រាជធានីភ្នំពេញ ៖ ស្ត្រីមេម៉ាយដែលមានកូនរហូត៥នាក់ក្នុងបន្ទុក បានលើកដៃសំពះសុំឱ្យសប្បុរសជនជួយឧបត្ថម្ភ ខណៈដែលនាងកំពុងប្រឈមនឹងការខ្វះខាតចំពោះមុខក្នុងការទិញអាហារចិញ្ចឹមកូន ដោយសារតែបាត់បង់ការងារមិនមានលទ្ធភាពរកប្រាក់កំរៃបាន។ ស្ត្រីរូបនេះបាននិយាយថា នាងឈ្មោះឡាំង បុប្ផា អាយុ៣៥ឆ្នាំ មានកូនស្រី៥នាក់ និងមានស្រុកកំណើតក្នុងភូមិភ្នំ ឃុំកំពង់ភ្នំ ស្រុកលើកដែក ខេត្តកណ្តាល។ ប្តីរបស់នាងឈ្មោះស៊ឺ លីហៀង អាយុ៥៥ឆ្នាំ បានចុះចោលនាងទៅមានស្រីថ្មីទៀត តាំងពីឆ្នាំ២០០៨មកម៉្លេះ ខណៈពេលនោះនាងមានផ្ទៃពោះកូនស្រីពៅ។ ស្ត្រីរូបនេះបានបន្តទៀតថា ក្រោយពេលប្តីចាកចោលនាងបានចាកចេញពីស្រុកកំណើតមកស្នាក់នៅបន្ទប់លេខ៦ ផ្ទះជួល អគារលេខ៥៤ សួនឧស្សាហកម្មកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌដង្កោ ដោយធ្វើជាសន្តិសុខយាមរោងចក្រ។
ស្ត្រីរូបនេះបានបន្តទៀតថា ផ្ទះជួលដែលនាងស្នាក់នៅ១ខែ ១៥ដុល្លារ បូករួមជាមួយថ្លៃទឹក និងថ្លៃភ្លើងផង១ខែអស់ជាង២០ដុល្លារ ប៉ុន្តែដោយសារនាងគ្មានលទ្ធភាពទើបពេលដល់ខែម្តងៗគ្មានលុយឱ្យថ្លៃជួលផ្ទះ ឯម្ចាស់ផ្ទះស្ទើរតែលែងចង់ឱ្យស្នាក់នៅទៅហើយ តែក្តីអាណិតតែងមេត្តាសន្តោសដល់នាងថែមទៀត។ នៅរសៀលថ្ងៃទី២១ វិច្ឆិកា កោះសន្តិភាពបានពាំនាំថវិកាអំណោយចំនួន៨ម៉ឺនរៀលទៅប្រគល់ដល់ស្ត្រីមេម៉ាយរូបនេះ ដើម្បីដោះទ័លមួយគ្រា ដែលពេលទៅដល់នោះ កូនៗរបស់នាងមិនបាននៅជុំគ្នាទេ។ ប្រាក់អំណោយគឺបានទទួលពី ១-លោកចាន់ ណារ៉ា ផ្ទះលេខ «ក២» ផ្លូវលេខ៥៣ សង្កាត់បឹងទំពុន ខណ្ឌមានជ័យ ឧបត្ថម្ភ៦ម៉ឺនរៀល ២-លោកសេង គី ផ្ទះលក់ទាខ្វៃ ច្បារអំពៅ១ ផ្ទះលេខ៤០Eo ផ្លូវជាតិលេខ១ ខណ្ឌមានជ័យ ឧបត្ថម្ភ២ម៉ឺនរៀល។ លោកក៏បានផ្តល់២ម៉ឺនរៀលផងដែរតាមរយៈកោះសន្តិភាព ជូនដល់អតីតគ្រូបង្រៀនរងគ្រោះនៅខេត្តកំពង់ឆ្នាំង។ កោះសន្តិភាព សូមថ្លែងអំណរគុណចំពោះការបរិច្ចាគប្រាក់មនុស្សធម៌នេះដែលជាកាយវិការគួរឱ្យគោរពបំផុត៕
ចែករំលែកព័តមាននេះ