ខេត្តកំពង់ឆ្នាំង ៖ លោកនាយឧត្តមសេនីយ៍ គីម ប៊ុនថាន នាយករងខុទ្ទកាល័យសម្តេចតេជោ ហ៊ុន សែន និងជាអគ្គមេបញ្ជាការរង នៃកងយោធពលខេមរភូមិន្ទ កាលពីព្រឹកថ្ងៃទី១៦ ខែកក្កដា ឆ្នាំ២០១៥ បានចាត់រថយន្តកងទ័ព មួយគ្រឿងទៅដឹកជញ្ជូនសម្ភារក្រុមគ្រួសារយោធិនពិការឈ្មោះ ក្រឹម សា ពីភូមិស្រែចាន ឃុំក្បាលទឹក ស្រុកទឹកផុស ខេត្តកំពង់ឆ្នាំង ទៅកាន់មជ្ឈមណ្ឌលអភិវឌ្ឍន៍យោធិនពិការ៣១៧ កោះស្លា ស្ថិតក្នុងស្រុកឈូក ខេត្តកំពត ។
បេសកកម្មខាងលើនេះ គឺជាទឹកចិត្តដ៏ថ្លៃថ្លារបស់សម្តេចតេ ជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជួយដល់គ្រួសារយោធិនពិការរូបនោះ បន្ទាប់ពីបានត្អូញត្អែតាមទំព័រសារព័ត៌មាន «កោះសន្តិភាព» រៀបរាប់ថា គាត់ខ្វះដី ខ្វះលំនៅដ្ឋាន និងគ្មានប្រាក់របបកូនៗទាំង៦នាក់ ។
លោកនាយឧត្តមសេនីយ៍ គីម ប៊ុនថាន នាយករងខុទ្ទកាល័យសម្តេចតេជោ ហ៊ុន សែន បានមានប្រសាសន៍ថា សម្តេចតេជោ ហ៊ុន សែន និងសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន បានសម្រចផ្តល់ជូនតាមការទទូចសុំ របស់អតីតយទ្ឋជនពិការឈ្មោះ ក្រឹម សា ដែលចង់បានដីសម្បទានសង្គមកិច្ច និងផ្ទះ ព្រមជាមួយប្រាក់របបកូន ៦នាក់ ដោយសម្តេចបានផ្តល់ជូននូវផ្ទះមួយខ្នងទំហំ ៥ម៉ែត្រគុណ៧ម៉ែត្រ ធ្វើអំពីបេតុង ប្រក់ហ្ស៊ីប្រូស៊ីម៉ងត៍ ក្នុងនោះមានបង្គន់អនាម័យមួយ រួមនិងដីបង្កបង្កើនផលទំហំ ៤០ម៉ែត្រគុណ៣០០ម៉ែត្រ ដែលស្ថិតនៅក្នុង ទីតាំងមជ្ឈមណ្ឌលអភិវឌ្ឍន៍យោធិនពិការ៣១៧ កោះស្លា ស្ថិតក្នុងស្រុកឈូក ខេត្តកំពត ។
ជាមួយគ្នានេះដែរ សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈ លោកនាយឧត្តមសេនីយ៍ គីម ប៊ុនថាន បានផ្តល់ជូនថវិកាចំនួន៥ពាន់ដុល្លារសហរដ្ឋអាមេរិក ដល់គ្រួសារយោធិនពិការលោក ក្រឹម សា សំរាប់ដោះស្រាយបំណុលជំពាក់គេ និងបានផ្តល់ជូនគោលរបបប្រចាំខែនូវថវិកា៥០ម៉ឺនរៀល និងអង្ករ ៥០គីឡូក្រាម ចាប់ពីខែកក្កដា ឆ្នាំ២០១៥ នេះតទៅ ព្រមទាំងឧបត្ថម្ភបន្ថែមនូវគ្រឿងឧបភោគបរិភោគ និងសម្ភារមួយចំនួនទៀតដូចជា ចប កាំបិត ពូថៅ ឆ្នាំង ចាន ចង្ក្រាន កន្ទេល មុង ភួយ ធុងទឹក ពាងទឹក តបណ្តាញអគ្គិសនី និងឱ្យមជ្ឈមណ្ឌលអភិវឌ្ឍន៍យោធិនពិការកោះស្លា និងកងកម្លាំងកងពលតូចលេខ៣១ ជួយធ្វើការឈូសឆាយ ដាំស្វាយជូនគ្រួសារយោធិន ដែលទើបមកទទួលដី និងផ្ទះថ្មីនេះចំនួន១៥០ដើមផងដែរ ។
លោកនាយឧត្តមសេនីយ៍ គីម ប៊ុនថាន ក៏បានថ្លែងនូវការកោតសរសើរចំពោះមជ្ឈមណ្ឌល អភិវឌ្ឍន៍យោធិនពិការកោះស្លា និងកងកម្លាំងកងពលតូចលេខ៣១ ដែលបានយកចិត្តទុកដាក់ និងជួយអស់ពីកម្លាំងកាយចិត្តធ្វើការឈូសឆាយដី និងដាំស្វាយជូនគ្រួសារយោធិនពិការ ក្រឹម សា ដែលទើបមកតាំងទីលំនៅថ្មីនេះ ។ នាយឧត្តមសេនីយ៍ ក៏បានផ្តាំផ្ញើថ្នាក់ដឹកនាំមជ្ឈមណ្ឌលយោធិនពិការកោះស្លា ឲ្យជួយបង្កលក្ខណៈគ្រប់បែបយ៉ាងដល់គ្រួសារឈ្មោះ ក្រឹម សា រស់នៅជាមួយដូចយោធិនពិការទូទៅនៅតំបន់នេះផងដែរ ។
គ្រួសារយោធិនពិការ ក្រឹម សា ក្រោយពីបានទទួលផ្ទះ និងដីបង្កបង្កើនផល ក៏ដូចជាថវិកាដោះស្រាយបំណុលជំពាក់គេ និងគោលរបបប្រចាំខែ ព្រមទាំងសម្ភារជាច្រើនសន្ធឹកសន្ធាប់ ដែលជាអំណោយមិនអាចកាត់ថ្លៃបានរបស់សម្តេចទាំងពីររួចមក មានសេចក្តីរំភើបរីករាយឥតឧបមារកអ្វីថ្លែងឱ្យសមនឹងទឹកចិត្តដ៏ឧត្តុង្គឧត្តមថ្លៃថ្លា របស់សម្តេចដែលបានជួយឧបត្ថម្ភមកលើគ្រួសាររូបគាត់នាពេលនេះ ហើយបានលើកម្រាមដៃដប់ គោរពថ្លែងអំណរគុណយ៉ាងជ្រាលជ្រៅជាទីបំផុត ចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសូមបួងសួងដល់ទេវតា និងវត្ថុសក្តិសិទ្ធិក្នុងលោកទាំងអស់ សូមជួយបីបាច់ថែរក្សាសម្តេចទាំងពីរ បុត្រា បុត្រី និងចៅៗ របស់សម្តេចជួបប្រទះតែនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លាងឃ្លាតឡើយ ដើម្បីដឹកនាំប្រទេសជាតិឱ្យកាន់តែរីកចំរើន និងសុខសន្តិភាពជានិច្ចនិរន្តតរៀងទៅ ៕
ចែករំលែកព័តមាននេះ