ខេត្តបន្ទាយមានជ័យ ៖ កម្លាំងសមត្ថកិច្ចបានចុះឃាត់ខ្លួនសិស្សគេចម៉ោងសិក្សាចំនួន១៣នាក់ ក្នុងនោះមាន៤នាក់ប្រព្រឹត្តជក់បារីក្នុងហាងកាហ្វេ ក្រោយបែកធ្លាយវីដេអូ ។ ការឃាត់ខ្លួនពួកគេ ដើម្បីធ្វើការណែនាំអប់រំឡើងវិញ ធ្វើឡើងកាលពីល្ងាចថ្ងៃទី០៥ ខែមិថុនា…
ខេត្តបន្ទាយមានជ័យ ៖ កម្លាំងសមត្ថកិច្ចបានចុះឃាត់ខ្លួនសិស្សគេចម៉ោងសិក្សាចំនួន១៣នាក់ ក្នុងនោះមាន៤នាក់ប្រព្រឹត្តជក់បារីក្នុងហាងកាហ្វេ ក្រោយបែកធ្លាយវីដេអូ ។ ការឃាត់ខ្លួនពួកគេ ដើម្បីធ្វើការណែនាំអប់រំឡើងវិញ ធ្វើឡើងកាលពីល្ងាចថ្ងៃទី០៥ ខែមិថុនា ឆ្នាំ២០២៤ ស្ថិតនៅប៉ុស្តិ៍រដ្ឋបាលសង្កាត់អូរជ្រៅ ក្រុងប៉ោយប៉ែត ។
លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែតបានប្រាប់ថា ការឃាត់ខ្លួនសិស្សគេចម៉ោងសិក្សាមកធ្វើការអប់រំណែនាំត្រូវបានស្គាល់ឈ្មោះ៤នាក់ដែលជក់បារី ទី១-ឈ្មោះ ឈឿន រក្សា, ទី២-ឈ្មោះ ហេង សិវីឡា, ទី៣-ឈ្មោះ រ៉ុង ជីងវ័ន និង៤-ឈ្មោះ នុក សម្បត្តិ ។
លោកបានបញ្ជាក់ថា ក្រោយបែកវីដេអូសិស្សគេចសាលា៤នាក់ជុំគ្នាជក់បារីក្នុងហាងកាហ្វេ យីហោ «អ៊ី ណា អី» ស្ថិតក្នុងភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត ហើយជាការណែនាំពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងអធិការដ្ឋាននគរបាលក្រុងប៉ោយប៉ែត សហការជាមួយប៉ុស្តិ៍រដ្ឋបាលចុះពិនិត្យតាមហាងការហ្វេ និងតារាងបាល់ទាត់ដែលសិស្សគេចម៉ោងសិក្សាឃាត់បានចំនួន១៣នាក់ ក្នុងនោះ មាន៤នាក់ដែលជក់បារីក្នុងរូបភាពក្នុងហាងកាហ្វេ«អ៊ី ណា អ៊ី» ត្រូវបាននាំយកមកប៉ុស្តិ៍រដ្ឋបាលអូរជ្រៅ ដើម្បីធ្វើការអប់រំណែនាំនិងធ្វើកិច្ចសន្យាដល់ម្ចាស់ហាងការហ្វេ។
លោកគាត ហ៊ុល អភិបាលក្រុងប៉ោយប៉ែតបានបញ្ជាក់ថា ក្រោយបែករូបភាពតាមព័ត៌មាន និងបណ្តាញសង្គមឃើញសិស្សគេចសាលាជួបជុំគ្នាជក់បារីក្នុងហាងកាហ្វេ ហើយបានអោយកម្លាំងអធិការដ្ឋាននគរបាលក្រុងប៉ោយប៉ែតបានចុះពិនិត្យ ហើយឃាត់សិស្សដែលគេចពីម៉ោងសិក្សាចំនួន១៣នាក់ ក្នុងនោះមាន៤នាក់ជក់បារីត្រូវនាំទៅប៉ុស្តិ៍រដ្ឋបាលសង្កាត់អូរជ្រៅទាំង១៣នាក់ ដើម្បីអប់រំណែនាំនិងហ្ចាស់ហាងកាហ្វេត្រូវបានធ្វើកិច្ចសន្យា បើឃើញសិស្សគេចម៉ោងសិក្សាចូលជក់បារី ត្រូវមករាយការណ៍ជូនកម្លាំងមានសមត្ថកិច្ចជាបន្ទាន់ ។
ចែករំលែកព័តមាននេះ