ខេត្តព្រៃវែង ៖ រថយន្តយីឌុបដឹកស្រូវ១គ្រឿង ត្រូវបានក្រុមសមត្ថកិច្ចចម្រុះខេត្តត្បូងឃ្មុំ និងខេត្តព្រៃវែង តាមប្រមាញ់ដូចដេញចាប់ចោរប្លន់ដោយមានការបាញ់សន្ធាប់អស់ប្រមាណជាង១០គ្រាប់ផងដែរ និងបានចាប់អ្នកបើកបររួមជាមួយព្រូឡានម្នាក់វាយដំទាត់ធាក់ឱ្យដេកផ្ទាល់ដីជាន់ក្បាលញិញដូចសត្វធាតុរហូតដល់សន្លប់ ទើបនាំយកទាំងមនុស្សនិងរថយន្តទៅប្រគល់ឱ្យអធិការដ្ឋាននគរបាលស្រុកស្វាយអន្ទរចាត់ការបន្ត ។
ហេតុការណ៍មហាអាក្រក់បំផុតនេះ បានកើតឡើង កាលពីវេលាម៉ោង១០យប់ថ្ងៃទី១៩ មីនា នៅតាមដងផ្លូវពីចំណុចក្បែរផ្សារអូររាំងឪ ស្រុកអូររាំងឪ ខេត្តត្បូងឃ្មុំ មកដល់ផ្លូវជាតិលេខ៨ ក្នុងឃុំជាខ្លាង ស្រុកស្វាយអន្ទរ ខេត្តព្រៃវែង ។
រថយន្តដែលត្រូវសមត្ថកិច្ចដេញតាមនិងមានការផ្ទុះអាវុធផងនោះ ជារថយន្តយីឌុបដឹកស្រូវខ្នាតយក្សពាក់ ស្លាកលេខកំពង់ចាម 3A -3419 បើកបរដោយឈ្មោះ ណេន ស៊ីដា ភេទប្រុស អាយុ៣០ឆ្នាំ និងព្រូឡានម្នាក់ទៀតដែលរួមដំណើរឈ្មោះ ធឿន ណើប ភេទប្រុស អាយុ២០ឆ្នាំ ។
ចំពោះមូលហេតុដែលនាំឱ្យមានការដេញប្រមាញ់រថយន្តដឹកស្រូវខាងលើនេះ ត្រូវបានសមត្ថកិច្ចមួយចំនួនអះអាងខុសៗគ្នា អ្នកខ្លះថាមកពីរថយន្តនេះបុកមនុស្សស្លាប់២នាក់ នៅកំពង់ចាមទើបសមត្ថកិច្ចដេញតាមចាប់ ។ អ្នកខ្លះទៀតថា មកពីរថយន្តនេះ បើកបុកបារាសសមត្ថកិច្ចដែលដាក់ត្រួតពិនិត្យអាវុធជាតិផ្ទុះនៅអូររាំងឪ។
រីឯសមត្ថកិច្ចខ្លះទៀតអះអាងថា មកពីរថយន្តនេះ បើកបុកបារាសក្រុមជញ្ជីងចល័តនៅចំណុចទួលទ្រា ថ្នល់ទទឹងទើបសមត្ថកិច្ចដេញតាមឃាត់ តែរថយន្តនេះមិនព្រមឈប់ទើបពួកគេដេញបាញ់គំរាមពីក្រោយឱ្យឈប់។ ទោះជាយ៉ាងណាក៏ដោយ ប្រភពទាំង៣ខាងលើនេះ មិនមានប្រភពណាមួយមានមូលដ្ឋានច្បាស់លាស់ដែលអាចយកជាការបាននោះទេ ប្រៀបដូចយកត្រូវខ្លួនឯង ។
ដោយឡែកជនរងគ្រោះ ណេន ស៊ីដា ដែលជាអ្នកបើកបររថយន្តដឹកស្រូវខាងលើបានឱ្យកោះសន្តិភាពដឹងថា ដោយសារតែរូបគេបើករថយន្តហួសមិនបានចូលបង់លុយឱ្យក្រុមជញ្ជីងដែលគេដាក់នៅចំណុចទួលទ្រា ក្នុងស្រុកអូររាំងឪ ខេត្តត្បូងឃ្មុំនោះ ទើបក្រុមជញ្ជីងបើករថយន្ត៤-៥គ្រឿងដេញតាមពីក្រោយ ហើយបាញ់ពីក្រោយ៤-៥គ្រាប់គំរាមឱ្យឈប់ធ្វើឱ្យរូបគេភ័យ បើករថយន្តរត់កាន់តែលឿន។ ពេលបើកហួសផ្សារអូររាំងឪ ក៏មានរថយន្តកាមរី ពណ៌ស១គ្រឿងចេញមកពាំងពីមុខរថយន្តរបស់គេទាំងប្រថុចញ៉ុច ធ្វើឱ្យគេចមិនទាន់ក៏បុកចំច្រមុះរថយន្តនោះផ្នែកខាងឆ្វេងពេញទំហឹង ។ ភ្លាមនោះអ្នកដែលយករថយន្តមកពាំងផ្លូវរួមជាមួយអ្នកដេញតាមពីក្រោយផង បានបាញ់សន្ធាប់មកលើរថយន្តរបស់គេ៣-៤គ្រាប់ទៀតធ្វើឱ្យគេកាន់តែភ័យ ក៏បើករថយន្តរត់បន្តទៀតរហូតមកដល់រង្វង់មូលស្វាយអន្ទរ ក៏មានរថយន្តប្រដេញរបស់កងរាជអាវុធហត្ថវរៈ៨០៨ខេត្តព្រៃវែង រួមជាមួយនឹងរថយន្ត៤-៥គ្រឿងទៀត បានចេញមកដេញរថយន្តរបស់គេ។ រថយន្តប្រដេញរបស់អាវុធហត្ថនោះ បានបើកវ៉ាមកខាងមុខរថយន្តរបស់គេ ហើយមនុស្ស៣នាក់បានអើតចេញតាមកញ្ចក់ទ្វារថយន្ត និងប្រើកាំភ្លើងអាកា បាញ់រះសន្ធាប់មកលើរថយន្តរបស់គេអស់៧-៨គ្រាប់ បណ្តាលឱ្យធ្លុះកញ្ចក់ខាងមុខដល់ជញ្ជាំងរថយន្តខាងក្រោយ ធ្វើឱ្យខ្លួននិងព្រូភ័យនាំគ្នាក្រាបក្រោមតាបឡូរថយន្តញ័រខ្លួនចំប្រប់ហើយក៏បញ្ឈប់រថយន្តលែងហ៊ានទៅមុខទៀត នៅចំណុចភូមិធ្នង់ ឃុំជាខ្លាង ស្រុកស្វាយអន្ទរ។
អ្នកបើកបររថយន្តដឹកស្រូវបានបន្តថា ពេលដែលឈប់រថយន្តភ្លាម ក្រុមសមត្ថកិច្ចដែលរួមមានអាវុធហត្ថ ប៉ូលិសសេដ្ឋកិច្ច មន្ត្រីគយ និងក្រុមជញ្ជីងប្រមាណជា៦-៧នាក់ បានចាប់ពួកគេទាំង២នាក់ចងនិងវាយទាត់ធាក់ដោយដៃនិងជើងផ្ទប់នឹងដី ព្រមទាំងស្នាប់កាំភ្លើងរហូតដល់សន្លប់ ហើយប្រមូលយកឯកសាររថយន្ត ព្រមទាំងលុយចំនួន៣លានរៀលនៅក្នុងរថយន្ត រួចទើបយកពួកគេទៅឃុំនៅអធិការដ្ឋាននគរបាលស្រុកស្វាយអន្ទរ ដោយមានកម្លាំងអាវុធហត្ថ និងប៉ូលិសជាច្រើននាក់នៅយាម ។ រហូតដល់ម៉ោងជាង១យប់ ទើបសមត្ថកិច្ចទាំងនោះ ស្រាយចំណងពីដៃនិងជើងពួកគេចេញ ហើយបន្ទាប់មកប៉ូលិស ប៉េអឹមក៏រំដោះខ្លួនចេញពីអធិការដ្ឋានស្រុកម្តងម្នាក់ៗរហូតបាត់អស់ ។ លុះព្រឹកឡើងទើបប៉ូលិសដោះលែងឱ្យពួកគេមានសេរីភាពវិញ ចង់ទៅណាទៅៗ… ប៉ុន្តែរថយន្តដឹកស្រូវត្រូវបានរក្សាទុកនៅប៉ុស្តិ៍រដ្ឋបាលស្វាយអន្ទរដដែល ។
ជនរងគ្រោះទាំង២នាក់បានបញ្ជាក់ថា រូបគេគ្រាន់តែមិនបានឈប់បង់លុយឱ្យក្រុមជញ្ជីងប៉ុណ្ណោះ តែក្រុមសមត្ថកិច្ចបែរជាដេញបាញ់រថយន្តរបស់ពួកគេតាំងពីស្រុកអូររាំងឪ ខេត្តត្បូងឃ្មុំ រហូតមកដល់ស្រុកស្វាយអន្ទរ ខេត្តព្រៃវែង និងចាប់វាយទាត់ធាក់ពួកគេយ៉ាង សាហាវព្រៃផ្សៃបំផុត ធ្វើដូចដេញបាញ់បង្ក្រាបក្រុមឧក្រិដ្ឋជន ឬក្រុមចោរប្លន់អ៊ីចឹង ។ ទង្វើសាហាវយង់ឃ្នងនេះគឺពួកគេមិនអាចទទួលយកបាននោះទេ ម្យ៉ាងទៀតការបាញ់សន្ធាប់នោះ គឺមិនបានបាញ់តម្រង់កង់ដើម្បីបញ្ឈប់រថយន្តនោះទេ គឺគេបាញ់តម្រង់រកកន្លែងដែលមានមនុស្សអង្គុយតែម្តង ដែលបង្ហាញឱ្យឃើញថា សមត្ថកិច្ចទាំងនោះមានចេតនាបាញ់់សម្លាប់ពួកគេ ទើបពួកគេនាំគ្នាធ្វើពាក្យបណ្តឹង ប្តឹងសុំឱ្យស្ថាប័នមានសមត្ថកិច្ចដែលពាក់ពន្ធ័ទាំងអស់ជួយចាត់វិធានការ និងរកយុត្តិធម៌ឱ្យពួកគេផង ។
ប៉ុន្តែអ្វីដែលគួរឱ្យកត់សម្គាល់នោះ លោក ស្រេង ជា ស្នងការនគរបាលខេត្តព្រៃវែង បានឱ្យដឹងថា សំណុំរឿងនេះលោកទុកឱ្យខាងកងរាជអាវុធហត្ថចរចាសម្របសម្រួលដោះស្រាយបញ្ចប់រឿងជាមួយនឹងជនរងគ្រោះទៅចុះ ។ ចំណែកលោកមិនឱ្យមន្ត្រីរបស់លោកចាត់ការអ្វីនោះទេ ។ លោកស្នងការមានប្រសាសន៍បែបនេះ មានន័យថា ខាងប៉ូលិសសុំរួចខ្លួន ទម្លាក់ឱ្យប៉េអឹមរងថ្មបាក់ទាំងស្រុង ។
រហូតមកដល់រសៀលថ្ងៃទី២២ មីនា ក្រុមសមត្ថកិច្ចប្រដាប់អាវុធដែលបានបាញ់ប្រហារបំបែកកញ្ចក់រថយន្តដឹកស្រូវធុនធំ១គ្រឿង នៅទឹកដីត្រើយខាងកើតទន្លេមេគង្គក្នុងស្រុកអូររាំងឪ ខេត្តត្បូងឃ្មុំ ដោយមិនទាន់អះអាងថា ជាស្មាដៃរបស់កងរាជអាវុធហត្ថត្បូងឃ្មុំ ឬកងរាជអាវុធហត្ថព្រៃវែងនៅឡើយទេ ជំនាញកំពុងតែធ្វើការស្រាវជ្រាវរកមូលហេតុពិត ។
លោកវរសេនីយ៍ឯក អ៊ិច សាន មេបញ្ជាការកងរាជអាវុធហត្ថខេត្តត្បូងឃ្មុំ បានឲ្យដឹងថា កាលពីយប់ថ្ងៃទី១៩ មីនា កន្លងទៅ មានរថយន្តដឹកស្រូវ១គ្រឿងធុនធំ បានបើកមកដល់ថ្នល់ទទឹង ក្នុងឃុំជុបស្រុកត្បូងឃ្មុំ មិនបានចូលថ្លឹងដើម្បីឲ្យដឹងពីទម្ងន់នោះទេ បានបើករត់គេចតាមផ្លូវជាតិលេខ១១ដល់ត្រង់ភូមិតាធម៌ ឃុំអំពិលតាពក ស្រុកអូររាំងឪក៏ទៅបុកប្រជាពលរដ្ឋចំនួន២នាក់បណ្តាលឲ្យរងរបួសធ្ងន់ម្នាក់និងស្រាលម្នាក់ ។ ខណៈនោះសាច់ញាតិអ្នករងគ្រោះ បានប្តឹងមកនគរបាលនិងអាវុធហត្ថស្រុកអូររាំងឪឲ្យជួយអន្តរាគមន៍ក៏បានដេញតាមចាប់រថយន្តដឹកស្រូវបង្កហេតុ ដោយពេលដេញបានចម្ងាយជាច្រើនគីឡូម៉ែត្រ មានរថយន្តស៊ីរែនរបស់អាវុធហត្ថព្រៃវែងចេញមកជួយក៏ត្រូវបានរថយន្តដឹកស្រូវបើកកៀរបណ្តាលឲ្យរងការខូចខាតផ្នែកខាងក្រោយ ។
លោកមេបញ្ជាការបានអះអាងថា បន្ទាប់មកក៏មានការផ្ទុះអាវុធបាញ់បំបែកកញ្ចក់រថយន្តដឹកស្រូវនៅក្នុងទឹកដីស្រុកស្វាយអន្ទរ ខេត្តព្រៃវែង ក៏ចាប់ចងអ្នកបើកបររថយន្តម្នាក់ រួមជាមួយព្រូម្នាក់ទៀត ។ ចំពោះករណីនេះរូបលោកជាមួយនឹងសហការីគ្រាន់តែចុះអង្កេតធ្វើរបាយការណ៍មួយ ។ ចំណែកអាវុធហត្ថព្រៃវែងក៏ធ្វើរបាយការណ៍មួយដែរ ដើម្បីដាក់ជូនអាវុធហត្ថផ្ទៃប្រទេសដែលចុះមកស្រាវជ្រាវថា មានហេតុផលយ៉ាងម៉េចបានរហូតឈានទៅបាញ់រថយន្តដឹកស្រូវបែបនេះ ?
លោកនាង សុវ៉ាត ប្រធានសមាគមសិទ្ធិមនុស្សអាដហុកប្រចាំខេត្តត្បូងឃ្មុំមានប្រសាសន៍ឲ្យដឹងដែរថា ដំបូងរថយន្តដឹកស្រូវខាងលើ បានបើកចេញពីម្តុំថ្នល់ទទឹង ស្រុកត្បូងឃ្មុំមានគេបញ្ចាំងភ្លើងពិលធ្វើសញ្ញាឲ្យឈប់តែរថយន្តមិនព្រមឈប់ ព្រោះជាកន្លែងស្ងាត់ ខ្លាចក្រែងមានជនណាមួយមកបន្លំធ្វើជាសមត្ថកិច្ច ដោយអ្នកបើកបររថយន្តដឹកស្រូវប្រឹងបើកទៅមុខក៏ជួបនឹងការបាញ់ប្រហារបំបែកកញ្ចក់រថយន្តក្នុងទឹកដីខេត្តព្រៃវែង ពីសំណាក់ក្រុមសមត្ថកិច្ច ទើបចាប់រថយន្តដឹកស្រូវនោះបាន ។ ការចាប់ខ្លួនវាយដំយ៉ាងឃោរឃៅ មើលតែគេចាប់ចោរ នេះកំពុងតែទទួលបានការរិះគន់ពីមហាជន ៕
ចែករំលែកព័តមាននេះ