ខេត្តព្រះសីហនុ ៖ ខណៈពេលដែលអាជ្ញាធរខេត្ត កំពុងបើកយុទ្ធនាការសំអាតទីក្រុង និងតំបន់ឆ្នេរសមុទ្រ ដើម្បីអបអរការដាក់បញ្ចូលឆ្នេរសមុទ្រកម្ពុជា ជាសមាជិកក្លឹបឆ្នេរអន្តរជាតិស្អាតលើពិភពលោក បុគ្គលិកសណ្ឋាគារផ្កាយ៤ឯករាជ្យ ហៅសណ្ឋាគារ៧ជាន់ ស្ថិតនៅក្នុងសង្កាត់លេខ៣ ក្រុងព្រះសីហនុ បានប្រមូលផ្តុំគ្នាធ្វើពលកម្មសំអាតអនាម័យបរិស្ថាន នៅក្បែរសណ្ឋាគារ និងនៅតំបន់ឆ្នេរសមុទ្រ កាលពីព្រឹកថ្ងៃទី២១ តុលា ឆ្នាំ២០១០។ លោកហ្វ៊ីលីព តូ នាយកគ្រប់គ្រងសណ្ឋាគារឯករាជ្យ ដែលដឹកនាំបុគ្គលិកសណ្ឋាគារធ្វើពលកម្មសំអាតតំបន់ឆ្នេរសមុទ្រ បានបញ្ចេញទស្សនៈថា ជាមោទនភាពបំផុតដែលឆ្នេរសមុទ្រកម្ពុជាយើងត្រូវបានបញ្ចូលជាសមាជិកក្លឹបឆ្នេរអន្តរជាតិ មានន័យថា ជាឆ្នេរស្អាតនៅលើពិភពលោក តាមរយៈការខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានក្រសួងទេសចរណ៍ជាសេនាធិការ។
ការដាក់បញ្ចូលឆ្នេរសមុទ្រខេត្តព្រះសីហនុ ជាសមាជិកក្លឹបឆ្នេរអន្តរជាតិ ធ្វើឱ្យលោកមានជំនឿថា ខេត្តព្រះសីហនុពិតជានឹងមានអ្នកទេសចរបរទេសមកលេងកំសាន្ត កាន់តែច្រើនឡើងជាពុំខាន។ ក្រៅពីបុគ្គលិកសណ្ឋាគារឯករាជ្យ ក៏មានបុគ្គលិកក្រុមហ៊ុនទេសចរណ៍ឯកជន លោកគ្រូ អ្នកគ្រូ សិស្សានុសិស្ស កងកំលាំងប្រដាប់អាវុធ រួមនឹងមន្ត្រីមន្ទីរបរិស្ថានខេត្ត នាំគ្នាសំអាតរើសសំរាមនៅតាមសួនច្បារសាធារណៈ និងឆ្នេរសមុទ្រ ក្នុងគោលបំណងបង្ហាញថា ទីក្រុងព្រះសីហនុ និងឆ្នេរសមុទ្រ ពុំមានការបំពុលបរិស្ថានឡើយ។ ជាមួយនឹងសកម្មភាពនេះ អាជ្ញាធរខេត្តព្រះសីហនុក៏បានជូនដំណឹងដល់មន្ត្រីរាជការ ប្រជាពលរដ្ឋ និងអាជីវករលក់ដូរ ម្ចាស់ភោជនីយដ្ឋាន សណ្ឋាគារ ផ្ទះសំណាក់ ឱ្យចូលរួមថែរក្សាសំអាតបរិស្ថាន លំនៅឋាន អង្គភាព និងគ្រប់ទីកន្លែងសាធារណៈឱ្យបានស្អាតល្អផងដែរ៕
ចែករំលែកព័តមាននេះ