីហ្គេម២០០៧ និង២០០៩ ។ ពួកគេទាំងអស់គ្នាសុទ្ធតែមានជំនឿចិត្តនៅក្នុងការប្រកួតដណ្ដើមយកកម្រិត២ជាបន្តទៀត ។ បើយើងឈ្នះបានឡើងមកដល់កម្រិត២ យើងមានសិទិ្ធទាមទារធ្វើជាម្ចាស់ផ្ទះDavis Cup ៕
ចែករំលែកព័តមាននេះ