ខេត្តកំពត ៖ សិស្សសាលាបឋមសិក្សាលកព្រែកចាក ឃុំឫស្សីស្រុកខាងលិច ស្រុកកំពង់ត្រាចពេលធ្វើពលកម្មកាប់ដីបានប្រទះឃើញគ្រាប់មិនទាន់ផ្ទុះនៅក្នុងបរិវេណសាលា។ បន្ទាប់ពីប្រទះឃើញគ្រាប់ជាច្រើននៅក្នុងរណ្តៅនោះ លោកនាយកបានផ្អាកការធ្វើពលកម្ម ហើយរាយការណ៍ទៅសមត្ថកិច្ច។ នៅព្រឹកថ្ងៃទី២៧ តុលា ក្រុមស៊ីម៉ាក់បានទៅរុករកពិនិត្យឃើញថា មានគ្រាប់ជាច្រើននៅក្នុងដីមិនទាន់ផ្ទុះពិតមែន។
លោកខេង ជា មន្ត្រីប៉េអឹមប្រចាំទីស្នាក់ការអន្តរាគមន៍លកព្រែកចាកមានប្រសាសន៍ថា ក្រោយពីទទួលព័ត៌មានពីលោកនាយកសាលាបឋមសិក្សាលកថា ពេលសិស្សធ្វើពលកម្មប្រទះឃើញគ្រាប់នៅក្នុងរណ្តៅដីជាច្រើនគ្រាប់មកកងរាជអាវុធហត្ថបានទៅយាមនៅតំបន់មានគ្រោះថ្នាក់នោះមិនឱ្យសិស្សទៅប៉ះពាល់ឡើយ។ នៅព្រឹកថ្ងៃទី២៧ តុលា ក្រុមមន្ត្រីស៊ីម៉ាក់បានរុករកឃើញកប់នៅក្នុងដីមានគ្រាប់កាំភ្លើងយន្តមីត្រៃយើរចំនួន១.៥០០គ្រាប់ និងប្រភេទគ្រាប់១២,៧ចំនួន៧កេស ក្នុង១កេស ស្មើនឹង១០០គ្រាប់។
លោកខេង ជា មន្ត្រីកងរាជអាវុធហត្ថមានប្រសាសន៍ថា គ្រាប់ទាំងអស់នោះបន្សល់ទុកតាំងពីឆ្នាំ១៩៧២មកម្ល៉េះ ហើយអាចបង្កគ្រោះថ្នាក់ បើមិនមានការផ្តល់ដំណឹងនេះទៅខាងស៊ីម៉ាក់ទេ។ នៅភ្នំលកនេះបើតាមអ្នកស្រុកថា ជាសមរភូមិក្តៅគគុកមួយក្នុងសម័យសង្គ្រាម។ បន្ទាប់ពីប្រទះឃើញរណ្តៅគ្រាប់នេះក្រុមស៊ីម៉ាក់បានបន្តរុករកនៅ ក្នុងបរិវេណសាលានោះទៀតចៀសវាងគ្រោះថ្នាក់ដល់អាយុជីវិតសិស្ស និងប្រជាពលរដ្ឋជាយថាហេតុ៕
ចែករំលែកព័តមាននេះ