រាជធានីភ្នំពេញ ៖ កីឡា៤ប្រភេទរបស់កម្ពុជានឹងមានវត្តមានក្នុងព្រឹត្តិការណ៍កីឡាសាកលវិទ្យាល័យអាស៊ានលើកទី១៧ (17th ASEAN University Games) នៅប្រទេសឥណ្ឌូណេស៊ី នាដើមខែក្រោយ នេះបើយោងតាមការឱ្យដឹងពីសហព័ន្ធកីឡានិស្សិតសាកលវិទ្យាល័យកម្ពុជា ដែលបានប្រកាសកាលពីពេលថ្មីៗកន្លងមកនេះ ។
រាជធានីភ្នំពេញ ៖ កីឡា៤ប្រភេទរបស់កម្ពុជានឹងមានវត្តមានក្នុងព្រឹត្តិការណ៍កីឡាសាកលវិទ្យាល័យអាស៊ានលើកទី១៧ (17th ASEAN University Games) នៅប្រទេសឥណ្ឌូណេស៊ី នាដើមខែក្រោយ នេះបើយោងតាមការឱ្យដឹងពីសហព័ន្ធកីឡានិស្សិតសាកលវិទ្យាល័យកម្ពុជា ដែលបានប្រកាសកាលពីពេលថ្មីៗកន្លងមកនេះ ។ លោកអ៊ុក សិទ្ធិជាតិ អគ្គនាយកនៃអគ្គនាយកដ្ឋានអប់រំកាយ និងកីឡាធ្លាប់បានមានប្រសាសន៍ក្នុងអំឡុងការរង់ចាំទទួលប្រតិភូកីឡា ដែលបានវិលត្រឡប់ពីការចូលរួមប្រកួតកីឡាឆ្នេរខ្សាច់នៅប្រទេសថៃកន្លងមកថា នៅដើមខែក្រោយនេះ កម្ពុជានឹងបញ្ជូនកីឡាចំនួន៤ប្រភេទមានដូចជាកីឡាប៉េតង់, បាល់ទាត់, តេក្វាន់ដូ និងវាយកូនឃ្លីលើតុទៅចូលរួមប្រកួតកីឡានិស្សិតក្របខ័ណ្ឌអាស៊ានដែលរៀបចំធ្វើនៅក្នុងប្រទេសឥណ្ឌូណេស៊ី ដែលការប្រកួតនឹងត្រូវចាប់ផ្តើមពីថ្ងៃទី១០ ដល់ថ្ងៃទី២១ ខែធ្នូ ឆ្នាំ២០១៤ ។
លោកបញ្ជាក់ថា ការប្រកួតកីឡាសាកលវិទ្យាល័យអាស៊ានលើកទី១៧ ឆ្នាំនេះ គឺមិនអាចបន្លំដូចឆ្នាំមុនៗឡើយ គឺគណៈកម្មការរៀបចំតម្រូវឱ្យកីឡាករដែលត្រូវចូលរួម គឺជានិស្សិតពិតប្រាកដតែម្តង ដោយមិនមែនយកកីឡាករអាជីព ហើយមិនមែនជានិស្សិតមកឱ្យចូលរួមទេ បើមិនដូច្នេះទេ គេនឹងមិនឱ្យចូលរួមនោះឡើយ។ លោកព្រំ ប៊ុណ្ណយី អគ្គនាយករងកីឡា និងជាអគ្គលេខាធិការសហព័ន្ធកីឡានិស្សិត គឺជាអ្នកដឹកនាំប្រតិភូ និងគ្រប់គ្រងកីឡានិស្សិតសម្រាប់ចូលរួមការប្រកួត ។
គួរបញ្ជាក់ថា ព្រឹត្តិការណ៍ 16th ASEAN University Games លើកទី១៦ នៅប្រទេសឡាវឆ្នាំ២០១២ កម្ពុជាបានបញ្ជូនកីឡាចំនួន៥ប្រភេទទៅចូលរួមប្រកួត គឺអត្តពលកម្ម, ប៉េតង់, តេក្វាន់ដូ, យូដូ និងវាយកូនបាល់ ។ កាលនោះកម្ពុជាដណ្តើមបានមេដាយសំរឹទ្ធចំនួន៨គ្រឿង គឺប៉េតង់៣គ្រឿង, តេក្វាន់ដូ២គ្រឿង, យូដូ២គ្រឿង និងវាយកូនបាល់១គ្រឿង ។ សម្រាប់ឆ្នាំនេះក្នុងចំណោមប្រភេទកីឡាទាំង៤ប្រភេទរបស់កម្ពុជានោះមានតែខេមរសហព័ន្ធកីឡាតេក្វាន់ដូកម្ពុជាបុ៉ណ្ណោះ ដែលបានបង្ហើបឱ្យដឹងពីសមាសភាពកីឡាករតេក្វាន់ដូចំនួន៣រូប ដែលត្រូវទៅចូលរួម ។ កីឡាករទាំង៣រូបនោះសុទ្ធតែជាកីឡាករតេក្វាន់ដូស្ទីល W.T.F (World Tae Kwon do Federationp) របស់សាធារណរដ្ឋកូរ៉េ ដែលជាប្រភេទកីឡាអូឡាំពិក ។ ក្នុងនោះមានកីឡាកររិន ប៊ុនហួត ដែលត្រូវប្រកួតលើប្រភេទទម្ងន់ក្រោម៥៤គីឡូក្រាម, កីឡាករប៉ាន់ ខេមរា ប្រកួតប្រភេទទម្ងន់ក្រោម៥៨គីឡូក្រាម និងកីឡាករថាន់ រិទ្ធី ប្រកួតប្រភេទទម្ងន់ក្រោម៦៨គីឡូក្រាម ដែលសព្វថ្ងៃពួកគេកំពុងហ្វឹកហាត់ជាប្រចាំ ។
សូមរំលឹកផងដែរថា ការប្រកួតកីឡានិស្សិតសាកលវិទ្យាល័យអាស៊ាននេះ គឺចាប់ផ្តើមមានតាំងពីឆ្នាំ១៩៨១ មកម្ល៉េះ ដែលការប្រកួតលើកទី១ គឺធ្វើឡើងនៅប្រទេសថៃ ក្នុងខេត្តឈៀងម៉ៃ ។ លើកទី២ ឆ្នាំ១៩៨២ ធ្វើនៅទីក្រុងហ្សាការតា ប្រទេសឥណ្ឌូណេស៊ី, លើកទី៣ ឆ្នាំ១៩៨៤ ធ្វើនៅទីក្រុង Bangi ប្រទេសម៉ាឡេស៊ី, លើកទី៤ ឆ្នាំ១៩៨៦ ធ្វើនៅសិង្ហបុរី, លើកទី៥ ឆ្នាំ១៩៨៨ ធ្វើនៅទីក្រុងប៉ាតាយ៉ា ប្រទេសថៃ, លើកទី៦ ឆ្នាំ១៩៩០ ធ្វើនៅទីក្រុង Bandung ប្រទេសឥណ្ឌូណេស៊ី, លើកទី៧ ឆ្នាំ១៩៩៣ ធ្វើនៅ Shah Alam ប្រទេសម៉ាឡេស៊ី, លើកទី៨ ឆ្នាំ១៩៩៤ ធ្វើនៅសិង្ហបុរី, លើកទី៩ ឆ្នាំ១៩៩៦ ធ្វើនៅទីក្រុង Banda Seri Begawan ប្រទេសព្រុយណេ, លើកទី១០ ឆ្នាំ១៩៩៩ ធ្វើនៅទីក្រុងបាងកក ប្រទេសថៃ, លើកទី១១ ឆ្នាំ២០០២ ធ្វើនៅទីក្រុងម៉ានីល ប្រទេសហ្វ៊ីលីពីន, លើកទី១២ ឆ្នាំ២០០៤ ធ្វើនៅទីក្រុង Surabaya ប្រទេសឥណ្ឌូណេស៊ី, លើកទី១៣ ឆ្នាំ២០០៦ ធ្វើនៅទីក្រុងហាណូយ ប្រទេសវៀតណាម, លើកទី១៤ ឆ្នាំ២០០៨ ធ្វើនៅទីក្រុងគូឡាឡាំពួរ ប្រទេសម៉ាឡេស៊ី, លើកទី១៥ ឆ្នាំ២០១០ ធ្វើនៅទីក្រុងឈៀងម៉ៃ ប្រទេសថៃ, លើកទី១៦ ឆ្នាំ២០១២ ធ្វើនៅទីក្រុងវៀងច័ន្ទន៍ ប្រទេសឡាវ និងលើកទី១៧ ឆ្នាំ២០១៤នេះ ធ្វើនៅទីក្រុង Palembang ប្រទេសឥណ្ឌូណេស៊ី ។
ចាំមើល ការចូលរួមលើកនេះ តើកម្ពុជាដណ្តើមបានមេដាយបុ៉ន្មានត្រឡប់មកវិញ ?
ចែករំលែកព័តមាននេះ