ខេត្តសៀមរាប ៖ រដ្ឋបាលខេត្តសៀមរាបបានប្រារព្ធព្រឹត្តិការណ៍បុណ្យបង្ហើរខ្លែងឯកខ្មែរ ក្នុងគោលបំណងធ្វើការផ្សព្វផ្សាយលើកតម្កើងមរតកវប្បធម៌ជាតិ ដើម្បីជម្រុញវិស័យទេសចរណ៍ វប្បធម៌ ស្របតាមយុទ្ធនាការ (ទស្សនាសៀមរាប ឆ្នាំ២០២៤) និងទាក់ទាញអ្នកទេសចរណ៍ឱ្យមកកម្សាន្តនៅក្នុងខេត្តសៀមរាបផង។…
ខេត្តសៀមរាប ៖ រដ្ឋបាលខេត្តសៀមរាបបានប្រារព្ធព្រឹត្តិការណ៍បុណ្យបង្ហើរខ្លែងឯកខ្មែរ ក្នុងគោលបំណងធ្វើការផ្សព្វផ្សាយលើកតម្កើងមរតកវប្បធម៌ជាតិ ដើម្បីជម្រុញវិស័យទេសចរណ៍ វប្បធម៌ ស្របតាមយុទ្ធនាការ (ទស្សនាសៀមរាប ឆ្នាំ២០២៤) និងទាក់ទាញអ្នកទេសចរណ៍ឱ្យមកកម្សាន្តនៅក្នុងខេត្តសៀមរាបផង។
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាបថ្លែងក្នុងពិធីបុណ្យបង្ហើរខ្លែងឯកខ្មែរ និង ខ្លែងសេរី នៅក្នុងបរិវេណអាកាសយានដ្ឋានអន្តរជាតិសៀមរាបចាស់ នារសៀល ថ្ងៃទី២៧ ខែធ្នូ ឆ្នាំ២០២៤ បានលើកឡើងថា ការបង្ហើរខ្លែង នេះ បានកើតមានឡើងនៅក្នុងប្រពៃណីរបស់ខ្មែរ រាប់ពាន់ឆ្នាំមកហើយ ។
លោកបន្តថា ប៉ុន្តែមួយរយៈកាលកន្លងមកនេះ ខ្លែងខ្មែរ ជាពិសេសខ្លែងឯកនេះ ស្ទើរតែបាត់បង់ដោយសារតែពលរដ្ឋយើងមួយចំនួនមានជំនឿថា ខ្លែង ជាវត្ថុអពមង្គល ។ ដែលតាមការពិតខ្លែងនេះដូនតាខ្មែរបង្កើតមកជាវត្ថុតំណាងឱ្យសុភមង្គល។ លោក មួង សុភាព បន្តទៀតថា ដោយសារតែជំនឿរមិនសមហេតុផលនេះ ទើបថ្នាក់ដឹកនាំ ស្ថាប័នជាតិបានគិត គូរ និង យកចិត្តទុកដាក់រៀបចំឱ្យមានព្រឹត្តិការណ៍នានាដែលទាក់ទងនឹងខ្លែងនេះ ក្នុងនោះក្រសួងវប្បធម៌ និងវិចិត្រសិល្បៈ ក៏មានបំណងយកខ្លែងឯករបស់ខ្មែរនេះ ចុះក្នុងបញ្ជីសម្បត្តិបេតិកភណ្ឌពិភពលោកផងដែរ ។
លោកបញ្ជាក់ថា ដោយសារហេតុនេះទើប ក្រសួងវប្បធម៌និងវិចិត្រសិល្បៈ ខិតខំបំផុសចលនាបង្ហើរ ខ្លែងនេះ ឡើងវិញព្រោះការចូលជាសម្បត្តិ បេតិកភណ្ឌពិភពលោកនេះ យើងអាចអភិរក្ស និង ផ្សព្វផ្សាយអំពីខ្លែងយើងបានទូលំទូលាយ។ លោក មួន សុភាព បញ្ជាក់ទៀតថា ការបង្ហោះខ្លែងនេះ នឹងក្លាយជាព្រឹត្តិការណ៍ប្រចាំឆ្នាំសម្រាប់ខេត្តសៀម រាប ហើយការបង្ហើរខ្លែងនេះ ខ្មែរយើងនិយមបង្ហើរនៅរដូវរំហើយ ។
លោក លី សារី អភិបាលរងខេត្តសៀម រាប បានថ្លែង ក្នុងពិធីបើក ព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរីនេះ ថា ការបង្ហើរខ្លែងខ្មែរ មិនគ្រាន់តែបង្កបរិយាកាសឱ្យប្រជាពលរដ្ឋ សាធារណ ជន ទស្សនាប្រកបដោយសេចក្ដីសប្បាយ រីករាយប៉ុណ្ណោះទេ ប៉ុន្តែវាជាការផ្ទេរនូវចំណេះដឹងខាងទំនៀមទម្លាប់ប្រពៃណី ខ្មែរដល់យុវជនជំនាន់ក្រោយឱ្យបានស្គាល់ យល់ដឹង និង ចូលរួមប្រតិបត្តិ ថែរក្សាការពារ លើកស្ទួយអត្តសញ្ញាណជាតិ តម្លៃវប្បធម៌អរូបី ព្រមទាំងចូលរួមយ៉ាងសកម្មក្នុងការសិក្សា ស្រាវជ្រាវ ចង ក្រងរក្សាទុកនូវឯកសារបេតិកភណ្ឌវប្បធម៌នេះ ឱ្យបានស្ថិតស្ថេរគង់វង្ស ។
លោក លី សារី បន្តថា ព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី នាឱកាសនេះ ក៏បានចូលរួមចំណែកយ៉ាងសំខាន់ ក្នុងការទាក់ទាញកំណើនភ្ញៀវទេសចរជាតិ និងអន្តរជាតិ ឱ្យមកទស្សនាខេត្ត សៀមរាបកាន់តែច្រើនឡើង ស្របតាមយុទ្ធនាការ(ទស្សនាសៀមរាបឆ្នាំ ២០ ២៤ )ផងដែរ។
ទន្ទឹមនឹងនេះ សម្រាប់ឆ្នាំ ២០២៥ ខាងមុខ ដើម្បីបន្តរក្សាកំណើន និង ទាក់ទាញភ្ញៀវទេសចរ និងថែរក្សាបាននូវប្រពៃណីទំនៀមទម្លាប់ជាតិយើង ក្នុងនាមអាជ្ញាធរខេត្តសៀមរាប លោកបានធ្វើការអំពាវនាវដល់ថ្នាក់ដឹកនាំមន្ទីរ អង្គភាព រដ្ឋបាលក្រុង ស្រុក វិស័យឯក ជន បងប្អូនប្រជាពលរដ្ឋ ភ្ញៀវទេសចរជាតិ និង អន្តរជាតិ ទាំងអស់ មេត្តាបន្តគាំទ្រឱ្យបានផុលផុស ដើម្បីបន្តការរៀបចំនូវកម្មវិធី និងព្រឹត្តិការណ៍នានា ក្នុងខេត្ត សៀមរាបយើងនៅឆ្នាំបន្តបន្ទាប់ទៀត ។
សូមជម្រាបថា ព្រឹត្តិការណ៍បង្ហើរខ្លែងនេះ មានខ្លែងឯក ខ្លែងសេរី និងខ្លែងតូចៗ សរុបចំនួនប្រមាណ៥០០ខ្លែង ហើយព្រឹត្តិការណ៍នេះមានរយៈពេលបីថ្ងៃចាប់ពីថ្ងៃទី២៧ដល់ថ្ងៃទី២៩ខែធ្នូ ឆ្នាំ២០២៤ ក៏មានបងប្អូនអ្នកស្រឡាញ់និងលេងខ្លែងមកពីបណ្ដាខេត្តផ្សេងៗ និងបានចូលរួមយ៉ាងច្រើនកុះករផងដែរ ៕
ចែករំលែកព័តមាននេះ