រាជធានីភ្នំពេញ ៖ នៅលើសង្វៀនស៊ីធីអិន នារសៀលថ្ងៃសៅរ៍ទី២៨ វិច្ឆិកា កីឡាករផាន់ គ្រាន់ មកពីក្លិបគជសារកីឡា ត្រូវគេរៀបចំឱ្យជួបប្រកួតជាលក្ខណៈមិត្តភាពជាមួយអ្នកប្រដាល់មកពីថៃឈ្មោះហ្វាលីឃីត ស៊ីតរ៉ាំងសាន់ ក្នុងប្រភេទទម្ងន់៦៥គីឡូក្រាម ចំណែកកីឡាករហ៊ឹម សេរី មកពីក្លិបតាព្រហ្មមានជ័យ បង្ក្រាបគ្រឿងញៀន ត្រូវជួបជាមួយកីឡាករថៃដូចគ្នាឈ្មោះយុគថង ពីនស៊ីនឆៃ ក្នុងប្រភេទទម្ងន់៥១គីឡូក្រាម ។
តាមការឱ្យដឹងអ្នកប្រដាល់ថៃទាំងពីររូបមិនធ្លាប់មកប្រកួតនៅស្រុកខ្មែរម្ដងណាឡើយ ។ យោងតាមប្រវត្តិកីឡាករថៃហ្វាលីឃីត ស៊ីតរ៉ាំងសាន់ ធ្លាប់ប្រកួតបាន១០៤ដង ឈ្នះ៧៥ដង ចាញ់២៥ដង និងស្មើ៤ដង ។ រីឯផាន់ គ្រាន់ ធ្លាប់ប្រកួតបាន៦៥ដង ឈ្នះ៥៥ដង ចាញ់១០ដង និងធ្លាប់ផ្លូលគូប្រកួតឱ្យសន្លប់នៅលើសង្វៀនបាន១៨ដង ។ ថ្វីត្បិតផាន់ គ្រាន់មានប្រវត្តិប្រកួតតិចជាងកីឡាករថៃ ក៏អ្នកអ្នកគាំទ្រទុកចិត្តលើគេដែរ ។ ផាន់ គ្រាន់ ក្រៅពីវាយចេញរហ័ស គេចេះប្រើស្នៀតកែង និងជង្គង់បានយ៉ាងស្ទាត់ជំនាញទៀតផង ឯចិត្តក៏សឿងណាស់ដែរ ហើយមិនចេះមើលស្រាលលើគូប្រកួតទៀតផង ។ ចំណែកកីឡាករថៃ បើផ្អែកទៅលើប្រវត្តិប្រកួតរបស់គេគឺមិនអន់ទេ ។ លោកម៉ា សេរី អ្នកគ្រប់គ្រងកម្មវិធីប្រកួតកីឡាប្រចាំស្ថានីយទូរទស្សន៍ស៊ីធីអិន ធ្លាប់ប្រាប់ថា លោកមិនដែលយកអ្នកប្រដាល់ធុនអន់មកប្រកួតនៅលើសង្វៀនលោកឡើយ ។ ដូច្នេះផាន់ គ្រាន់ជួបកីឡាករថៃ រូបនេះមិនអាចធ្វេសប្រហែសបានទេ ។
ហ៊ឹម សេរី ជួបកីឡាករថៃ យុគថង ពីនស៊ីនឆៃ លើកនេះ មិនដឹងថាយ៉ាងណានោះទេ។ កីឡាករថៃរូបនេះធ្លាប់ប្រកួតបាន៥១ដង ឈ្នះ៤០ដង ចាញ់៩ដង និងស្មើ២ដង ។ ចំណែក ហ៊ឹម សេរី ធ្លាប់ប្រកួតបាន៥៥ដង ឈ្នះ៤០ដង ចាញ់១០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៥ដង ។ បើប្រៀបធៀបទៅលើប្រវត្តិ គូនេះអាចស៊ីសងគ្នាបាន គ្រាន់តែគេមិនហ៊ានទាយទុកមុនពីលទ្ធផលបាញ់ឈ្នះប៉ុណ្ណោះ ។ ហ៊ឹម សេរី មានផ្លែកែង និងជង្គង់ល្អ ដែលអាចវាយចេញបានរហ័ស និងចំគោលដៅល្អទៀតផង ប៉ុន្តែចិត្តរបស់គេមិនសូវសឿងប៉ុន្មាន ។ រីឯកីឡាករថៃអត់មានអ្នកណាដឹងពីថ្វីដៃប្រកួតរបស់គេថាខ្លាំងប៉ុនណាទេ ដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះ ទើបអាចដឹងបាន ។
ដោយឡែកការប្រកួតមិត្តភាពធម្មតាវិញមានកីឡាករឡាញ់ ផល្លា មកពីក្លិបអេភូថងកីឡា ប្រកួតជាមួយកីឡាកររ័ត្ន សារួន មកពីក្លិបការិយាល័យទី៥កងទ័ពជើងគោក ។ កីឡាករលាស់ យីន មកពីក្លិបសម្រែករាជសីហ៍បង្ក្រាបគ្រឿងញៀន ប្រកួតជាមួយកីឡាករទេស ជីវ៉ា មកពីក្លិបកងពលតូចលេខ៧០ និងគូចុងក្រោយកីឡាករឡុង ផល្លា មកពីក្លិបសាលវ័ន្តកីឡា ប្រកួតជាមួយកីឡាករឃិត សុវណ្ណនិល មកពីក្លិបឃ្លាំងមឿងកីឡា ៕
ចែករំលែកព័តមាននេះ