(អាមេរិក)៖ កាលពីព្រឹកថ្ងៃអង្គារ ទី១៦ ខែកក្កដា កន្លងទៅនេះ ប្រជាជនទីក្រុងញូវយ៉ក សហរដ្ឋអាមេរិក មានការភ្ញាក់ផ្អើលជាខ្លាំង បន្ទាប់ពីមានព័ត៌មានថា បុរសម្នាក់បានលោតពីជាន់ទី២០ នៃសណ្ឋាគារប្រណីត Kimberly នៅកណ្តាលទីក្រុង Manhattan។ ជនរងគ្រោះមានឈ្មោះ J. Michael Cline អាយុ៦៤ឆ្នាំ។ លោក Cline គឺជាសហស្ថាបនិកនៃក្រុមហ៊ុនលក់សំបុត្រកុនតាមអនឡាញ Fandango និងជាអ្នកជំនួញដ៏ជោគជ័យម្នាក់ដែលមានទ្រព្យសម្បត្តិយ៉ាងច្រើន។
យោងតាមការស៊ើបអង្កេតដំបូង លោក Cline បានបន្សល់ទុកសំបុត្រអត្តឃាត មុនពេលលោតសម្លាប់ខ្លួន។ ទោះជាយ៉ាងណាមកទល់ពេលនេះ ខ្លឹមសារនៃលិខិតនេះមិនត្រូវបានអាជ្ញាធរចុះផ្សាយឡើយ។
លោក Cline ត្រូវបានគេស្គាល់ថាជាអ្នកជំនួញ និងជាបុគ្គលបំផុសគំនិតដល់យុវជនជាច្រើនជាមួយនឹងរឿងរ៉ាវនៃការចាប់ផ្តើមអាជីវកម្មរបស់គាត់។ គាត់បានបញ្ចប់ការសិក្សាពីសាកលវិទ្យាល័យ Cornell និងទទួលបាន MBA ពីសាកលវិទ្យាល័យ Harvard ។ លោក Cline បានរៀបការជាមួយនឹងភរិយារបស់លោក Pamela ជិត៣០ឆ្នាំមកហើយ។
លោក Cline គឺជាសហស្ថាបនិកនៃ Fandango ដែលជាក្រុមហ៊ុនផ្តល់សេវាកម្មសំបុត្រកុនតាមអនឡាញឈានមុខគេនៅសហរដ្ឋអាមេរិក។ លើសពីនេះ លោកក៏កាន់តំណែងជា CEO របស់ក្រុមហ៊ុន Juxtapose ដែលជាក្រុមហ៊ុនដែលមានឯកទេសក្នុងការវិនិយោគលើការចាប់ផ្ដើមអាជីវកម្ម។
ភាពជោគជ័យក្នុងអាជីពរបស់គាត់បានជួយលោក Cline ជាម្ចាស់ទ្រព្យសម្បត្តិដ៏ធំ រួមទាំងវីឡាតម្លៃរាប់លានដុល្លារនៅ Hamptons (Long Island, New York), Greenwich (Connecticut) និង Palm Beach (Florida)។ The Palm Beach Daily News បានរាយការណ៍ថា ក្នុងខែធ្នូ ឆ្នាំ២០២០ គាត់បានចំណាយប្រាក់ ២០.៧៥ លានដុល្លារ ដើម្បីទិញវីឡា។
ទោះជាយ៉ាងណាក៏ដោយ ក្នុងរយៈពេលប៉ុន្មានឆ្នាំចុងក្រោយនេះ ប្រតិបត្តិការអាជីវកម្មរបស់ Fandango បានជួបប្រទះការលំបាកជាច្រើន ដោយសារផលប៉ះពាល់នៃជំងឺរាតត្បាត COVID-19។ ការពិតដែលថារោងកុនត្រូវបិទ ឬដំណើរការប្រតិបត្តិការមានកម្រិតបានធ្វើឱ្យប្រាក់ចំណូលរបស់ Fandango ធ្លាក់ចុះយ៉ាងធ្ងន់ធ្ងរ។
ទោះបីជាព្យាយាមផ្លាស់ប្តូរទៅក្នុងវិស័យstreamingក៏ដោយ ប្រាក់ចំណេញរបស់ Fandango បានបន្តធ្លាក់ចុះនៅឆ្នាំ២០២៣។ មនុស្សជាច្រើនជឿថានេះអាចជាមូលហេតុចម្បងនៃការធ្វើអត្តឃាតរបស់គាត់៕
ចែករំលែកព័តមាននេះ