ខេត្តបាត់ដំបង ៖ «អំពៅសាង» ដែលអ្នកខេត្តបាត់ដំបង គ្រប់វ័យស្ទើរភ្លេចឈ្មោះ ភ្លេចរសជាតិ អស់រយៈពេលជិត០៤ទសវត្សកន្លងទៅនេះ ស្រាប់តែពេលនេះបានបង្ហាញរូបរាងដ៏គួរឲ្យភ្ញាក់ផ្អើលក្នុង«ព្រឹត្តិការណ៍ពិព័រណ៍ម្ហូបខ្មែរ» ក្នុងក្រុងបាត់ដំបង តាមរយៈ«មន្ទីរកិច្ចការនារី»…
ខេត្តបាត់ដំបង ៖ «អំពៅសាង» ដែលអ្នកខេត្តបាត់ដំបង គ្រប់វ័យស្ទើរភ្លេចឈ្មោះ ភ្លេចរសជាតិ អស់រយៈពេលជិត០៤ទសវត្សកន្លងទៅនេះ ស្រាប់តែពេលនេះបានបង្ហាញរូបរាងដ៏គួរឲ្យភ្ញាក់ផ្អើលក្នុង«ព្រឹត្តិការណ៍ពិព័រណ៍ម្ហូបខ្មែរ» ក្នុងក្រុងបាត់ដំបង តាមរយៈ«មន្ទីរកិច្ចការនារី» ខេត្តបាត់ដំបង ។ គេឃើញមនុស្សម្នា ដែលដើរមើលកម្សាន្តក្នុង«ព្រឹត្តិការណ៌ពិព័រណ៌ម្ហូបខ្មែរ» គ្រប់វ័យបានចាប់អារម្មណ៍ និងភ្ញាក់ផ្អើលចោមរោមទិញ «អំពៅសាង» ដែលមើលទៅពួកគេហាក់ខានឃើញ និងភ្លក្សរសជាតិ«អំពៅសាង» នេះរាប់សិបឆ្នាំកន្លងមកហើយ ។
អតិថិជនគ្រប់វ័យ ក្នុងដៃសុទ្ធតែកាន់«អំពៅសាង» ដើរជជែកគ្នាបណ្ដើរ ទំពារជញ្ជក់រសជាតិ«អំពៅសាង» ដ៏ផ្អែមឆ្ងាញ់បណ្ដើរជាមួយនឹងសំណើចក្អាសក្អាយរីករាយក្រៃលែង ។
ក្នុងព្រឹត្តិការណ៌ដ៏មមាញឹកជាមួយបុគ្គលិកឈរលក់«អំពៅសាង» លោកស្រី អ៊ាន ណារៀង ប្រធានស្ដីទីមន្ទីរកិច្ចការនារី ខេត្តបានផ្ដល់បទសម្ភាស) ខ្លីជាមួយកោះសន្តិភាព ដូច្នេះថា «អំពៅសាង ខាងមន្ទីរខ្ញុំ លក់ដាច់ណាស់ប៉ុន្មានថ្ងៃនេះ ។ នេះជាឆ្នាំទី០២ ហើយដែលខាងមន្ទីរខ្ញុំ ជ្រើសរើសយកអំពៅសាង ដើម្បីដាក់តាំងក្នុងព្រឹត្តិការណ៌ម្ហូបខ្មែរ ដែលរៀបចំធ្វើនៅក្នុងក្រុងបាត់ដំបង» ។
កោះសន្តិភាព ៖ តើមូលហេតុអ្វី បានមន្ទីរកិច្ចការណ៌នារី ជ្រើសរើសយកចំណីអាហារ អំពៅសាង ដែលគេរាល់គ្នាស្ទើរភ្លេចឈ្មោះទៅហើយ មកដាក់តាំងបង្ហាញក្នុងព្រឹត្តិការណ៌ពិព័រណ៌ម្ហូបខ្មែរនេះ? លោកស្រី ឈ្មោះ អ៊ាន ណារៀង ៖ « អំពៅសាងនេះហាក់ដូចជា វប្បធម៌មួយ និង ជាចំណីអាហារបែបប្រពៃណីរបស់យើងដែលធ្លាប់មានលក់កន្លងទៅ តែបានបាត់ឈ្មោះបាត់រូបរាងអំពៅសាងនេះរាប់សិបឆ្នាំកន្លងមកហើយ ។
ដូច្នេះហើយទើបក្នុងព្រឹត្តិការណ៌ពិព័រណ៌ម្ហូបខ្មែរដែលរៀបចំដោយរដ្ឋបាលខេត្តនេះ ខាងមន្ទីរកិច្ចការនារីខេត្តសម្រេចជ្រើសរើសយកមកដាក់តាំងបង្ហាញឲ្យមហាជនបានឃើញ និងបានភ្លក្សរសជាតិអំពៅសាងនេះជាថ្មី» ។
លោកស្រីឈ្មោះ អ៊ាន ណារៀង បានលើកឡើងថា អ្នកដើរកម្សាន្តខ្លះ ពេលបានក្រឡេកឃើញ«អំពៅសាង» ហាក់មានការភ្ញាក់ផ្អើលដែលមើលទៅគាត់ហាក់ខានបានជួប និងខានភ្លក្សរសជាតិ «អំពៅសាង» រាប់សិបឆ្នាំកន្លងមកហើយ ។ អ្នកខ្លះទៀត ពេលលើកបាច់អំពៅសាង កាន់បានរំលឹកពីប្រវត្តិដែលគាត់ធ្លាប់លក់ «អំពៅសាង» នេះកាលពីអតីតកាល ។
ក្នុងអតីតកាល គេតែងប្រទះឃើញក្មេងៗទូល «អំពៅសាង» នេះដើរលក់ស្ទើរគ្រប់ទិសទីនៅតាមទីប្រជុំជននានា ។ ជាពិសេស គេតែងឃើញមានលក់ច្រើនស្អេកស្កះ នៅម្ដុំ«សួនច្បារនាគបាញ់ទឹក» ចំកណ្ដាលបេះដូង ក្រុងបាត់ដំបង ដែលអ្នកខេត្តបាត់ដំបង តែងហៅថា តំបន់លក់«ក្រូចច្របាច់ និងលក់អំពៅសាង» ។ ទីតាំងលក់ «ក្រូចច្របាច់ ឬលក់អំពៅសាង» នៅលើ «សួនច្បារនាគបាញ់ទឹក»នេះ ល្បីរន្ទឺបំផុតនៅចុងទសវត្សឆ្នាំ៨០ និងដើមទសវត្សឆ្នាំ៩០ ដែលស្រទាប់យុវ័យជំនាន់នោះ ជាពិសេសពួកយុវជនតែម្ដង ដែលពេញនិយមទៅសម្ងំញ៉ាំក្រូចច្របាច់ និងអំពៅសាង ពេលរាត្រី ជាមួយនឹងសាច់សខ្ចីនៃម្ចាស់ក្រូច ។
យើងងាកមកមើល «ព្រឹត្តិការណ៏ពិព័រណ៌ម្ហូបខ្មែរ» វិញ រដ្ឋបាលខេត្តបាត់ដំបងតែងរៀចចំធ្វើរៀងរាល់ដំណាច់ឆ្នាំ ដើម្បីចូលរួមអបអរសាទរ ពិធីបុណ្យចូលឆ្នាំថ្មី ឆ្នាំសកល ២០២៥ ក្នុងរយៈពេល០៣ថ្ងៃ ចាប់ពីថ្ងៃទី ២៩, ៣០, ៣១, ធ្នូ ២០២៥ ។ នៅក្នុងព្រឹត្តិការណ៌នេះ រដ្ឋបាលខេត្ត និងបានរៀបចំតាំងពិព័រណ៌មុខម្ហូបខ្មែររាប់រយមុខ និងទំនិញគ្រប់ប្រភេទរាប់រយតូបទៀតផង ។ ដោយឡែក បើនិយាយពីការតាំងបង្ហាញ«អំពៅសាង» យ៉ាងសាមញ្ញរបស់មន្ទីរកិច្ចការនារីខេត្តឯណោះវិញ គេឃើញមានការទាក់ទាញចំណាប់អារម្មណ៌យ៉ាងខ្លាំងពីប្រជាពលរដ្ឋគ្រប់វ័យគ្រប់ស្រទាប់វណ្ណៈ។
ជាមួយនឹងការលើកបង្ហាញបាច់អំពៅសាង ដ៏គួរឲ្យស្រក់ទឹកមាត់ លាយឡំជាមួយនឹងសំណើចផង លោកស្រី អ៊ាន ណារៀង បានរំលឹកដូច្នេះថា «មន្ទីរកិច្ចការនារី បានចូលរួមក្នុងព្រឹត្តិការណ៏ពិព័រណ៌ម្ហូបខ្មែរ នេះចាប់ពីឆ្នាំ២០២៣ ហើយមកដល់ចុងឆ្នាំ២០២៤ នេះ គឺបាន០២ឆ្នាំហើយ ហើយលក់ដាច់ខ្លាំងណាស់» ៕
ចែករំលែកព័តមាននេះ