រាជធានីភ្នំពេញ ៖ មានការភ្ញាក់ផ្អើលមួយ បានកើតឡើង ខណៈដែលបុរសម្នាក់ បានទៅចូលរួមបុណ្យសពដន្លងរបស់ខ្លួន ហើយដល់ពេលហែ ស.ពទៅបូជាទៅហើយ ស្រាប់តែគាត់មានអាការៈមិនស្រួលខ្លួន រួចក៏ដួលសន្លប់បាត់មាត់បាត់ក…
រាជធានីភ្នំពេញ ៖ មានការភ្ញាក់ផ្អើលមួយ បានកើតឡើង ខណៈដែលបុរសម្នាក់ បានទៅចូលរួមបុណ្យសពដន្លងរបស់ខ្លួន ហើយដល់ពេលហែ ស.ពទៅបូជាទៅហើយ ស្រាប់តែគាត់មានអាការៈមិនស្រួលខ្លួន រួចក៏ដួលសន្លប់បាត់មាត់បាត់ក លែងដកដង្ហើមសូន្យឈឹងតែម្ដង។ ពេលនោះ ប្រពន្ធកូន ក្រុមគ្រួសារសាច់ញាតិ និងអ្នកភូមិ បានសន្មត់ថា គាត់បានស្លា.ប់ទៅតាមដន្លងរបស់គាត់បាត់ទៅហើយ ក៏បាននាំគ្នាស្រែកទ្រហោយំ និងរាយការណ៍ជូននគរបាល ឲ្យចុះទៅពិនិត្យមើល ប៉ុន្តែបានប្រមាណ៤ម៉ោងក្រោយមក ខណៈនគរបាល ចុះទៅដល់ ស្រាប់តែបុរសរូបនោះដឹងខ្លួនឡើងវិញ ហើយចាស់ទុំ នៅក្នុងភូមិបាននិយាយថា បុរសនោះមិនទាន់ស្លាប់ទេ គឺគាត់គ្រាន់តែភ្លឹក មួយរយៈពេលប៉ុណ្ណោះ ទើបដឹងខ្លួនឡើងវិញ បែបនេះ ។
ហេតុការណ៍ភ្ញាក់ផ្អើលខាងលើបានកើតឡើងកាលពីវេលាម៉ោ៧និង៣០នាទីព្រឹកថ្ងៃទី២៨ ខែធ្នូ ឆ្នាំ២០២៤ នៅក្នុងដីឡូត៍មួយកន្លែង ដែលមានទីតាំងស្ថិតនៅតាមផ្លូវលំ ភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។
បើតាមសាច់ញាតិរបស់គាត់ បានប្រាប់ឲ្យដឹងថា បុរសនោះឈ្មោះ មាន បាន អាយុ៥៤ឆ្នាំ មុខរបររើសអេតចាយ គាត់ក្រីក្រខ្លាំងណាស់ គ្មានផ្ទះសម្បែងនោះទេ ស្នាក់នៅក្នុងរោងប្រក់តង់ នៅទីតាំងកើតហេតុខាងលើ ។ ដោយឡែក កាលពីវេលាយប់ថ្ងៃទី២៧ ខែធ្នូ ឆ្នាំ២០២៤ គាត់ក៏បានទៅចូលរួមបណ្យសពដន្លងប្រុសរបស់គាត់ ដែលបានស្លាប់ដោយជំងឺប្រចាំកាយ ស្ថិតនៅក្នុងភូមិជាមួយគ្នានោះដែរ។ ដោយគាត់បានស្ថិតនៅក្នុងរោងបុណ្យជាមួយសាច់ញាតិ រហូតដល់យប់ជ្រៅ ទើបទៅសម្រាក ប៉ុន្តែគាត់មិនបានពិសាស្រា នោះឡើយ ។
ប្រភពដដែល បានប្រាប់ឲ្យដឹងបន្តទៀតថា លុះដល់វេលាព្រឹកថ្ងៃទី២៨ ខែធ្នូ ខណៈដល់ពេល ហែ ស.ពចេញពីផ្ទះ ទៅកាន់ឈានបដ្ឋានវត្តសំបួរមាស ដើម្បីបូជា ទៅហើយនោះ ស្រាប់តែគាត់មានអាការៈមិនស្រួលខ្លួន រួចក៏បានដួលសន្លប់បាត់បង់ស្មារតី លែងដឹងខ្លួន ហើយបាត់ទាំងដង្ហើមថែមទៀតផង ។ ពេលនោះ បានបង្កឲ្យមានការភ្ញាក់ផ្អើលយ៉ាងខ្លាំង ហើយប្រពន្ធកូន បានស្រែកទ្រហោយំគ្រប់ៗគ្នា ដោយរួមទាំងអ្នកភូមិផង បានសន្មត់ថា គាត់ស្លាប់ទៅតាមដន្លងដែរហើយ។ បន្ទាប់មកក៏បានរាយការណ៍ ជូនអាជ្ញាធរ និងនគរបាលខណ្ឌដង្កោ ដើម្បីចុះពិនិត្យសាកសព ព្រមទាំងរៀបចំធ្វើបុណ្យសពផងដែរ ។
ប្រភពខាងលើ បានប្រាប់ឲ្យដឹងបន្ថែមទៀតថា លុះរយៈពេលប្រមាណ៤ម៉ោងក្រោយមក ខណៈកម្លាំងនគរបាលខណ្ឌដង្កោ ចុះទៅដល់ធ្វើការពិនិត្យជាក់ស្ដែង ឃើញថាបុរសនោះ នៅមានដង្ហើម និងមានជីវិតនៅឡើយ មិនទាន់ស្លាប់នោះទេ គាត់បានដឹងខ្លួនឡើងវិញ ។ ទើបធ្វើឲ្យប្រពន្ធកូន ក្រុមគ្រួសារ សាច់ញាតិ មានការត្រេកអរពន់ពេក ចំណែកនគរបាល ក៏បានជួយទាក់ទងទៅកាន់រថយន្តមន្ទីរពេទ្យបង្អែកខណ្ឌដង្កោដឹកយកទៅសង្គ្រោះបន្ទាន់ភ្លាមៗ តែម្ដង ៕
ចែករំលែកព័តមាននេះ