ខេត្តកំពង់ចាម ៖ អគារសិក្សាថ្មីសន្លាង១ខ្នងមាន៥បន្ទប់ និងនិមិត្តរូបអគារសិក្សា និងបណ្ណាល័យចំនួន៩១ខ្នង ជាអំណោយអង្គការ Room to Read ត្រូវបានប្រារព្ធពិធីសម្ពោធដាក់ឱ្យប្រើប្រាស់កាលពីព្រឹកថ្ងៃទី២១ តុលា ២០១៥
ខេត្តកំពង់ចាម ៖ អគារសិក្សាថ្មីសន្លាង១ខ្នងមាន៥បន្ទប់ និងនិមិត្តរូបអគារសិក្សា និងបណ្ណាល័យចំនួន៩១ខ្នង ជាអំណោយអង្គការ Room to Read ត្រូវបានប្រារព្ធពិធីសម្ពោធដាក់ឱ្យប្រើប្រាស់កាលពីព្រឹកថ្ងៃទី២១ តុលា ២០១៥ នៅអនុវិទ្យាល័យ សូទិព្វ ស្ថិតក្នុងឃុំសូទិព្វ ស្រុកជើងព្រៃ ក្រោមអធិបតីភាពលោក ហ៊ាង ស៊ីណេ អនុរដ្ឋលេខាធិការក្រសួងអប់រំយុវជន និងកីឡា តំណាងលោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ ។ ពិធីនេះមានការចូលរួមពីសំណាក់ប្រជាពលរដ្ឋ សិស្សានុសិស្ស លោកគ្រូ អ្នកគ្រូ មន្ត្រីមកពីស្ថាប័ន មន្ទីរនានាជុំវិញខេត្តច្រើនកុះករ ថែមទាំងមានចែកកង់ជិត១០០គ្រឿងដល់សិស្សក្រីក្រផ្ទះនៅឆ្ងាយពីសាលារៀន រួមទាំងសម្លៀកបំពាក់ចំនួន២៤១កញ្ចប់ផងដែរ ។
លោក ឆាយ វ៉ាន់ស៊ី អភិបាលស្រុកជើងព្រៃ បានថ្លែងឲ្យដឹងថា នៅស្រុកជើងព្រៃមានសាលារៀនរដ្ឋចំនួន៥០សាលា ដែលរួមមានវិទ្យាល័យ៤កន្លែង មានសិស្សសរុប១.៧៨៩នាក់ (ស្រី៩៣៦នាក់) អនុវិទ្យាល័យ៨កន្លែង មានសិស្សសរុប៤.០៩៧នាក់ (ស្រី២.១១៩នាក់) សាលាបឋមសិក្សា៣៨កន្លែង មានសិស្សសរុប១៣.៦២៦នាក់ (ស្រី៦.៤៩២នាក់) មានអគារសិក្សា១២៦ខ្នងស្មើនឹង៥១៨បន្ទប់ ក្នុងនោះមានអគារអំណោយសម្តេចតេជោ និងសម្តេចកិត្តិព្រឹទ្ធបណ្ឌិត២០អគារ ស្មើនឹង១០៥បន្ទប់ ។
នាយកអង្គការ Room to read ប្រចាំកម្ពុជា លោក កាន់ កាល់ បានថ្លែងឲ្យដឹងថា ចាប់តាំងពីឆ្នាំ២០០៨ ដល់ឆ្នាំ២០១៥ ក្រោមកិច្ចសហការជាមួយនឹងមន្ទីរអប់រំខេត្តកំពង់ចាម អង្គការ Room to read បានរួមចំណែកពង្រឹងវិធីសាស្ត្រ ផ្តល់សម្ភាររៀន និងបង្រៀនអំណាន បណ្តុះបណ្តាលលើកទឹកចិត្ត និងឧបត្ថម្ភគាំទ្រលោកគ្រូ អ្នកគ្រូ ផ្តល់ និងជួសជុលអគារសិក្សា ដោយមិនរាប់បញ្ជូលខេត្តត្បូងឃ្មុំ ។សមិទ្ធផលសម្រេចបានបង្កើតបណ្ណាល័យនៅតាមសាលាបឋមសិក្សាក្នុងខេត្តកំពង់ចាមទាំងមូលបាន២៤៣បណ្ណាល័យ ដែលគិតជាទឹកប្រាក់ប្រហាក់ប្រហែល១.២៧៥.៧៥០ដុល្លារ សាងសង់អគារបណ្ណាល័យចំនួន៦៤ខ្នង គិតជាទឹកប្រាក់ប្រហាក់ប្រហែល៦៧២.០០០ដុល្លារ សាងសង់អគារសិក្សា១៦ខ្នង មាន៧០បន្ទប់ គិតជាទឹកប្រាក់ប្រហាក់ប្រហែល៦២៦.៥០០ដុល្លារ ផ្តល់សម្ភាររៀន និងបង្រៀន និងបណ្តុះបណ្តាលគ្រូថ្នាក់ទី១ គិតជាទឹកប្រាក់ប្រហាក់ប្រហែល៤៩.៥០០ដុល្លារ រួមនឹងសមិទ្ធផលផ្សេងៗទៀតជាច្រើន ។
លោក កៅ សុខអាន អភិបាលរងខេត្ត ថ្លែងឲ្យដឹងថា ស្ថិតក្នុងបរិបទកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសជាតិមានការអភិវឌ្ឍលើគ្រប់វិស័យ និងកំពុងមានការវិវត្តទៅមុខជាមួយកំណើនប្រកបដោយចីរភាពក្នុងរង្វង់ប្រមាណ៧%ក្នុង១ឆ្នាំ ។ ដោយឡែកវិស័យអប់រំ យុវជន និងកីឡា មានការរីកចម្រើនពាសពេញប្រទេស អាស្រ័យដោយរាជរដ្ឋាភិបាលកម្ពុជាបានយកចិត្តទុកដាក់ ព្រមទាំងជំរុញលើកទឹកចិត្តដល់លោកគ្រូ អ្នកគ្រូ បុគ្គលិកសិក្សា ឲ្យខិតខំបំពេញភារកិច្ចកាន់តែល្អប្រសើរ និងមានការរីកចម្រើនជឿនលឿនឆាប់រហ័សដូចបណ្តាប្រទេសនានាលើសាកលលោក ។
លោក ហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ឱ្យដឹងដែរថា ក្នុងរយៈពេល២ឆ្នាំនេះ ក្រសួងអប់រំ បានយកចិត្តទុកដាក់ក្នុងកំណែទម្រង់លើវិស័យអប់រំសិក្សាធិការឲ្យកាន់តែមានភាពប្រសើរឡើងពីមួយឆ្នាំទៅមួយឆ្នាំ ។ សម្រាប់គោលការណ៍សំខាន់ ក្មួយៗជាសិស្សានុសិស្សត្រូវតែខិតខំក្រេបយកចំណេះវិជ្ជាតាមរយៈការអានឲ្យបានច្រើន ព្រោះថា អង្គការ Room to read ជួយផ្តល់សៀវភៅ សម្រាប់អ្នកចូលចិត្តអានគឺសៀវភៅស្អាត តែបើអ្នកខ្ជិលវិញ សៀវភៅត្រូវរហែកក្រប និងគគ្រេចជាដើម ។ ជាមួយនោះក៏មានការប្រឡងអំណាន ហើយសម្រាប់អ្នកជាប់ចំណាត់ថ្នាក់នឹងទទួលបានរង្វាន់លើកទឹកចិត្តពីអង្គការនេះ ។
លោកអនុរដ្ឋលេខាធិការបញ្ជាក់ថា តាមការកត់សម្គាល់ គឺមិនមានបណ្ឌិតណាម្នាក់ដែលមិនបានឆ្លងកាត់ការអាននោះឡើយ ។ ក្មួយៗត្រូវប្រឹងប្រែងរៀនសូត្រឲ្យបានពូកែ ដើម្បីងាយសិក្សាភាសាបរទេស ហើយក៏ត្រូវតែបង្កើតមូលនិធិ «ស្ករគ្រាប់» ដោយសិស្សដែលធ្លាប់តែហូបស្ករគ្រាប់ ត្រូវលះបង់១ថ្ងៃយកថវិកាបដិភាគនោះដាក់ក្នុងហិបសម្រាប់ជួយដល់អ្នកក្រីក្រឲ្យបានបន្តការសិក្សាទៅមុខទៀត ៕
ចែករំលែកព័តមាននេះ