ប្រទេសព័រទុយហ្គាល់ ៖ ដៃគូស្នេហ៍យូរអង្វែងរបស់កំពូលកីឡាករបាល់ទាត់ Cristiano Ronaldo គឺតារាម៉ូដែលកូនកាត់អាហ្សង់ទីន-អេស្ប៉ាញ នាង Georgina Rodriguez នឹងទទួលបានប្រាក់ឧបត្ថម្ភរហូតដល់…
ប្រទេសព័រទុយហ្គាល់ ៖ ដៃគូស្នេហ៍យូរអង្វែងរបស់កំពូលកីឡាករបាល់ទាត់ Cristiano Ronaldo គឺតារាម៉ូដែលកូនកាត់អាហ្សង់ទីន-អេស្ប៉ាញ នាង Georgina Rodriguez នឹងទទួលបានប្រាក់ឧបត្ថម្ភរហូតដល់ ១១០,០០០ដុល្លារអាមេរិករាល់ខែពេញមួយជីវិតពីមិត្តប្រុសរបស់នាង ប្រសិនបើចំណងស្នេហ៍អ្នកទាំងពីរបែកគ្នា ទោះស្ថិតនៅក្នុងលក្ខខណ្ឌណាក៏ដោយ ដែលនេះស្ថិតនៅក្នុងកិច្ចព្រមព្រៀងមុនរៀបការរវាងអ្នកទាំងពីរ។
បើតាមការចេញផ្សាយពីទូរទស្សន៍ព័រទុយហ្គាល់ TV Guia កាលពីថ្មីៗនេះ បានទម្លាយថា កំពូលខ្សែប្រយុទ្ធព័រទុយហ្គាល់ Cristiano Ronaldo និងមិត្តស្រី Georgina Rodriguez បានចុះហត្ថលេខាលើកិច្ចព្រមព្រៀងមុនរៀបការ ដែលកំណត់យ៉ាងច្បាស់ថា Ronaldo មានកាតព្វកិច្ចផ្តល់ប្រាក់ឧបត្ថម្ភចំនួន ១១០,០០០ដុល្លារអាមេរិកក្នុងមួយខែដល់មិត្តស្រី Georgina ពេញមួយជីវិតរបស់នាង ប្រសិនបើចំណងស្នេហាអ្នកទាំងពីរប្រះឆា។ លើសពីនេះទៀត តារាម៉ូដែលវ័យ៣០ឆ្នាំរូបនេះ ក៏នឹងក្លាយជាម្ចាស់កម្មសិទ្ធិវីឡាដ៏ប្រណិត១ខ្នង ស្ថិតនៅក្នុងទីក្រុងម៉ាឌ្រីដ ប្រទេសអេស្ប៉ាញផងដែរ។
Ronaldo និង Georgina បានចុះហត្ថលេខាលើកិច្ចព្រមព្រៀងនេះ បន្ទាប់ពីនាងសម្រាលបានកូនស្រីឈ្មោះ Alana Martina កាលពីឆ្នាំ ២០១៧។ កិច្ចព្រមព្រៀងមុនរៀបការនេះ អនុញ្ញាតឱ្យ Ronaldo រក្សាទ្រព្យសម្បត្តិភាគច្រើនរបស់ខ្លួន នៅក្នុងករណីបែកបាក់គ្នាជាមួយ Georgina ដែលជាមិត្តស្រី។
កាលពីសប្តាហ៍មុន ពាក្យចចាមអារ៉ាមបានផ្ទះឡើងថា Ronaldo និង Georgina បានរៀបការដោយសម្ងាត់រួចបាត់ទៅហើយ ក្រោយប្រធានក្រុមជម្រើសជាតិព័រទុយហ្គាល់ និងជាខ្សែប្រយុទ្ធឆ្នើមក្រុម Al Nassr នៅលីគកំពូលអារ៉ាប៊ីសាអូឌីតវ័យ៣៩ឆ្នាំរូបនេះ បានហៅ Georgina ដែលជាមិត្តស្រីថា «ប្រពន្ធ» ក្នុងការផ្សាយពាណិជ្ជកម្មមួយ។ នៅក្នុងការផ្សាយពាណិជ្ជកម្មនោះ Ronaldo បាននិយាយថា «នៅពេលដែលខ្ញុំមិនបានហ្វឹកហាត់នៅក្លិប ខ្ញុំចូលចិត្តហ្វឹកហាត់ជាមួយប្រពន្ធរបស់ខ្ញុំនៅផ្ទះ»។
ប្រភពពីកាសែតអេស្ប៉ាញ Marca បានរាយការណ៍ថា Ronaldo និង Georgina ប្រហែលជារៀបការដោយសម្ងាត់រួចទៅហើយ។ ដូច្នេះកិច្ចព្រមព្រៀងមុនរៀបការរវាងអ្នកទាំងពីរមានសុពលភាពស្របច្បាប់។
គួរឱ្យដឹងផងដែរថា កំពូលខ្សែប្រយុទ្ធព័រទុយហ្គាល់ Cristiano Ronaldo ចាប់ផ្តើមទំនាក់ទំនងសេ្នហាជាមួយតារាម៉ូដែលកូនកាត់អាហ្សង់ទីន-អេស្ប៉ាញ Georgina Rodriguez នៅក្នុងឆ្នាំ ២០១៦ នៅទីក្រុងម៉ាឌ្រីដ ប្រទេសអេស្ប៉ាញ។ ក្រៅពីកូនស្រី Alana Martina ដែលកើតនៅខែវិច្ឆិកា ឆ្នាំ២០១៧ Georgina ក៏បានផ្តល់កំណើតកូនភ្លោះប្រុសស្រីផ្សេងទៀត កាលពីឆ្នាំ ២០២២។ ប៉ុន្តែជាអកុសល កូនប្រុសក្នុងចំណោមកូនភ្លោះបានស្លាប់អំឡុងពេលកើត។
តាមពិតទៅ មុនពេលមានកូន២នាក់ជាមួយ Georgina នោះ Ronaldo មានកូន៣នាក់រួចទៅហើយ ដោយម្នាក់ជាកូនប្រុសកូនដំបូងកើតនៅឆ្នាំ ២០១០ ដោយមិនបានបង្ហាញអត្តសញ្ញាណរបស់ម្តាយជាសាធារណៈ តាមកិច្ចព្រមព្រៀងរវាងអ្នកទាំងពីរ។ ចំណែកឯកូន២នាក់ផ្សេងទៀត គឺជាកូនភ្លោះប្រុសស្រី កើតក្នុងខែមិថុនា ឆ្នាំ២០១៧ តាមរយៈការពពោះជំនួស។
យ៉ាងណាមិញ នៅក្នុងរយៈពេល៨ឆ្នាំចុងក្រោយនេះ គ្រួសាររបស់ Ronaldo បានផ្លាស់ប្តូរទីលំនៅឥតឈប់ឈរ នៅពេលដែលកីឡាករម្ចាស់ពានរង្វាន់ Ballon d’Or ៥សម័យកាលរូបនេះ ផ្លាស់ប្តូរក្លិបដើម្បីប្រកបអាជីព ដោយរាប់ចាប់ពីក្លិប Real Madrid នៅលីគកំពូលអេស្ប៉ាញ ក្លិប Juventus នៅលីគកំពូលអ៊ីតាលី ត្រឡប់ទៅក្លិប Manchester United នៅលីគកំពូលអង់គ្លេស និងបច្ចុប្បន្នកំពុងប្រកបអាជីពជាមួយក្លិប Al Nassr នៅលីគកំពូលអារ៉ាប៊ីសាអូឌីត៕ (ប្រភព ៖ VnExpress)
ចែករំលែកព័តមាននេះ