ខេត្តព្រៃវែង ៖ ហេតុការណ៍ក្រុមសមត្ថកិច្ចដេញបា.ញ់រថយន្តដឹកស្រូវ ហើយចាប់អ្នកបើកបរម្នាក់ និងព្រូរថយន្តម្នាក់វាយធ្វើទារុណកម្មយ៉ាងសាហា.វឃោរឃៅ កាលពីថ្ងៃទី១៩ មីនាកន្លងទៅ នៅលើកំណាត់ផ្លូវជាតិ
ខេត្តព្រៃវែង ៖ ហេតុការណ៍ក្រុមសមត្ថកិច្ចដេញបាញ់រថយន្តដឹកស្រូវ ហើយចាប់អ្នកបើកបរម្នាក់ និងព្រូរថយន្តម្នាក់វាយធ្វើទារុណកម្មយ៉ាងសាហាវឃោរឃៅ «ទារុណកម្មដោយសាររថយន្តមិនព្រមចូលបង់ប្រាក់»កាលពីថ្ងៃទី១៩ មីនាកន្លងទៅ នៅលើកំណាត់ផ្លូវជាតិលេខ៨អា ក្នុងភូមិធ្នង់ ឃុំជាខ្លាំង ស្រុកស្វាយអន្ទរ ខេត្តព្រៃវែង បានធ្វើឱ្យមហាជនមានការចាប់អារម្មណ៍ និងចង់ដឹងជាខ្លាំងថាតើ សមត្ថកិច្ចណាខ្លះដែលជាជនដៃដល់ ហើយសកម្មភាពនេះស្ថិតក្រោមការបញ្ជារបស់អ្នកណា?
ដើម្បីស្វែងរកការពិតនៅក្នុងករណីនេះ លោកនាយឩត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេសបានបញ្ជាឱ្យក្រុមអធិការកិច្ចកងរាជអាវុធហត្ថដែលដឹកនាំដោយលោកឩត្តមសេនីយ៍ត្រី ស៊ឹង សុផានី មេបញ្ជាការរងកងរាជអាវុធហត្ថលើផ្ទៃប្រទេសចុះមកធ្វើការស៊ើបអង្កេតដោយផ្ទាល់លើបញ្ហានេះ។
ក្រុមអធិការកិច្ចនេះបានចាប់ផ្តើមធ្វើការស៊ើបអង្កេតពីស្រុកអូរាំងឳ ខេត្តត្បូងឃ្មុំ ដែលជាទីតាំងកើតហេតុដំបូង នៅថ្ងៃទី២៣ មីនា លុះស្អែកឡើងថ្ងៃទី២៤ មីនា បានបន្តចុះមកធ្វើការស៊ើបអង្កេតនៅខេត្តព្រៃវែងទៀត។ បន្ទាប់ពីប្រជុំផ្ទៃក្នុងជាមួយមន្ត្រីអាវុធហត្ថខេត្តព្រៃវែងរួច ក្រុមអធិការកិច្ចបានកោះហៅមន្ត្រីអាវុធហត្ថវរៈ៨០៨ ឱ្យចូលបំភ្លឺអំពីហេតុការណ៍ដែលបានកើតឡើងម្តងម្នាក់ៗ បន្ទាប់មកក៏បានកោះហៅជនរងគ្រោះទាំង២ ឱ្យចូលបំភ្លឺអស់រយៈពេលជាច្រើនម៉ោងផងដែរ។
ទោះជាយ៉ាងណាក៏ដោយ ក្នុងដំណើរការស៊ើបអង្កេតនេះក្រុមអ្នកសារព័ត៌មានមិនត្រូវបានគេអនុញ្ញាតឱ្យចូលយកព័ត៌មានទេ ហើយគេក៏មិនបញ្ជាក់ឱ្យដឹងដែរថា ការស៊ើបអង្កេតនេះទទួលបានលទ្ធផលយ៉ាងណានោះដែរ។
ជុំវិញបញ្ហានេះ បើទោះបីជាគ្មានការបំភ្លឺជាសាធារណៈពីសំណាក់មន្ត្រីអធិការកិច្ចទាំងនោះក៏ដោយ ប៉ុន្តែប្រភពព័ត៌មានពីសមត្ថកិច្ចមូលដ្ឋានបានបង្ហើបឱ្យកោះសន្តិភាពដឹងថា ជនដៃដល់ដែលជាប់ពាក់ព័ន្ធក្នុងរឿងដេញបាញ់ និងវាយធ្វើទារុណកម្មមកលើអ្នកបើកបររថយន្តដឹកស្រូវរួមជាមួយនិងព្រូម្នាក់ទៀតនោះ មកដល់ពេលនេះត្រូវបានគេស្គាល់អត្តសញ្ញាណអស់ហើយ។ ប្រភពដដែលនេះបានបញ្ជាក់ថា អ្នកដែលប្រើកាំភ្លើងបាញ់រះទៅលើរថយន្តដឹកស្រូវនោះ គឺជាកំលាំងអាវុធហត្ថវរៈ៨០៨របស់ខេត្តព្រៃវែង ចំណែកអ្នកដេញបាញ់ពីក្រោយចាប់ពីអូរាំងឳរហូតដល់ស្វាយអន្ទរ គឺជាកំលាំងអាវុធហត្ថស្រុកអូរាំងឳ ហើយអ្នកដែលប្រើជើងជាន់ក្បាលជនរងគ្រោះ គឺជាមេបញ្ជាការអាវុធហត្ថស្រុកអូរាំងឳ រីឯអ្នកប្រើស្នាប់កាំភ្លើងវាយជនរងគ្រោះបណ្តាលឱ្យបែកភ្នែកនោះ គឺជាមន្ត្រីប៉ូលិសសេដ្ឋកិច្ចឈ្មោះ ឃ្លីន ប្រចាំការនៅរង្វង់មូលស្វាយអន្ទរ និងអ្នកដែលរួមដៃព្រួតវាយធ្វើទារុណកម្មលើជនរងគ្រោះទាំង២នោះ គឺក្រុមជញ្ជីងចល័តខេត្តត្បូងឃ្មុំ និងគយខេត្តព្រៃវែងប្រចាំការនៅរង្វង់មូលស្វាយអន្ទរ។
ប្រភពពត៌មានច្បាស់ការណ៍ដែលទទួលបានពីសមត្ថកិច្ចខេត្តព្រៃវែង បានបញ្ជាក់ថា ការដែលកំលាំងអាវុធហត្ថវរៈ៨០៨ ចេញស្ទាក់ចាប់រថយន្តដឹកស្រូវខាងលើនេះ គឺដោយសារមានបញ្ជាពីលោកឩត្តមសេនីយ៍ សុខ គ្រីន មេបញ្ជាការកងរាជអាវុធហត្ថខេត្ត ដោយសង្ស័យថា រថយន្តនេះមានដឹកឈើប្រណីតខុសច្បាប់ ហើយការបាញ់រះទៅលើរថយន្តដឹកស្រូវនោះ គឺដោយសារតែពេលសមត្ថកិច្ចឃាត់ រថយន្តនោះមិនព្រមឈប់ ហើយថែមទាំងបើកបុករថយន្តសមត្ថកិច្ចដែលដាក់ស្ទាក់នៅកណ្តាលផ្លូវទៀត ទើបធ្វើឱ្យសមត្ថកិច្ចទាំងអស់ខឹង ហើយនាំគ្នាដេញបាញ់ និងចាប់វាយធ្វើទារុណកម្មតែម្តង៕
( រូបភាពក្រុមអធិការកិច្ចនៅក្នុងបញ្ជាការដ្ឋានអាវុធហត្ថខេត្តព្រៃវែង ) សុំ ពៅពិសិដ្ឋ ED29026
ចែករំលែកព័តមាននេះ