រាជធានីភ្នំពេញ ៖ លោកកុយ ស៊ីឌឿន ដែលពេលនេះមានឱកាសក្លាយជាទីប្រឹក្សាក្រសួងព័ត៌មាន និងជាអតីតក្មេងកំព្រាដែលខំតស៊ូរៀនសូត្រ រហូតមានជីវភាពសមរម្យក្នុងជីវិតរស់នៅ។ ដោយសារតែនឹកឃើញពីភាពលំបាកនៃជីវិតកំព្រានាឱកាសខួបអាពាហ៍ពិពាហ៍គម្រប់១១ឆ្នាំ លោកបាននាំភរិយាអ្នកស្រីហួត សុភាព និងកូនៗ ព្រមទាំងសិល្បករមួយចំនួនចែកអំណោយផ្ទាល់ខ្លួនជូនដល់កុមារកំព្រារស់នៅមជ្ឈមណ្ឌលកៀនឃ្លាំង សង្កាត់ជ្រោយចង្វា រាជធានីភ្នំពេញ កាលពីព្រឹកថ្ងៃទី០៧ កក្កដា ២០១៥ កន្លងទៅ។
វត្តមានតារាចូលរួមនាឱកាសចែកអំណោយដល់បណ្តាកុមារកំព្រាជាង១០០នាក់ ដើម្បីអបអរខួបអាពាហ៍ពិពាហ៍គម្រប់១១ឆ្នាំ គេឃើញមានអ្នកនាងចាន់ តារាទី អ្នកស្រីហែម សុវណ្ណ កញ្ញាហេង ស្រីពេជ្រ លោកអ៊ឹម ជីវ៉ាជាដើម។ លោកកុយ ស៊ីឌឿន ដែលជាអតីតក្មេងកំព្រាធ្លាប់រស់នៅទីនោះ និងជាប្រធានក្លិបសិល្បៈឌីភី បានឲ្យដឹងថា លោក និងភរិយាអ្នកស្រីហួត សុភាព បានសម្រេចចិត្តច្បាស់ហើយថា នឹងរៀបចំកម្មវិធីចែកអំណោយដល់ប្អូនៗកុមារកំព្រានៅកៀនឃ្លាំងនេះ ចំពេលឱកាសគម្រប់ខួបអាពាហ៍ពិពាហ៍១១ឆ្នាំ ដែលបានចាប់ដៃគូគ្នាកសាងជីវិតថ្មីតាំងពីបាតដៃទទេ រហូតតស៊ូមានបានក្នុងកម្រិតជីវភាពរស់នៅសមរម្យដូចគេឯង។ លោកបន្តថា ដោយមិនចង់ចំណាយពេលចាយប្រាក់អត់ប្រយោជន៍ លោកបានចំណាយប្រាក់ទិញជាភួយ និងថវិកា១ម៉ឺនរៀល ចែកជូនក្មេងៗកំព្រា និងចាស់ទុំនៅតំបន់នេះ ដែលខំមើលថែរក្មេងៗ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ