ខួបលើកទី៤៦ នៃទិវាជ័យជម្នះ ៧មករា គ្រោងនឹងធ្វើមិទ្ទិញអបអរសាទរ នៅព្រឹកថ្ងៃទី០៧ មករា ២០២៥ មុខសាលមហោស្រពកោះពេជ្រ
រាជធានីភ្នំពេញ ៖ ខួបលើកទី៤៦ នៃទិវាជ័យជម្នះ ៧មករា (៧ មករា ១៩៧៩ – ៧…
រាជធានីភ្នំពេញ ៖ ខួបលើកទី៤៦ នៃទិវាជ័យជម្នះ ៧មករា (៧ មករា ១៩៧៩ – ៧ មករា ២០២៥) គ្រោងនឹងធ្វើមិទ្ទិញអបអរសាទរនៅព្រឹកថ្ងៃទី០៧ ខែមករា ឆ្នាំ២០២៥ នៅមុខសាលមហោស្រពកោះពេជ្រ ដោយមានសមាជិក និងមហាជនចូលរួមជាង២ម៉ឺននាក់ ។
ដើម្បីរក្សាបាននូវសន្តិសុខ សុវត្ថិភាព និងសណ្តាប់ធ្នាប់ល្អប្រសើរក្នុងពិធីនេះ លោក ឃួង ស្រេង អភិបាលរាជធានីភ្នំពេញ នាព្រឹកថ្ងៃទី៣១ ធ្នូ ២០២៤នេះ នៅសាលារាជធានីភ្នំពេញ បានបើកកិច្ចប្រជុំមួយ ជាមួយអាជ្ញាធរខណ្ឌទាំង១៤ និងកងកម្លាំងមានសមត្ថកិច្ច សំដៅធ្វើយ៉ាងណាឱ្យពិធីនេះ ដំណើរការទៅដោយរលូន និងជោគជ័យ ។
លោក ឃួង ស្រេង បានមានប្រសាសន៍ថា អាជ្ញាធរខណ្ឌ និងកងកម្លាំងសមត្ថកិច្ច ត្រូវពង្រឹងកិច្ចការពារសន្តិសុខ សុវត្ថិភាព និងសណ្តាប់ធ្នាប់ ឱ្យបានល្អ ព្រោះកិច្ចការពារសន្តិសុខ សុវត្ថិភាព និងសណ្តាប់ធ្នាប់ ក្នុងឱកាសរៀបចំពិធី បុណ្យខួបលើកទី៤៦ នៃទិវាជ័យជម្នះ ៧មករា ជារឿងសំខាន់បំផុត សំដៅធ្វើយ៉ាងណាឱ្យការប្រារព្ធពិធីនេះ ប្រព្រឹត្តទៅបានរលូន និងប្រកបដោយជោគជ័យ ។
លោក ឃួង ស្រេង បានបន្តថា ទិវាជ័យជម្នះ ៧មករា គឺជាទិវាបុណ្យជាតិ ក្នុងនាមអាជ្ញាធរ ត្រូវបំផុសប្រជាពលរដ្ឋឲ្យចងទង់ជាតិនៅមុខផ្ទះរបស់ខ្លួនជាមួយនឹងការសំអាតអនាម័យបរិស្ថានឲ្យបានល្អ។ ពាក់ព័ន្ធនឹងសន្តិសុខនេះដែរ លោក ឃួង ស្រេង ក៏បានជំរុញឲ្យអាជ្ញាធរ និងកងកម្លាំងសមត្ថកិច្ចទាំងអស់ ត្រូវគិតពីចំណុចខ្ពស់ ចាប់ពីថ្ងៃនេះតទៅ។ ពិសេស នាយប់ថ្ងៃ៣១ ធ្នូ ២០២៤ មានព្រឹត្តតិការណ៍ «សាទរកម្ពុជា» ហើយនៅវេលារំលងអាធ្រាត ចូលថ្ងៃទី១ ខែមករា ឆ្នាំ២០២៥ ក្រោយឆ្លងឆ្នាំរួច ពោលគឺចប់ពិធីភ្លាមប្រជាពលរដ្ឋ ដែលដើរលេងកម្សាន្ត នឹងខ្លះចុះពីលើអគារខ្ពស់ៗ ព្រមៗគ្នា ដែលអាចបង្កឲ្យមានការកកស្ទះចរាចរណ៍ ដូច្នេះកងកម្លាំង និងអាជ្ញាធរយើងត្រូវសម្រួលចររាចរណ៍ ជាមួយនិងការរក្សាសន្តិសុខ សុវត្ថិភាពជូនពួកគាត់អោយបានល្អបំផុត ។
ក្នុងឱកាសនោះដែរ លោក ឃួង ស្រេង អភិបាលរាជធានីភ្នំពេញ ក៏បានថ្លែងកោតសរសើរដល់អាជ្ញាធរខណ្ឌទាំង១៤ មន្ទីរពាក់ព័ន្ធ និងកងកម្លាំងមានសមត្ថកិច្ចទាំងអស់ ដែលយកអស់កម្លាំងកាយចិត្ត រួមសហការគ្នាការពាសន្តិសុខ សុវត្ថិភាព សណ្ដាប់ធ្នាប់ អនាម័យបានល្អប្រសើរ នាថ្ងៃ២៩ ធ្នូ ២០២៤ ក្នុងព្រឹត្តិការណ៌ការប្រកួតបាល់ទាត់មិត្តភាព អបអរសាទរ «ទិវាសន្តិភាពនៅកម្ពុជា» នាពហុកីឡាដ្ឋានជាតិមរតកតេជោ ៕
ចែករំលែកព័តមាននេះ