សហរដ្ឋអាមេរិក ៖ នៅសហរដ្ឋអាមេរិក កាលពីថ្ងៃទី១៩ មេសា កើតមានសោកនាដកម្ម២ បណ្ដាលឱ្យមនុស្សស្លាប់សរុប១៥នាក់ ។ អំពើហិង្សាដោយអាវុធដ៏សាហាវមួយកើតមាននៅរដ្ឋល្វីហ្សាណាដោយកុមារ៨នាក់ បានត្រូវស្លាប់ដោយគ្រាប់កាំភ្លើងក្នុងអំពើហិង្សារវាងគ្រួសារ។…
សហរដ្ឋអាមេរិក ៖ នៅសហរដ្ឋអាមេរិក កាលពីថ្ងៃទី១៩ មេសា កើតមានសោកនាដកម្ម២ បណ្ដាលឱ្យមនុស្សស្លាប់សរុប១៥នាក់ ។ អំពើហិង្សាដោយអាវុធដ៏សាហាវមួយកើតមាននៅរដ្ឋ
ល្វីហ្សាណាដោយកុមារ៨នាក់ បានត្រូវស្លាប់ដោយគ្រាប់កាំភ្លើងក្នុងអំពើហិង្សារវាងគ្រួសារ។ នេះជាសេចក្ដីរាយការណ៍កាលពីថ្ងៃទី១៩ មេសា របស់អាជ្ញាធរទីក្រុង SHREVEPORT ដែលជាទីក្រុងសំខាន់មួយ នាភាគខាងជើងរដ្ឋល្វីហ្សាណា ។
ប៉ូលិសមូលដ្ឋានគូសបញ្ជាក់ថា បន្ទាប់ពីទទួលសេចក្ដីរាយការណ៍ពីអំពើហិង្សា កាលពីព្រឹកថ្ងៃទី១៩ មេសា ប៉ូលិសបានចេញធ្វើអន្តរាគមន៍ និងបានប្រទះឃើញមនុស្សស្លាប់ក្នុងផ្ទះ២ ហើយផ្ទះទី៣មួយទៀតក៏ជាប់ការស៊ើបអង្កេតដែរ ។ ប៉ូលិសបន្តថា មនុស្សយ៉ាងតិច១០នាក់ ត្រូវគ្រាប់កាំភ្លើងនាយប់ថ្ងៃទី១៨ មក១៩ មេសា ក្នុងអំពើហិង្សាគ្រួសារនេះ ក្នុងនោះ ៨នាក់ស្លាប់ដែលពួកគេសុទ្ធតែជាកុមារមានអាយុពី១ឆ្នាំ ទៅ១៤ឆ្នាំ។ ក្នុងចំណោមក្មេងដែលស្លាប់ទាំងនេះមួយចំនួនត្រូវជាកូនរបស់ខ្មាន់កាំភ្លើង ។ នារី២នាក់ដែលជាសាច់ញាតិរបស់ខ្មាន់កាំភ្លើងក៏រងរបួសធ្ងន់ដែរ ។ នេះបើតាមការអះអាងរបស់លោក TOM ARSENEAUX អភិបាលក្រុងSHREVEPORT ប្រាប់ដល់ទូរទស្សន៍អាមេរិកCNN ។ ចំណែកយុវជនម្នាក់ក៏រងរបួសដែរដោយសារការហក់ទម្លាក់ខ្លួនពីលើដំបូលផ្ទះគេចចេញពីគ្រាប់កាំភ្លើង។
ខ្មាន់កាំភ្លើងដែលមិនត្រូវបានគេបង្ហាញ អត្តសញ្ញាណក្រោយការបាញ់ប្រហារបានរត់គេចខ្លួនហើយត្រូវប៉ូលិសដេញតាម និងចាប់រថយន្តដែលគេបើករត់ ។ ប៉ូលិសអះអាងថា ខ្មាន់កាំភ្លើងនោះត្រូវបានប៉ូលិសបាញ់សម្លាប់ តែអភិបាលក្រុងលោកTOM ARSENEAUX អះអាងថា លោកមិនដឹងច្បាស់ដែរថា តើខ្មាន់កាំភ្លើងរូបនោះត្រូវប៉ូលិសបាញ់ស្លាប់ឬមួយគេបាញ់សម្លាប់ខ្លួនឯង ។
ចំណែកសោកនាដកម្មមួយទៀត កើតមាននាថ្ងៃទី១៩ មេសា នោះដែរ ដោយនារីជាម្ដាយម្នាក់នៃសហគមន៍AMISH និងកូនរបស់គេ៦នាក់ បានត្រូវស្លាប់ក្នុងអគ្គិភ័យមួយបណ្ដាលមកពីការធ្លាយឧស្ម័នប្រូប៉ាន ។ តាមទូរទស្សន៍BBC NEWSថា អាជ្ញាធរមូលដ្ឋានរៀបរាប់ថា ការផ្ទុះបណ្ដាលឲ្យមានភ្លើងឆាបឆេះសម្លាប់មនុស្ស៧នាក់ ក្នុងតំបន់ជនបទមួយនៃរដ្ឋផេនស៊ីលវេនៀ ។
សោកនាដកម្មនេះ កើតមាននៅ LAMAR TOWNSHIP តំបន់គ្លីនតុនជិតទីក្រុងមីលហាល់។
តាមប៉ូលិសរដ្ឋថា ការផ្ទុះដ៏ខ្លាំងមួយលាន់ឮពីបណ្ដាផ្ទះជិតខាងមុនពេលអណ្ដាតភ្លើងឆេះរាលដាលយ៉ាងលឿនបំផ្លាញផ្ទះមួយទាំងស្រុង ។ ពេលក្រុមសង្គ្រោះមកដល់អគារទាំងមូលត្រូវភ្លើងឆេះទាំងស្រុងមិនអាចធ្វើអន្តរាគមន៍ ប៉ុនប៉ងសង្គ្រោះមនុស្សស្ថិតក្នុងផ្ទះនោះបាន ៕
ចែករំលែកព័តមាននេះ