ហេតុអ្វីបានជា ស៊ន សៀវម៉ី ល្បីជាង កែ ឡេង ?
រាជធានីភ្នំពេញ ៖ ជាប្រវត្តិសាស្ត្រតាំងពីដើមរៀងមកកម្ពុជាមិនដែលទទួលបានមេដាយមាសពីការចូលរួមប្រកួតកីឡាក្របខ័ណ្ឌអាស៊ី និងពិភពលោកទេ ដូចនេះវាជាកិត្តិយសខ្លាំងណាស់សម្រាប់
រាជធានីភ្នំពេញ ៖ ជាប្រវត្តិសាស្ត្រតាំងពីដើមរៀងមកកម្ពុជាមិនដែលទទួលបានមេដាយមាសពីការចូលរួមប្រកួតកីឡាក្របខ័ណ្ឌអាស៊ី និងពិភពលោកទេ ដូចនេះវាជាកិត្តិយសខ្លាំងណាស់សម្រាប់កម្ពុជាក្នុងសម័យតេជោសែន ដែលមានកីឡាការិនី២រូបមានសមត្ថភាពខ្ពស់ធ្វើឱ្យពិភពលោកភ្ញាក់ផ្អើលតាមរយៈការដណ្តើមបានមេដាយមាសជូនជាតិពីព្រឹត្តិការណ៍កីឡាដូចរៀបរាប់ខាងលើ ។
កីឡាការិនីទាំង២រូបដែលពេលនេះទទួលបានគោរមងារជា «វីរនារីកម្ពុជា» នោះ គឺកញ្ញា ស៊ន សៀវម៊ី ម្ចាស់ជ័យលាភីមេដាយមាសកីឡា ASIAN Games ឆ្នាំ២០១៤ ផ្នែកតេក្វាន់ដូ និងអ្នកស្រី កែ ឡេង ម្ចាស់ជ័យលាភីមេដាយមាសកីឡាប៉េតង់នារីពិភពលោកឆ្នាំ២០១៣ ។
ជាការតបស្នងដល់គុណបំណាច់ដ៏ធំធេងចំពោះជាតិរបស់កីឡាការិនីទាំង២រូប រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ ក្រៅពីផ្តល់ប្រាក់រង្វាន់ជាច្រើនម៉ឺនដុល្លារ ក៏បានរៀបចំពិធីទទួលជាពិសេសនៅវិមានសន្តិភាព ដោយមានការហែក្បួនយ៉ាងគគ្រឹកគគ្រេងថែមទៀតផង។ កញ្ញា ស៊ន សៀវម៉ី ត្រូវបានសម្តេចតេជោផ្តល់កិត្តិយសទទួលជួបសំណេះសំណាលនៅយប់ថ្ងៃទី៥ ឈានចូលថ្ងៃទី៦ តុលា ឆ្នាំ២០១៤ ចំណែកអ្នកស្រី កែ ឡេង នៅថ្ងៃទី៩ មេសា ឆ្នាំ២០១៥ ។
ការផ្តល់ជូននូវមហាកិត្តិយសពីសំណាក់រាជរដ្ឋាភិបាល ក៏ដូចជាប្រជាជនកម្ពុជា ធ្វើឱ្យកីឡាការិនីទាំង២រូបនេះមានឈ្មោះល្បីស្ទើរពាសពេញពិភពលោកតាមរយៈការចុះផ្សាយនៅលើទំព័រសារព័ត៌មានជាតិ និងអន្តរជាតិយ៉ាងព្រោងព្រាត ។ ទោះបីយ៉ាងណា មកដល់ពេលនេះមានការកត់សម្គាល់ឃើញថា កេរ្តិ៍ឈ្មោះកញ្ញា ស៊ន សៀវម៉ី ហាក់ល្បីជាងអ្នកស្រី កែ ឡេង ទោះបីអ្នកស្រី កែ ឡេង ដណ្តើមបានមេដាយមាសលំដាប់ថ្នាក់ពិភពលោកដែលមានកម្រិតធំជាងមេដាយមាសដែល ស៊ន សៀវម៉ី ដណ្តើមបានក្តី ។
ចំណុចនេះមតិមហាជនមួយចំនួនលើកឡើងថា អ្នកស្រី កែ ឡេង ល្បីមិនបានយូរដោយសារមិនមានប្រិយមិត្តក្នុងបណ្តាញសង្គម Facebook សរសេរសរសើរលើកពីស្នាដៃរបស់គាត់ ។ ខុសពី ស៊ន សៀវមុី ដែលមានការសរសេរកោតសរសើរលើកពីស្នាដៃដែលនាងដណ្តើមបានមិនដាច់ពីសំណាក់ប្រិយមិត្ត ដែលភាគច្រើនជាយុវវ័យនៅក្នុងបណ្តាញសង្គមដ៏មានប្រជាប្រិយភាពមួយនេះ ។ ជាមួយនេះ ភាពខុសគ្នារឿងវ័យ និងការរៀបចំពិធីទទួល និងដង្ហែមុន-ក្រោយគ្នា ក៏ត្រូវបានគេលើកឡើងថា បានជះឥទ្ធិពលដល់ភាពល្បីល្បាញរបស់វីរកីឡាការិនីទាំងពីររូបនេះដែរ ៕
ចែករំលែកព័តមាននេះ