រាជធានីភ្នំពេញ ៖ ជនជាប់ចោទជាអតីតមន្ត្រីនគរបាលស័ក្តិ៥ និងជាអតីតជំនួយការមន្ត្រីជាន់ខ្ពស់ក្រសួងមហាផ្ទៃម្នាក់ ដែលត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ រយៈពេល១ឆ្នាំ កន្លងទៅ ពីបទឆបោកប្រាក់ពីជនជាតិចិនចំនួន៣៨០០០ដុល្លារ ពាក់ព័ន្ឋនឹងជួយរត់ការបានចូលសញ្ជាតិខ្មែរនោះ នៅព្រឹកថ្ងៃទី១៧ កញ្ញា អនុរក្សពន្ធនាគារ បាននាំជនជាប់ចោទរូបនេះ មកសាលាដំបូងរាជធានីភ្នំពេញម្តងទៀត ដើម្បីបើកសវនាការជំនុំជម្រះពីបទឆបោកប្រាក់ជនជាតិខ្មែរចំនួន១៧.០០០ដុល្លារ ពាក់ព័ន្ធនឹងជួយរត់ការបានចូលសញ្ជាតិខ្មែរ។ ប៉ុន្តែសាលក្រមនេះត្រូវប្រកាសនៅថ្ងៃទី៨ តុលា ២០១៤ ខាងមុខវិញ។
លោក ជា សុខហៀង ជាចៅក្រមជំនុំជម្រះ បានថ្លែងថា ជនជាប់ចោទឈ្មោះសួង វាសនា ភេទប្រុស អាយុ៥៤ឆ្នាំ ត្រូវបានតំណាងអយ្យការចោទប្រកាន់ពីបទឆបោក តាមមាត្រា៣៧៧ និង៣៧៨ នៃក្រមព្រហ្មទណ្ឌ និងត្រូវសមត្ថកិច្ចនគរបាលនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃឃាត់ខ្លួនកាលពីថ្ងៃទី២៤ ធ្នូ ២០១៣ ដោយយោងលើពាក្យបណ្តឹងរបស់ឈ្មោះសេង គង់។
ក្នុងពាក្យបណ្តឹងបានបញ្ជាក់ថា កាលពីអំឡុងឆ្នាំ២០១២ កន្លងទៅ ឈ្មោះសេង គង់ បានទៅពឹងពាក់ឈ្មោះ សួង វាសនា ឱ្យជួយរត់ការបញ្ចូលសញ្ជាតិខ្មែរទៅឱ្យជនជាតិចិន២នាក់ ដោយក្នុងម្នាក់ត្រូវបង់ប្រាក់ទៅឈ្មោះសួង វាសនា ចំនួនមួយម៉ឺនដុល្លារ។ បន្ទាប់ពីការចរចា ឈ្មោះសេង គង់ បានប្រគល់ប្រាក់ឱ្យឈ្មោះសួង វាសនា ចំនួន១៧.០០០ដុល្លារ និងឯកសារពាក់ព័ន្ធមួយចំនួនដើម្បីរត់ការបញ្ចូលសញ្ជាតិខ្មែរ ។ ក្នុងនោះឈ្មោះសួង វាសនា បានសន្យាចំនួន៤សប្តាហ៍នឹងជួយរត់ការបានសម្រេច បើមិនសម្រេចនឹងសងប្រាក់ជូនវិញ។ លើសពីនេះទៀតឈ្មោះសួង វាសនា បានអះអាងថា ខ្លួនជាមន្ត្រីនៅក្រសួងមហាផ្ទៃ និងជាជំនួយការមន្ត្រីជាន់ខ្ពស់ថែមទៀតផង ដែលជាហេតុធ្វើឱ្យដើមបណ្តឹង មានការជឿទុកចិត្ត។ ប៉ុន្តែដល់ពេលកំណត់ឈ្មោះសួង វាសនា បែរជារត់គេចខ្លួន ទើបធ្វើឱ្យដើមបណ្តឹងដាក់ពាក្យប្តឹងតែម្តង។
ចំណែកឈ្មោះសួង វាសនា បានបញ្ជាក់ប្រាប់តុលាការថា គាត់ពិតជាបានទទួលប្រាក់ពីឈ្មោះសេង គង់ ចំនួន១៧.០០០ដុល្លារមែន ហើយប្រាក់ទាំងនោះគាត់បានយកទៅរត់ការអស់ហើយ។ ប៉ុន្តែដោយសារដើមបណ្តឹងខ្វះឯកសារ ទើបរត់ការពុំបានជោគជ័យ ហើយគាត់ក៏បានសងប្រាក់ចំនួន៧០០០ដុល្លារដល់ដើមបណ្តឹងវិញដែរ។ ដូច្នេះសូមឱ្យតុលាការ លើកលែងការចោទប្រកាន់ និងដោះលែងឱ្យមានសេរីភាពវិញ ៕
ចែករំលែកព័តមាននេះ