រាជធានីភ្នំពេញ ៖ ឡោ សំណាង មកពីក្លិបកងពលតូចលេខ៨ភ្នំទ្រព្យ និងម៉ា ឆៃម៉ូវ មកពីក្លិបឃ្លាំងមឿងកីឡា ត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីធីអិននាថ្ងៃសៅរ៍ទី២៥ មិថុនា សប្ដាហ៍នេះ ។
ឡោ សំណាង គឺជាអ្នកប្រដាល់ជើងចាស់មួយរូបដែលល្បីខ្លាំងកាលពីប៉ុន្មានឆ្នាំមុន ប៉ុន្តែមួយរយៈចុងក្រោយនេះហាក់ធ្លាក់កូដជាងមុនឆ្ងាយណាស់ ដោយសារវ័យរបស់គេកាន់តែជ្រេ រីឯកម្លាំងក៏មិនខ្លាំងដូចមុនទៀតដែរទើបមិនអាចបញ្ចេញស្នៀតប្រយុទ្ធបានល្អ ។ ជាក់ស្ដែងស្នៀតកែង និងជង្គង់នៅតែប្រើការបានល្អគ្រាន់តែមិនសូវរហ័សរហូនប៉ុណ្ណោះ ។ ឡោ សំណាង ធ្លាប់ប្រកួតបាន៨៨ដង ក្នុងនោះចាញ់តែ៧ដងគត់ និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១១ដង ។ ប្រកួតលើកចុងក្រោយគេបានផ្ដួលកីឡាករថៃឱ្យសន្លប់នៅក្នុងទឹកទី៤ ប៉ុន្តែលើកនេះមិនដឹងថាគេមានសំណាងដូចមុន ឬអត់ ពេលជួបកីឡាករថៃឈ្មោះ យុគខាវ ស.ភ្លើនជីត ដែលកាលពីថ្ងៃទី២៨ ឧសភា គេបានផ្ដួលកីឡាករកម្ពុជាហែល វ៉ា មកពីក្លិបឃ្លាំងមឿងកីឡាឱ្យសន្លប់នៅក្នុងទឹកទី២។ កីឡាករថៃរូបនេះ ធ្លាប់ប្រកួតបាន៦៦ដង ឈ្នះ៤៦ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បានតែ១ដងគត់ ។ គូនេះ ប្រកួតគ្នាក្នុងប្រភេទទម្ងន់៥៧គីឡូក្រាមដែលមិនទាន់ដឹងថា អ្នកណាខ្លាំងជាងអ្នកណាឡើយ ព្រោះពួកគេមិនធ្លាប់ជួបគ្នាពីមុនមក ។
ចំណែក ម៉ា ឆៃម៉ូវ ដែលជួបកីឡាករថៃឈ្មោះ ភីតដាំ ស.ដានឆ័យ ក្នុងប្រភេទទម្ងន់៨៣គីឡូក្រាម ក៏ជាគូគួរឱ្យចាប់អារម្មណ៍ខ្លាំងណាស់ដែរ ។ ម៉ា ឆៃម៉ូវ ក៏ធ្លាប់ជាជើងខ្លាំង១រូបក្នុងពិភពប្រដាល់ដែរ ប៉ុន្តែដោយសារការបាត់មុខយូរពីលើសង្វៀនបែបនេះ ប្រហែលជាមិនខ្លាំងដូចមុនទៀតទេមើលទៅ ។ ម៉ា ឆៃម៉ូវ ធ្លាប់ប្រកួតបាន៤០ដង ឈ្នះ២៩ដង ចាញ់១០ដង និងស្មើ១ដង ខណៈកីឡាករថៃធ្លាប់ប្រកួតបាន១១០ដង ឈ្នះ៨០ដង ចាញ់២៥ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៥ដង ។ កីឡាករថៃរូបនេះមិនធ្លាប់មកប្រកួតនៅស្រុកខ្មែរទេពីមុនមក ដូច្នេះ ម៉ា ឆៃម៉ូវ មិនអាចធ្វេសប្រហែសបានឡើយ ។
ដោយឡែកគូប្រកួតមិត្តភាពធម្មតាវិញមានកីឡាករ ព្រំ វី មកពីក្លិបកងពលតូចលេខ៨ភ្នំទ្រព្យ ប្រកួតជាមួយកីឡាករ ចាន់ គង់រាជ មកពីក្លិបតាព្រហ្មមានជ័យ ។ កីឡាករ ឈុន បញ្ញា មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ រិទ្ធ ប្រាក់ប៊ិន មកពីក្លិបកងពលតូចលេខ៧០ និងកីឡាករ លីន ជី មកពីក្លិបបុរីរាជសីហ៍ ប្រកួតជាមួយកីឡាករ ហេង ពៅ មកពីក្លិបកងពលតូចលេខ៧០៕
ចែករំលែកព័តមាននេះ