រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍ ស្អែកនេះ នៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតចំនួន៤គូរវាងកីឡាករកម្ពុជា និងកីឡាករថៃផងដែរ នៅថ្ងៃអាទិត្យទី៣ កក្កដា ខានស្អែកនេះ ។
រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍ ស្អែកនេះ នៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតចំនួន៤គូរវាងកីឡាករកម្ពុជា និងកីឡាករថៃផងដែរ នៅថ្ងៃអាទិត្យទី៣ កក្កដា ខានស្អែកនេះ ។ កីឡាករទាំង៨រូបនឹងបង្ហាញខ្លួន៤រូបនៅក្នុងការប្រកួតពេលព្រឹក និង៤រូបនៅក្នុងការប្រកួតពេលរសៀលដោយក្នុងមួយព្រឹត្តិការណ៍ៗគឺមានកីឡាករខ្មែរ២រូប និងថៃ២រូប ។
សម្រាប់ព្រឹតិ្តការណ៍«Ganzburg Top Fighter» ដែលចាប់ផ្ដើមពីម៉ោង៨ព្រឹក កីឡាករ យុគ យក្សផ្លែ មកពីក្លិបអប់រំកាយ និងកីឡាខេត្តបាត់ដំបង ប៉ះគ្នាជាមួយកីឡាករថៃឈ្មោះ ផាយ៉ាក មេកខា និងកីឡាករ ផាន់ គ្រាន់ មកពីក្លិបគជសារកីឡា ប៉ះគ្នាជាមួយកីឡាករថៃឈ្មោះ ភេច ណាំអេក ។ សំអាងលើប្រវត្តិប្រកួតបាន១៤៤លើក ឈ្នះ១២៥លើក ចាញ់១៤លើក និងស្មើ៥លើក កីឡាករកម្ពុជាយុគ យក្សផ្លែ ត្រូវគេជឿជាក់ថានឹងឈ្នះច្រើនជាង ដោយសារតែគូប្រកួតរបស់លោកទើបតែឡើងប្រកួតបាន ៦៤លើក ឈ្នះ៤៩លើក ចាញ់១៣លើក និងស្មើ២លើកគឺចាញ់ប្រៀបដាក់ឆ្ងាយគួរសម ។ មន្ត្រីជាអ្នកដឹកនាំកីឡាករថៃនៅតែជឿជាក់ថា កីឡាកររបស់គេនឹងធ្វើបានល្អ ដោយលោកបញ្ជាក់ថា ថ្វីដ្បិតថាគេប្រកួតតិចជាង ប៉ុន្តែសមត្ថភាពគេខ្លាំងហើយមានកម្រិតវាយលុកក៏ល្អ។ មិនខុសគ្នាដែរភាគីខាងកីឡាករកម្ពុជា ក៏ជឿជាក់តែកូនសិស្សរបស់ខ្លួនផងដែរ។
ងាកទៅកាន់គូទី២វិញ កីឡាករផាន់ គ្រាន់ ដែលធ្លាប់ប្រកួតបាន៨០លើក ឈ្នះ៦៦លើក ចាញ់១២លើក និងស្មើ២លើក ក៏មានជំនឿចិត្តថានឹងទទួលជ័យជម្នះមិនអន់ផងដែរ បើទោះជាបានដឹងថាដៃគូរបស់ខ្លួនប្រកួតបានប្រហែលគ្នាគឺ៧៩លើក ឈ្នះ៦៣លើក ចាញ់៩លើក និងស្មើ២លើក ។ នោះគឺដោយសារតែយល់ឃើញថាកីឡាករកម្ពុជានៅមានសមត្ថភាពល្អដែលប៉ះជាមួយថៃប្រភេទនេះ ក៏ជឿថា គេអាចធ្វើបាន។ គូនេះអ្នកឃ្លាំមើលមួយចំនួនតូចពិបាកបង្ហាញអារម្មណ៍ទុកចិត្ត ជាពិសេសនៅពេលដឹងថា ផាន់ គ្រាន់ ពេលខ្លះក៏ធ្លាក់ដៃ ហើយកីឡាករថៃក៏មិនធម្មតា ។ ទោះបីយ៉ាងណា ចំពោះលទ្ធផលជាក់ស្ដែងគឺមានតែការប្រកួតត្រូវបានបញ្ចប់ប៉ុណ្ណោះទើបអាចដឹងបាន។
សម្រាប់សមាសភាព៤រូបផ្សេងទៀតនៅថ្ងៃអាទិត្យនោះដែរ គឺកីឡាករមាស ច័ន្ទមាន មកពីក្លិបក្រសួងការពារជាតិ ត្រូវប្រកួតជាមួយកីឡាករថៃឈ្មោះ ហ្វា ផាយ៉ាក់ និងកីឡាករ ផង់ សុភាព មកពីក្លិបរាជសីហ៍ខេត្តរតនគីរី ត្រូវប្រកួតជាមួយកីឡាករថៃឈ្មោះ ផ្លាយ ណយ ។ ការប្រកួតរបស់កីឡាករទាំង៤រូប មិនគ្រាន់តែជាការប្រកួតចាញ់ឈ្នះដើម្បីស្ទាបស្ទង់សមត្ថភាពនោះទេ ប៉ុន្តែក៏ជាការប្រកួតដណ្ដើមពិន្ទុសម្រាប់បោះជំហានទៅរកការដណ្ដើមចំណាត់ថ្នាក់ជើងឯកផងដែរ ។ អ្នកទាំង៤នឹងប៉ះគ្នានៅក្នុងព្រឹត្តិការណ៍ប្រដាល់ជើងឯកអន្តរជាតិស្រាបៀរកម្ពុជា ចាប់ពីម៉ោង២រសៀលទៅ បន្ទាប់ពីព្រឹត្តិការណ៍នេះត្រូវបានដំណើរការប្រកួតកន្លងមករួចហើយសម្រាប់កីឡាករកម្ពុជា និងបរទេសទាំង៨ ។ ឆ្លងកាត់ការប្រកួតបាន១១១លើក ឈ្នះ៨៥លើក និងចាញ់២៦លើក មាស ច័ន្ទមាន ហាក់មិនមានសង្ឃឹមខ្ពស់ប៉ុន្មានទេ ថានឹងយកបាន៣ពិន្ទុ ដោយសារតែកីឡាករថៃក៏បានឆ្លងកាត់ការប្រកួតដល់១០២លើក ឈ្នះ៧៥លើក ចាញ់២៦លើក និងស្មើ១លើក។
សម្រាប់ការប្រកួតដណ្ដើមពិន្ទុមួយគូទៀត ផង់ សុភាព ធ្លាប់ប្រកួតបាន៧២លើក ឈ្នះ៥៩លើក ចាញ់១១លើក និងស្មើ២លើក ក៏រឹតតែមិនរំពឹងថានឹងយកបាន៣ពិន្ទុដូចគ្នាផងដែរ ក្នុងពេលដែលកីឡាករថៃជាគូប្រកួតឡើងរេញបានដល់១០២លើក ឈ្នះ៨០លើក ចាញ់១៨លើក និងស្មើ៤លើក ដែលមើលទៅបទពិសោធន៍នេះ ក៏ទំនងមិនងាយស៊ីផុយៗដែរ ៕
ចែករំលែកព័តមាននេះ