អត្តពលិក១រូបទទួលការកោតសរសើរ ក្រោយបង្វឹកក្រុមនារីចិនឈ្នះមេដាយមាសអូឡាំពិកឆ្នាំនេះ
ប្រទេសរុស្ស៊ី ៖ កញ្ញា Anastasia Bliznyuk កីឡាការិនីកាយសម្ព័ន្ធចង្វាក់ ឬ Rhythmic Gymnastics ដ៏ឆ្នើមសញ្ជាតិរុស្ស៊ី…
ប្រទេសរុស្ស៊ី ៖ កញ្ញា Anastasia Bliznyuk កីឡាការិនីកាយសម្ព័ន្ធចង្វាក់ ឬ Rhythmic Gymnastics ដ៏ឆ្នើមសញ្ជាតិរុស្ស៊ី ដែលជាម្ចាស់មេដាយមាសអូឡាំពិក២គ្រឿង ទទួលបានការកោតសរសើរពីមហាជនចំពោះទេពកោសល្យ និងសម្រស់ដ៏ស្រស់ស្អាតរបស់នាង បន្ទាប់ពីបានបង្វឹកក្រុមអត្តពលិកកាយសម្ព័ន្ធចង្វាក់នារីចិនដណ្តើមមេដាយមាស នៅកីឡាអូឡាំពិកទីក្រុងប៉ារីសឆ្នាំ ២០២៤ ដែលទើបបញ្ចប់កាលពីថ្ងៃទី១១ សីហា កន្លងទៅថ្មីៗនេះ។
រូបភាពរបស់ Anastasia Bliznyuk នៅក្នុងនាមជាគ្រូបង្វឹកក្រុមកាយសម្ព័ន្ធចង្វាក់នារីចិន ដែលឈរញញឹមសម្លឹងទៅសិស្សរបស់នាង បន្ទាប់ពីពួកគេឈ្នះមេដាយមាសអូឡាំពិកទីក្រុងប៉ារីស ត្រូវបានមហាជនជាច្រើនចែករំលែកនៅលើបណ្តាញសង្គម ដោយមកជាមួយមតិកោតសរសើរអំពីសម្រស់របស់នាងមិនដាច់ពីមាត់។ អ្នកលេងបណ្តាញសង្គមម្នាក់បានសរសេរថា «មន្តស្នេហ៍របស់នាងបំភ្លឺពាសពេញទីលានប្រកួត»។ ចំណែកម្នាក់ទៀតបានបញ្ចេញមតិ ដោយសរសើរអំពីរូបសម្រស់ និងលក្ខណៈពិសេសដ៏អស្ចារ្យរបស់គ្រូបង្វឹករូបនេះ និងថែមទាំងបានអរគុណចំពោះការបង្វឹកដ៏ល្អ ជួយប្រទេសចិនឈ្នះមេដាយមាសនៅក្នុងការប្រកួតវិញ្ញាសាចង្វាក់ជាក្រុមផ្នែកនារី។
បន្ទាប់ពីទទួលជ័យជម្នះ កញ្ញា Bliznyuk បានថ្លែងប្រាប់សារព័ត៌មាន ESPN របស់សហរដ្ឋអាមេរិកថា «កីឡាកាយសម្ព័ន្ធចង្វាក់ គឺជាការរួមបញ្ចូលគ្នានៃសិល្បៈ និងកីឡា។ កីឡានេះ យើងអាចទទួលយកការបំផុសគំនិតពីគ្រប់វប្បធម៌នៅក្នុងពិភពលោក។ ជ័យជម្នះលើកនេះ យើងគោរព ក៏ដូចជាលើកតម្កើងវប្បធម៌ចិន។ ខ្ញុំរីករាយណាស់ដែលសម្រេចបាននូវលទ្ធផលដ៏អស្ចារ្យនេះ បន្ទាប់ពីការខិតខំប្រឹងប្រែងអស់ជាច្រើនឆ្នាំ»។
កញ្ញា Bliznyuk ដែលកើតនៅទីក្រុង Zaporizhzhia ភាគអាគ្នេយ៍ប្រទេសអ៊ុយក្រែន បច្ចុប្បន្នមានអាយុ៣០ឆ្នាំ គឺជាម្ចាស់មេដាយមាសកីឡាអូឡាំពិកទីក្រុងឡុងដ៍ ចក្រភពអង់គ្លេស ឆ្នាំ ២០១២ និងទីក្រុងរីយ៉ូ ប្រទេសប្រេស៊ីល ឆ្នាំ ២០១៦ ហើយក៏ម្ចាស់មេដាយប្រាក់នៅកីឡាអូឡាំពិកទីក្រុងតូក្យូ ប្រទេសជប៉ុន ឆ្នាំ ២០២០ ផងដែរ។ Bliznyuk ត្រូវបានចាត់ទុកអត្តពលិកដ៏ឆ្នើមម្នាក់របស់ប្រទេសរុស្ស៊ី ជាមួយនឹងការឈ្នះមេដាយមាស ប្រាក់ និងសំរឹទ្ធជាច្រើនពីព្រឹត្តិការណ៍លំដាប់ពិភពលោកជាច្រើន ដូចជា World Championships, European Championships និង Summer Universiade ចាប់តាំងពីឆ្នាំ ២០១២ រហូតដល់ឆ្នាំ ២០២១។ អ្នកហាត់កាយសម្ព័ន្ធឆ្នើមកម្ពស់១,៧៣ម៉ែត្ររូបនេះ គឺជាកូនកូនស្រីបង្កើតរបស់លោក Ilya Bliznyuk អតីតអ្នកចាំទី ដែលធ្លាប់លេងឱ្យក្រុមជម្រើសជាតិអ៊ុយក្រែន។
ចាប់តាំងពីចុងឆ្នាំ ២០២២ មក Bliznyuk បានធ្វើជាគ្រូបង្វឹកក្រុមជម្រើសជាតិកាយសម្ព័ន្ធចង្វាក់រាំរបស់ប្រទេសចិន។ យោងតាមប្រភពសារព័ត៌មានចិន Sina ធ្លាប់បានរាយការណ៍ថា Bliznyuk តែងតែតម្រូវឱ្យសិស្សហ្វឹកហាត់នៅកម្រិតខ្ពស់។ តួយ៉ាង អត្តពលិកជនជាតិចិនម្នាក់បាននិយាយថា រូបគេគឺជាសិស្សរបស់ Bliznyuk ហើយនាងគឺជាគ្រូបង្វឹកដ៏តឹងរឹងបំផុត។
កញ្ញា Bliznyuk ត្រូវបានរាយការណ៍ថា គឺជាមនុស្សរស់នៅបែបឯកជនភាព ស្ងាប់ស្ងាត់ និងជាមនុស្សស្រលាញ់សត្វ។ ជារឿយៗនាងឆ្លៀតពេលទំនេរដើម្បីទៅសួនកម្សាន្ត ដើម្បីលេងជាមួយសត្វ។ ហើយនាងតែងតែជ្រើសរើសស្ទីលស្លៀកពាក់សាមញ្ញៗបំផុត ក៏ដូចជាឈុបែបកីឡាផងដែរ៕ (ប្រភព ៖ VnExpress)
ចែករំលែកព័តមាននេះ