ខេត្តកណ្តាល ៖ ក្រោយពីទទួលបានព័ត៌មានថា មានករណីក្មេងទំនើង បង្ហោះម៉ូតូតាមផ្លូវសាធារណៈ នៅចំណុចផ្លូវជាតិលេខ២១ ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្ដាល…
ខេត្តកណ្តាល ៖ ក្រោយពីទទួលបានព័ត៌មានថា មានករណីក្មេងទំនើង បង្ហោះម៉ូតូតាមផ្លូវសាធារណៈ នៅចំណុចផ្លូវជាតិលេខ២១ ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្ដាល និងដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល កម្លាំងជំនាញខេត្ត សហការជាមួយកម្លាំងជំនាញក្រុងតាខ្មៅ និងស្រុកស្អាង ធ្វើការស្រាវជ្រាវឈានដល់ការឃាត់ខ្លួនយុវជនក្មេងទំនើងពាក់ព័ន្ធបានចំនួន០៣នាក់ នៅថ្ងៃទី២៨ ខែធ្នូ ឆ្នាំ២០២៤នេះ ។
ក្មេងទំនើងទាំង០៣នាក់ រួមមាន ៖
១. ឈ្មោះ ឡាក់ សុវិរៈ ភេទប្រុស អាយុ១៧ឆ្នាំ ជាសិស្សវិទ្យាល័យស្អាង ទីលំនៅភូមិទទួលក្រូច ឃុំក្រាំងយ៉ូវ ស្រុកស្អាង (ជាអ្នកឌុបបង្ហោះ ធ្លាប់បង្ហោះចំនួន០៤ដង)។
២. ឈ្មោះ ដេត វណ្ណារ៉ា ភេទប្រុស អាយុ១៧ឆ្នាំ ជាសិស្សវិទ្យាល័យស្អាង ទីលំនៅភូមិព្រែកស្នាយ ឃុំព្រែកគយ ស្រុកស្អាង (អ្នកអង្គុយខាងក្រោយ ធ្លាប់បង្ហោះចំនួន០២ដង)។
៣. ឈ្មោះ លីន គីមលី ភេទប្រុស អាយុ១៦ឆ្នាំ ជាសិស្សវិទ្យាល័យស្អាង (អ្នកថត ធ្លាប់បង្ហោះ០១ដង) ។
តាមចម្លើយសារភាពរបស់ក្រុមក្មេងទំនើងខាងលើឲ្យដឹងថា កាលពីនៅថ្ងៃទី២៦ ធ្នូ ២០២៤ ក្រុមខ្លួនបានជិះម៉ូតូចំនួន០២គ្រឿង ឡើងទៅក្រុងតាខ្មៅ ពេលជិះដល់ចំណុចម្តុំទួលក្រសាំង ក៏នាំគ្នាបង្ហោះម៉ូតូ ហើយថតរូបទុក។ លុះដល់ថ្ងៃទី២៧ ធ្នូ ក៏បាននាំគ្នាកាត់តបញ្ចូលសំឡេង ហើយបង្ហោះលើបណ្តាញហ្វេសប៊ុកតែម្ដង ។
បច្ចុប្បន្ន ក្មេងទំនើងទាំង០៣នាក់ រួមទាំងវត្ថុតាង ត្រូវបានឃាត់ខ្លួន នៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ