រាជធានីភ្នំពេញ ៖ ប្ដីប្រពន្ធមួយគូ រៀបការជាមួយគ្នាច្រើនឆ្នាំហើយ ប៉ុន្តែអត់មានកូនទេ ដោយសារតែជីវភាពក្រីក្រ ពួកគាត់បាននាំគ្នា ចាកចេញពីស្រុកកំណើត មកស្នាក់នៅផ្ទះជួល នៅរាជធានីភ្នំពេញ។…
រាជធានីភ្នំពេញ ៖ ប្ដីប្រពន្ធមួយគូ រៀបការជាមួយគ្នាច្រើនឆ្នាំហើយ ប៉ុន្តែអត់មានកូនទេ ដោយសារតែជីវភាពក្រីក្រ ពួកគាត់បាននាំគ្នា ចាកចេញពីស្រុកកំណើត មកស្នាក់នៅផ្ទះជួល នៅរាជធានីភ្នំពេញ។ បុរសធ្វើជាជាងសំណង់ រីឯស្ត្រីជាធ្វើជាកម្មការិនីរោងចក្រកាត់ដេរ ហើយមួយរយៈចុងក្រោយនេះប្ដីអស់ការងារ អត់ទាន់មានកន្លែងធ្វើបន្តទៀត ក៏បាននៅតែផ្ទះ ហើយប្រពន្ធ ក៏បានប្រើឲ្យដើរស្ទូចត្រី គ្រាន់បានធ្វើម្ហូប ប្រចាំថ្ងៃ រួចពីការចំណាយប្រាក់ក្នុងការទិញម្ហូបផងដែរ ។
បុរសនោះក៏បានចេញទៅស្ទូចត្រី បានយកឲ្យប្រពន្ធ ធ្វើម្ហូបរាល់ថ្ងៃ តែជាអកុសល ស្រាប់តែនៅវេលាម៉ោង១១និង១៥នាទីព្រឹកថ្ងៃទី២៣ ខែកញ្ញា ឆ្នាំ២០២៤នេះ ត្រូវបានអ្នកដំណើរ ប្រទះឃើញបុរសជាប្ដីរូបនោះ ដេកស្លា.ប់ នៅមាត់ប្រឡាយ ក្លិបវាយកូនហ្គោល ទៅវិញ ស្ថិតនៅតាមផ្លូវបេតុង វត្តពោធិ៍វ័ន ក្នុងភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។ ជំហ៊ានដំបូង ត្រូវបានសមត្ថកិច្ចសង្ស័យថា គាត់ស្លា.ប់ដោយជំងឺគាំងបេះដូង ព្រោះគាត់មានជំងឺបេះដូង ច្រើនឆ្នាំមកហើយ ។
ស្ត្រីជាប្រពន្ធបានប្រាប់ឲ្យដឹងថា ប្ដីរបស់នាងរូបនោះឈ្មោះ ទិន ភារម្យ អាយុ៤១ឆ្នាំ មុខរបរជាងសំណង់ ហើយប្រពន្ធបានរៀបការជាមួយគ្នាច្រើនឆ្នាំមកហើយ ប៉ុន្តអត់ទាន់មានកូនទេ ។ ពួកគាត់ មានទីលំនៅអចិន្ត្រៃយ៍នៅស្រុកកោះសូទិន ខេត្តកំពង់ចាម ហើយដោយសារតែកត្តាជីវភាពក្រីក្រ ក៏បានចាចេញពីស្រុកកំណើត មករាជធានីភ្នំពេញ និងបានស្នាក់នៅផ្ទះជួលភូមិទ្រុងមាន់ សង្កាត់អូបែកក្អម ខណ្ឌសែនសុខ រាជធានីភ្នំពេញ ។
ស្ត្រីរូបនោះបានប្រាប់ឲ្យដឹងបន្តថា ប្ដីនាងធ្វើជាជាងសំណង់ ហើយក៏មានជំងឺបេះដូង កើតជាច្រើនឆ្នាំមកហើយដែរ ចំណែករូបនាង ធ្វើជាកម្មការិនីរោងចក្រកាត់ដេរ ហើយមួយរយៈពេលចុងក្រោយនេះ ប្ដីរបស់នាង អត់ទាន់មានការងារអីធ្វើបន្តទៀតទេ ក៏បានសម្រាកនៅផ្ទះ ។ ចំណែកនាងទៅធ្វើការរោងចក្រ រាល់ថ្ងៃ ។ ហើយដើម្បីកាត់បន្ថយការចំណាយលើការទិញម្ហូប នាងក៏បានប្រើប្ដីឲ្យដើរស្ទូចត្រី ដើម្បីទៅធ្វើម្ហូបប្រចាំថ្ងៃ ទើបប្ដីនាងបានចេញដើរស្ទូចត្រីរាល់ថ្ងៃ ។
កម្មការិនីរូបនេះ បានបញ្ជាក់ប្រាប់បន្ថែមទៀតថា ដោយឡែក នៅថ្ងៃកើតហេតុ នាងបានចេញទៅធ្វើការរោងចក្រ ហើយប្ដីបានចេញទៅស្ទូចត្រីដូចរាល់ថ្ងៃដែរ គាត់មិននឹកស្មានថា ប្ដីជួបរឿងបែបនេះនោះទេ ។ ខណៈពេលកំពុងធ្វើការសុខៗ ស្រាប់តែមានគេខលប្រាប់ថា ប្ដីនាងស្លា.ប់ហើយ ទើបនាងប្រញាប់ប្រញាល់ធ្វើដំណើរទៅកាន់កន្លែងកើតហេតុ ហើយបានឃើញប្ដី ពិតជាបានស្លា.ប់មែន គួរឲ្យសោកស្ដាយខ្លាំងណាស់ ។
ដោយឡែកអ្នកភូមិអករំដួល បាននិយាយថា ពួកគាត់បានឃើញបុរសរងគ្រោះរូបនោះ ទៅអង្គុយស្ទូចត្រី នៅត្រង់ចំណុចកើតហេតុខាងលើនោះរយៈពេល២ថ្ងៃមកហើយ ប៉ុន្តែអត់មាននរណា បានចាប់អារម្មណ៍ទៅមើល ឬសួរនាំអ្វីទេ លុះដល់ថ្ងៃទី២៣ ខែកញ្ញា ដែលជាថ្ងៃកើតហេតុ បានឃើញបុរសនេះទៅស្ទូចត្រី នៅត្រង់ចំណុចខាងលើនោះទៀត ហើយក៏មិនបានទៅមើលដដែល។ ស្រាប់តែនៅវេលាម៉ោង១១និង១៥នាទីព្រឹកថ្ងៃដដែល មានបុរសចំណាស់ម្នាក់ជិះកង់ដឹកកញ្ឆេ ឆ្លងកាត់តាមផ្លូវនោះ បានប្រទះឃើញបុរសនេះដេកស្លា.ប់លើដើមបន្លាអូយយ៉ាស់ ក៏ស្រែកប្រាប់គេឯង បង្កឲ្យមានការភ្ញាក់ផ្អើលឆោឡោតែម្ដង ។
អ្នកភូមិខាងលើ បានប្រាប់ឲ្យដឹងបន្តថា ពេលនោះពួកគាត់ បាននាំគ្នាលើកបុរស ដើម្បីនោះធ្វើចលនាបេះដូង ជាការសង្គ្រោះបឋមដែរ ប៉ុន្តែមិនអាចជួយបានឡើយ ព្រោះបុរសនោះ បានស្លា.ប់បាត់ទៅហើយ ។ ទើបស្រាវជ្រាវតាមទូរសព្ទរកលេខប្រពន្ធគាត់ និងខលប្រាប់ឲ្យប្រពន្ធបានដឹង រួចបានរាយការណ៍ ជូននគរបាលប៉ុស្តិ៍សំរោងក្រោម ឲ្យចុះទៅពិនិត្យ និងរាយការណ៍បន្តទៅកាន់នគរបាលការិយាល័យបច្ចេកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ចុះទៅធ្វើកោសល្យវិច័យស.ព ផងដែរ ៕
ចែករំលែកព័តមាននេះ