ខេត្តព្រៃវែង ៖ ជនសង្ស័យចំនួន៨នាក់ ត្រូវបានចាប់ខ្លួនជាបន្តបន្ទាប់ និងម្នាក់ទៀត រត់គេចខ្លួនបាត់ បន្ទាប់ពីសមត្ថកិច្ចស្រាវជ្រាវរកឃើញថា ជនសង្ស័យទាំង៩នាក់ បានរួមគ្នាធ្វើសកម្មភាពវាយសម្លាប់បុរសម្នាក់ប្លន់យកម៉ូតូ១គ្រឿង កាលពីវេលាម៉ោងជាង៨យប់ ថ្ងៃទី៨ មេសា នៅលើផ្លូវខ្នងទំនប់មួយកន្លែងក្បែរស្ពានទួលក្តួច ស្ថិតក្នុងភូមិព្រៃខ្មៅ ឃុំកន្សោមអក ស្រុកកំពង់ត្របែក ។
លោកវរសេនីយ៍ឯក សេង សុភ័ក្ត្រ ស្នងការរងនគរបាលខេត្ត បានឱ្យដឹងថា ជនរងគ្រោះឈ្មោះ កាន់ ម៉ៅ អាយុ២៤ឆ្នាំ មានទីលំនៅក្នុងភូមិព្រៃស្នួល ឃុំគោកខ្ចក ស្រុកកំពង់ត្របែក ត្រូវបានក្រុមជនល្មើសយកដុំថ្មវាយចំក្បាល បណ្តាលឱ្យបែកផុងលលាដ៍ និងព្រួតវាយទាត់ធាក់រហូតសន្លប់ ទើបសែងយកទៅទម្លាក់ទឹកពីលើស្ពានទួលក្តួច ។ លុះមួយសន្ទុះក្រោយមកក៏ចុះទៅស្រង់មកវិញ ពិនិត្យមើលដឹងថាស្លាប់ហើយ ទើបនាំគ្នាដឹកយកទៅទម្លាក់ចោលនៅចំណុចផ្លូវខ្នងទំនប់ក្បែរស្ពានតារទេះសេះ ដែលមានចម្ងាយប្រមាណ១គីទ្បូម៉ែត្រពីកន្លែងកើតហេតុ ។
ក្រោយពីធ្វើសកម្មភាពវាយសម្លាប់ជនរងគ្រោះហើយ ក្រុមជនល្មើសបានយកម៉ូតូជនរងគ្រោះម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០០៥ ពាក់ស្លាកលេខតាកែវ ១A-០៦២៥ ជិះយកទៅបាត់ ឯអ្នកខ្លះនាំគ្នាដើរទៅដេកនៅផ្ទះវិញ ធ្វើដូចមិនមានរឿងអ្វីកើតទ្បើងទាល់តែសោះ ។ លុះព្រឹកទ្បើងវេលាម៉ោងជាង៦ ក៏មានអ្នកស្រុកប្រទះឃើញសពជនរងគ្រោះ និងរាយការណ៍មកសមត្ថកិច្ចចុះទៅត្រួតពិនិត្យកន្លែងកើតហេតុ ទើបមានការភ្ញាក់ផ្អើលដឹងថា មានករណីប្លន់សម្លាប់កើតទ្បើង ។
លោកវរសេនីយ៍ឯក សេង សុភ័ក្ត្រ បញ្ជាក់ថា ក្រោយពីទទួលបានព័ត៌មានពីករណីប្លន់សម្លាប់នេះភ្លាម រូបលោកនិងលោកវរសេនីយ៍ត្រី អ៊ុំ ចំរើន អធិការនគរបាលស្រុកកំពង់ត្របែក បានដឹកនាំកម្លាំងចុះទៅធ្វើការស្រាវជ្រាវយ៉ាងល្អិតល្អន់ ។ តាមរយៈវត្ថុតាងនៅលើខ្លួនប្រាណសព និងស្លាកស្នាមកន្លែងកើតហេតុ រហូតដល់ល្ងាចថ្ងៃដដែលនោះ ក៏កំណត់បានមុខសញ្ញាជនសង្ស័យម្នាក់ឈ្មោះ នៅ វ៉ា ភេទប្រុស អាយុ៤៤ឆ្នាំ និងបាននាំខ្លួនមកធ្វើការសាកសួរនៅអធិការដ្ឋាននគរបាលស្រុក ។
តាមរយៈចម្លើយសារភាពរបស់ឈ្មោះ នៅ វ៉ា គួបផ្សំជាមួយវត្ថុតាងដែលរកបាននៅកន្លែងកើតហេតុផងនោះ ទើបឈានទៅដល់ការចាប់ខ្លួនបក្សពួកជនល្មើសជាបន្តបន្ទាប់ គឺនៅព្រឹកថ្ងៃទី១០ មេសា ឃាត់ខ្លួនបានចំនួន៤នាក់ និងនៅយប់ថ្ងៃដដែលនោះ ឃាត់ខ្លួនបានចំនួន៣នាក់ទៀត ។ ដោយទ្បែក ជនល្មើសម្នាក់ទៀតឈ្មោះ រដ្ឋា អាយុជាង២០ឆ្នាំ បានរត់គេចខ្លួនបាត់ ហើយបច្ចុប្បន្នសមត្ថកិច្ចកំពុងតាមចាប់ខ្លួនបន្ត ៕
ចែករំលែកព័តមាននេះ