រាជធានីភ្នំពេញ ៖ ក្រៅពីការប្រកួតនៅរសៀលថ្ងៃសៅរ៍ នៅថ្ងៃអាទិត្យទី១ ខែឧសភា សង្វៀនទូរទស្សន៍អាស៊ីអាគ្នេយ៍ (SEA-TV) ក៏មានបើកការប្រកួតរវាងកីឡាករជើងខ្លាំងកម្ពុជា និងកីឡាករថៃចំនួន៤គូផងដែរ
រាជធានីភ្នំពេញ ៖ ក្រៅពីការប្រកួតនៅរសៀលថ្ងៃសៅរ៍ នៅថ្ងៃអាទិត្យទី១ ខែឧសភា សង្វៀនទូរទស្សន៍អាស៊ីអាគ្នេយ៍ (SEA-TV) ក៏មានបើកការប្រកួតរវាងកីឡាករជើងខ្លាំងកម្ពុជា និងកីឡាករថៃចំនួន៤គូផងដែរ ដែលជាការប្រកួតអន្តរជាតិបើកឆាកសម្រាប់ខែថ្មី ។ ការប្រកួតរបស់ពួកគេត្រូវបានធ្វើឡើងនៅក្នុងព្រឹត្តិការណ៍២ផ្សេងគ្នា ដោយការប្រកួតនៅក្នុងព្រឹត្តិការណ៍នីមួយៗត្រូវគេកត់សម្គាល់ថា នឹងទទួលបានការចាប់អារម្មណ៍ក្នុងចំណោមអ្នកស្នេហាប្រដាល់មិនអន់នោះទេ ។
ការប្រកួតដែលនឹងធ្វើឡើងនៅថ្ងៃសៅរ៍រួមមានការប្រកួតពេលព្រឹកចាប់ពីម៉ោង៨នៅក្នុងព្រឹត្តិការណ៍ Ganzburg Top Fighter មានការប្រកួតអន្តរជាតិ២គូ និងការប្រកួតពេលរសៀលចាប់ពីម៉ោង២តទៅក៏មានការប្រកួតអន្តរជាតិ២គូផងដែរ នៅក្នុងព្រឹត្តិការណ៍កំពូលជើងឯករបស់ Cambodia Beer ។ សមាសភាពកីឡាករកម្ពុជា និងកីឡាករថៃទាំង៨រូបនោះរួមមាន កីឡាករ សេក គឹមរួន មកពីក្លិបអង្គរមានជ័យ ប៉ះគ្នាជាមួយកីឡាករថៃឈ្មោះ យ៉ត ភេចង៉ាម និងកីឡាករ សូត្រ ប៊ុនធី មកពីក្លិបបក្សីស្លាបដែក ប៉ះគ្នាជាមួយកីឡាករថៃឈ្មោះ អានុ វ៉ាត់ ។ អ្នកទាំង៤នឹងស្វាគមន៍គ្នានៅព្រឹកស្អែក ដោយភាគីម្ខាងៗមានការរំពឹងថា ខ្លួននឹងឈ្នះការប្រកួត ។
សំអាងលើប្រវត្តិប្រកួតបាន៦៩លើក ឈ្នះ៥៧លើក និងចាញ់១២លើក កីឡាករ សេក គឹមរួន ហាក់មានទុនច្រើនគួរសមសម្រាប់ជំនឿចិត្តឆ្ពោះទៅយកជ័យជម្នះលើគូប្រកួតកីឡាករថៃដែលទើបតែប្រកួតបាន៥៥លើក ឈ្នះ៤៦លើក ចាញ់៨លើក និងស្មើ១លើក ។ ទោះបីយ៉ាងណា មន្ត្រីជាអ្នកដឹកនាំកីឡាករថៃឲ្យមកប្រកួតក៏មានជំនឿចិត្តទៅលើកីឡាករ យ៉ត ភេចង៉ាម ដូចគ្នា ដោយអះអាងថា គេប្រកួតបានតិចជាងមែន ប៉ុន្តែសមត្ថភាពខ្លាំង ហើយមានកម្រិតវាយលុកបានល្អ ។ មិនខុសគ្នាដែរ កីឡាករ សូត្រ ប៊ុនធី ដែលធ្លាប់ប្រកួតបាន៧២លើក ឈ្នះ៦២លើក ចាញ់៩លើក និងស្មើ១លើក ក៏មានជំនឿចិត្តថានឹងទទួលជ័យជម្នះផងដែរ បើទោះជាកីឡាករថៃធ្លាប់ប្រកួតបានដល់១០៥លើក ឈ្នះ៨៥លើក ចាញ់១៦លើក និងស្មើ៤លើក ដែលមានន័យថា កីឡាករថៃមានបទពិសោធន៍ឡើងរេញច្រើនជាងដាច់ឆ្ងាយ ។ គូនេះអ្នកឃ្លាំមើលទុកចិត្តកីឡាករថៃ ប៉ុន្តែលោក ស៊ុន ប៊ុនសូត្រ ជាគ្រូបង្វឹកបានយល់ឃើញថា កីឡាករ សូត្រ ប៊ុនធី ជាកូនសិស្សរបស់លោកនឹងអាចទៅរួចសម្រាប់ការប្រកួតនៅព្រឹកថ្ងៃសៅរ៍ ។ ចាំមើលលទ្ធផលផ្លែផ្កាជាក់ស្ដែងបានទៅកីឡាករកម្ពុជា ឬកីឡាករថៃ ?
សម្រាប់សមាសភាព៤រូបផ្សេងទៀតរួមមានកីឡាករ យុគ យក្សផ្លែ មកពីក្លិបអប់រំកាយ និងកីឡាខេត្តបាត់ដំបង ប្រកួតជាមួយកីឡាករថៃឈ្មោះ ផា យ៉ាណន់ និងកីឡាករ ព្រំ សំណាង មកពីក្លិបកងទ័ពឆត្រយោង៩១១ ប្រកួតជាមួយកីឡាករថៃឈ្មោះ កាំឡៃ ភីត ។ អ្នកទាំង៤នឹងត្រូវប្រកួតគ្នានៅរសៀលថ្ងៃអាទិត្យ ដោយអ្នកស្នេហាប្រដាល់ភាគច្រើនហាក់មិនហ៊ានទុកចិត្តថាភាគីណាមួយនឹងឈ្នះនោះទេ ដោយសារតែភាគីទាំងសងខាងសុទ្ធតែល្អដូចគ្នា ។ កីឡាករយុគ យក្សផ្លែ ធ្លាប់ប្រកួតបាន១៤២លើក ឈ្នះ១២៣លើក ចាញ់១៤លើក និងស្មើ៥លើក ក្នុងពេលដែលកីឡាករថៃប្រកួតបានតែ៩២លើក ឈ្នះ៧៦លើក និងចាញ់១៦លើក ។ មួយគូចុងក្រោយ គឺព្រំ សំណាង ធ្លាប់ប្រកួតបាន៧៨លើក ឈ្នះ៦៧លើក ចាញ់៩លើក និងស្មើ២លើក ក្នុងពេលដែលកីឡាករថៃធ្លាប់ប្រកួតបានដល់៩៩លើក ឈ្នះ៧៩លើក ចាញ់១៨លើក និងស្មើ២លើក ។ អ៊ីចឹងហើយ ទើបអ្នកគាំទ្រកីឡាករកម្ពុជាភាគច្រើនហាក់មិនសូវទុកចិត្តសម្រាប់ជ័យជម្នះ បើទោះជាយុគ យក្សផ្លែ មើលទៅមានបទពិសោធន៍ខ្ពស់ជាងគូប្រកួតល្អជាងព្រំ សំណាងបន្តិចក្ដី ៕
ចែករំលែកព័តមាននេះ