រាជធានីភ្នំពេញ ៖ អ្នកប្រដាល់មកពីក្លិបសាលវ័ន្តកីឡា ធី តុងហ៊ី ក្រៅពីមិនទទួលបានប្រាក់តម្លៃខ្លួនអាចទទួលរងនូវការដាក់ពិន័យ៦សប្តាហ៍ថែមទៀតផង បន្ទាប់ពីត្រូវគណៈកម្មការរៀបចំការប្រកួតចោទប្រកាន់ថាលក់ការប្រកួតនៅពេលជួបប្រកួតជាមួយ ពុធ ឆាយរិទ្ធី មកពីក្លិបពុទ្ធសេរីវង្សព្រែកតាទែន នៅលើសង្វៀនទូរទស្សន៍រាជធានីភ្នំពេញប៉ុស្តិ៍លេខ៣ កាលពីថ្ងៃអាទិត្យ ទី២១ ធ្នូ កន្លងមកនេះ ។
ធី តុងហ៊ី ត្រូវ ពុធ ឆាយរិទ្ធី វាយឱ្យសន្លប់នៅត្រឹមទឹកទី២ ខណៈដែលការវាយត្រូវនោះមិនធ្ងន់ធ្ងររហូតដល់ថ្នាក់អាចឱ្យសន្លប់បាន ទើបគណៈកម្មការប្រកួតចោទប្រកាន់ថា ធី តុងហ៊ លក់ការប្រកួតយ៉ាងពិតប្រាកដ ។ នៅក្នុងទឹកទី១ ធី តុងហ៊ី ត្រូវលោកអាជ្ញាកណ្តាល ងួន និត ព្រមានមួយលើកជា២លើក ដោយសារគេហាក់បណ្តោយឱ្យគូប្រកួតវាយដោយគ្មានការតបត ប៉ុន្តែការព្រមាននេះហាក់គ្មានប្រសិទ្ធភាពសោះ។ លុះចូលដល់ទឹកទី២ ធី តុងហុី បានបណ្តោយឱ្យ ពុធ ឆាយរិទ្ធី ទាត់ចូលពោះទឹកមួយជើង ហើយក៏ដួលសន្លប់ស្តូកនៅលើសង្វៀនតែម្តង ។ ទង្វើរបស់ ធី តុងហុី បានធ្វើឱ្យលោក ទី រ៉ាណាត អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍ប៉ុស្តិ៍លេខ៣ មិនសប្បាយចិត្តឡើយដោយសារធ្វើឱ្យខូចកម្មវិធីរបស់លោក។ តាមច្បាប់សហព័ន្ធកីឡាប្រដាល់ កីឡាករដែលធ្វើឱ្យមានកំហុសលើកទី១ ក្រៅពីមិនទទួលបានប្រាក់តម្លៃខ្លួន គឺត្រូវទទួលពិន័យមិនឱ្យឡើងសង្វៀនប្រកួតរយៈពេល៦សប្តាហ៍ បើមិនរាងចាល គឺលែងឱ្យឡើងសង្វៀនប្រកួតតែម្តង។ ដូច្នេះចំពោះកំហុស ធី តុងហ៊ី អាចនឹងទទួលការដាក់ពិន័យរយៈពេល១ខែកន្លះ និងមិនទទួលបានប្រាក់តម្លៃខ្លួន ឯ ពុធ ឆាយរិទ្ធី ដែលគ្មានកំហុស គឺទទួលបានប្រាក់តម្លៃខ្លួនជាធម្មតា ។
ចំណែកការប្រកួតគូផ្សេង ផន ផល្លា មកពីក្លិបតាព្រហ្មមានជ័យបង្ក្រាបគ្រឿងញៀន ដែលពីមុនមានឈ្មោះថា វង្ស គង់រាជ បានផ្តួល សុខ វាសនា មកពីក្លិបឃ្លាំងមឿងកីឡាខេត្តពោធិ៍សាត់ ឱ្យសន្លប់នៅត្រឹមទឹកទី៣ ។ ខឹក សុខឿន មកពីក្លិបកងពលតូចឆត្រយោង៩១១ ចំណាយពេលតែមួយទឹកប៉ុណ្ណោះក្នុងការផ្តួល ឈាង ឡុង មកពីក្លិបអេភូថងកីឡា ។ ងួន គារ មកពីក្លិបតាឡីដំរីមានឫទ្ធិ បានយកឈ្នះ ស៊ឹម សំ មកពីក្លិបកុមារទេពមានរិទ្ធ ដោយពិន្ទុ និងឃៀង វាសនា មកពីក្លិបតាព្រហ្មមានជ័យបង្ក្រាបគ្រឿងញៀន ឈ្នះពិន្ទុ ធូ សេងថៃ មកពីក្លិបខ្លារខិនមានឫទ្ធិ ៕
ចែករំលែកព័តមាននេះ