ប្រទេសបារាំង ៖ អត្តពលិកជាច្រើនដែលចូលរួមប្រកួតព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ កំពុងត្អូញត្អែរអំពីកង្វះម្ហូបអាហារទទួលទាន នៅឯភូមិអូឡាំពិកប៉ារីស។ នេះបើតាមប្រភពពីកាសែតបារាំង L’Équipe បានរាយការណ៍កាលពីពេលថ្មីៗនេះ។ ភូមិកីឡាអូឡាំពិកទីក្រុងប៉ារីសឆ្នាំ២០២៤ គឺជាកន្លែងស្នាក់នៅរបស់អត្តពលិកមកពីជុំវិញពិភពលោក…
ប្រទេសបារាំង ៖ អត្តពលិកជាច្រើនដែលចូលរួមប្រកួតព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ កំពុងត្អូញត្អែរអំពីកង្វះម្ហូបអាហារទទួលទាន នៅឯភូមិអូឡាំពិកប៉ារីស។ នេះបើតាមប្រភពពីកាសែតបារាំង L’Équipe បានរាយការណ៍កាលពីពេលថ្មីៗនេះ។
ភូមិកីឡាអូឡាំពិកទីក្រុងប៉ារីសឆ្នាំ២០២៤ គឺជាកន្លែងស្នាក់នៅរបស់អត្តពលិកមកពីជុំវិញពិភពលោក ដែលចូលរួមប្រកួតទាំងអស់។ ចំណែកអាហារដ្ឋាននៅទីនោះ បើកដំណើរការទាំងថ្ងៃទាំងយប់ ដោយបម្រើម្ហូបអាហារជាង៤ម៉ឺនចានក្នុង១ថ្ងៃ ជាមួយមុខម្ហូបជាង៥០០មុខ។
ស្របពេលហាងកាហ្វេទីតាំងនៅកណ្តាលភូមិអូឡាំពិក ភាគខាងជើងក្រុងប៉ារីស ដែលអាចបម្រើមនុស្សបាន៣,២០០នាក់ នៅក្នុងពេលតែមួយ។ ប៉ុន្តែទោះយ៉ាងណាក៏ដោយ ក៏នៅតែមិនគ្រប់គ្រាន់ ដើម្បីបំពេញតម្រូវការអត្តពលិកនៅទីនោះ រហូតដល់អត្តពលិកជាច្រើនកំពុងត្អូញត្អែរអំពីរឿងនេះ។
ការរៀបចំម្ហូបអាហារជាមធ្យមចំនួនពីរចានកន្លះក្នុងមួយថ្ងៃ សម្រាប់អត្តពលិកម្នាក់ៗ ដោយមានអាហារសរុបចំនួន៦០០តោន។ ទោះជាយ៉ាងណាក៏ដោយ ការគណនានេះ មិនបានបំពេញតាមតម្រូវការជាក់ស្តែងនោះទេ។ កាសែតបារាំង L’Équipe បានរាយការណ៍ថា នៅក្នុងរយៈពេលប៉ុន្មានថ្ងៃថ្មីៗនេះ អត្តពលិកជាច្រើនបានត្អូញត្អែរអំពីកង្វះស៊ុត និងសាច់ជាដើម។ ចំណែកក្រុមអត្តពលិកខ្លះ ត្រូវបញ្ជូនមេចុងភៅផ្ទាល់របស់ពួកគេ ដើម្បីដោះស្រាយបញ្ហាកង្វះអាហារនៅភូមិអូឡាំពិក
ប៉ារីស។
ជាក់ស្តែង លោក Andy Anson នាយកប្រតិបត្តិសមាគមអូឡាំពិកអង់គ្លេសបាននិយាយថា ដើម្បីបំពេញតម្រូវការអាហាររបស់អត្តពលិកអង់គ្លេស ក្រុមការងារត្រូវអញ្ជើញមេចុងភៅទៅកាន់ទីស្នាក់ការកណ្តាលពួកគេនៅតំបន់ Clichy ចម្ងាយប្រហែល៤គីឡូម៉ែត្រពីភូមិអូឡាំពិក។ បើតាមកាសែត Daily Mail បានរាយការណ៍ថា អត្តពលិកអង់គ្លេសជាច្រើនបានជ្រើសរើសទទួលទានអាហារថ្ងៃត្រង់ និងអាហារពេលល្ងាចនៅទីនោះ ជំនួសឱ្យការទទួលទាននៅភូមិអូឡាំពិក។
ដោយឡែក អត្តពលិកឥណ្ឌាក៏បានរាយការណ៍អំពីកង្វះអាហារផងដែរ។ ជាក់ស្តែង កីឡាការិនីវាយសី Tanisha Crasto បាននិយាយថា នាងមិនអាចញ៉ាំម្ហូបបួសឥណ្ឌា នៅភោជនីយដ្ឋានសម្រាប់អាហារថ្ងៃត្រង់បានទេ ព្រោះខាតពេលវេលា។ ស្របពេលដែលអត្តពលិកមួយចំនួនផ្សេងទៀតត្អូញត្អែរថា អាហារថ្ងៃត្រង់នៅឯភូមិអូឡាំពិកមិនឆ្ងាញ់ទាល់តែសោះ។
ឆ្លើយតបនឹងការត្អូញត្អែរនេះ បុគ្គលិកផ្ទះបាយនៅភូមិអូឡាំពិកបាននិយាយថា ពួកគេបានទទួលស្គាល់មតិកែលម្អ ហើយនឹងកែសម្រួលអាហារូបត្ថម្ភឱ្យសមស្រប។ អ្នកនាំពាក្យផ្ទះបាយភូមិអូឡាំពិកបានប្រាប់កាសែត L’Equipe ថា ពួកគេកំពុងទទួលយកមតិរិះគន់ ហើយកំពុងធ្វើការដើម្បីបង្កើនការផ្គត់ផ្គង់ដល់អាហារដ្ឋាន សម្រាប់បម្រើដល់អត្តពលិកទាំងអស់។ យោងតាមអ្នករៀបចំនៅ Paris 2024 អះអាងថា អាហារសម្រាប់អត្តពលិកនៅភូមិអូឡាំពិក ត្រូវបានបម្រើដោយចុងភៅចំណានៗមកពីភោជនីយដ្ឋានលំដាប់ផ្កាយ ៣ Michelin ។
ក្រៅអំពីការខ្វះខាតអាហារ គណៈកម្មការរៀបចំក៏ទទួលរងការរិះគន់ រឿងមិនបានដំឡើងម៉ាស៊ីនត្រជាក់នៅក្នុងភូមិអូឡាំពិក។ ជាក់ស្តែង ក្រុមអត្តពលិកដូចជា ជប៉ុន សហរដ្ឋអាមេរិក ចក្រភពអង់គ្លេស អូស្ត្រាលី ដាណឺម៉ាក កាណាដា ក្រិក និងអ៊ីតាលី ត្រូវដំឡើងឧបករណ៍ម៉ាស៊ីនត្រជាក់ផ្ទាល់ខ្លួន ដើម្បីបម្រើដល់អត្តពលិកពួកគេ។ លើសពីនេះទៀត អត្តពលិកជាច្រើនក៏បានត្អូញត្អែរផងដែរអំពីកង្វះមធ្យោបាយធ្វើដំណើរទៅកាន់កន្លែងប្រកួត។
ដោយក្នុងនោះ កីឡាការិនីហែលទឹកសញ្ជាតិកាណាដា Maggie MacNeil បានបង្ហោះវីដេអូតាមអ៊ីនធឺណិត ហើយនិយាយថា អត្តពលិកត្រូវជិះឡានក្រុងតាមផ្លូវពីភូមិអូឡាំពិកទៅអាងហែលទឹក។ ហើយចម្ងាយពីភូមិអូឡាំពិកទៅកន្លែងប្រកួតហែលទឹកប្រហែល១៥គីឡូម៉ែត្រ ប៉ុន្តែអត្តពលិកខ្លះត្រូវចំណាយពេលពីរម៉ោង ដើម្បីទៅដល់ទីនោះ ដោយសារតែខ្វះមធ្យោបាយធ្វើដំណើរ៕ (ប្រភព ៖ VnExpress, L’Équipe និង Daily Mail)
ចែករំលែកព័តមាននេះ