រាជធានីភ្នំពេញ ៖ បើគ្មានអ្វីប្រែប្រួលនោះទេ សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន និងគណៈប្រតិភូជាន់ខ្ពស់អមដំណើរនឹងវិលនិវត្តន៍មកដល់ប្រទេសកម្ពុជាវិញនៅម៉ោង៨យប់ថ្ងៃទី២៦ មករា ២០១៥ បន្ទាប់ពីបានអញ្ជើញទៅចូលរួមកិច្ចប្រជុំប្រចំាឆ្នាំនៃវេទិកាសេដ្ឋកិច្ចពិភពលោកឆ្នាំ២០១៥ នៅទីក្រុងដាវ៉ូស-ក្លូស្ទ័រ ប្រទេសស្វីស ។
កិច្ចប្រជុំប្រចំាឆ្នាំនៃវេទិកាសេដ្ឋកិច្ចពិភពលោកឆ្នាំ២០១៥ នៅទីក្រុងដាវ៉ូស-ក្លូស្ទ័រ ប្រទេសស្វីស ដែលបានបា្ររព្ឋធ្វើពីថ្ងៃទី២១ដល់ថ្ងៃទី២៤ មករា បានពិភាក្សាទៅលើបញ្ហាសេដ្ឋកិច្ចថ្នាក់តំបន់និងពិភពលោកក្នុងបរិបទភូមិសាស្រ្តនយោបាយ និង សេដ្ឋកិច្ចដែលកំពុងវិវត្តន៍ជាសកល ក្នុងនោះសម្តេចតេជោក៍បានឡើងថ្លែងវេទិកាវិនិយោគក្រោមប្រធានបទ “កម្ពុជា៖សករាជថ្មីនៃកាលានុវត្តភាព កំណើន ការផ្លាស់ប្តូរ និងសមាហរណកម្មអាស៊ាន” ជូនដល់អ្នកវិនិយោគស្វីស ដើម្បីកៀរគមកដាក់ទុនរកស៊ីនៅកម្ពុជា។
សម្តេចតេជោ ហ៊ុន សែន , សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន និងគណៈប្រតិភូជាន់ខ្ពស់អមដំណើរបានចាកចេញពីកម្ពុជាកាលពីយប់ថ្ងៃទី២០ មករា ហើយក្រៅពីចូលរួមក្នុងវេទិកាខាងលើ សម្តេចនាយករដ្ឋមន្រ្តីនិងសម្តេចកិត្តិព្រឹទ្ឋបណ្ឌិត បានទទួលជួបសំណេះសំណាលជាមួយប្រជាពលរដ្ឋខ្មែរដែលរស់នៅក្នុងប្រទេសស្វីសផងដែរ ៕
ចែករំលែកព័តមាននេះ