ខេត្តបាត់ដំបង ៖ ព្រៃលិចទឹកធំល្វឹងល្វើយនៃខេត្តបាត់ដំបង គឺជាជំរកត្រីពងកូន និងជាប្រភពចំណីដ៏ប្រសើរបំផុត។ ការវិវឌ្ឍនៃសង្គម និងការរីកចំរើនផ្នែកបច្ចេកទេសវិទ្យាសាស្ត្រ ព្រមទាំងតំរូវការដែលចេះតែកើនឡើងបណ្តាលឱ្យសម្ពាធទៅលើធនធានធម្មជាតិមានការកើនឡើងជាលំដាប់ ហេតុនេះហើយទើបកាលពីរសៀលថ្ងៃទី១៣ តុលា អង្គភាពជលផលខេត្តបានរៀបចំពិធីដាំកូនឈើក្នុងតំបន់ព្រៃលិចទឹក និងដុតបំផ្លាញឧបករណ៍នេសាទខុសច្បាប់ក្នុងបរិវេណវត្តព្រែកត្រប់ ស្ថិតក្នុងឃុំព្រែកនរិន្ទ ស្រុកឯកភ្នំ។ ពិធីនេះបានប្រព្រឹត្តធ្វើក្រោមអធិបតីភាពលោកណៅ ធួក ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល លោកប្រាជ្ញ ចន្ទ អភិបាលខេត្តដោយមានការចូលរួមពីមន្ត្រីរាជការនានាជុំវិញខេត្ត លោកអភិបាលស្រុក មេបញ្ជាការកងរាជអាវុធហត្ថស្រុក អធិការនគរបាលស្រុក លោកមេឃុំជាប់ដែននេសាទ លោក-លោកស្រីជាមន្ត្រីជលផល ព្រមទាំងសមាជិក សមាជិកានៃសហគមន៍នេសាទយ៉ាងច្រើនកុះករ។
លោកកក អ៊ីឡែន នាយផ្នែករដ្ឋបាលជលផលបានឱ្យដឹងថា ក្រោយពីមានកំណែទំរង់វិស័យជលផល រាជរដ្ឋាភិបាលបានសំរេចលុប និងកាត់បន្ថយផ្ទៃឡូត៍នេសាទចំនួន៤៣.៨១៤ហិកតា ពីផ្ទៃឡូត៍នេសាទសរុប ដើម្បីទុកជូនប្រជាពលរដ្ឋធ្វើការនេសាទជាលក្ខណៈគ្រួសារ។ ដើម្បីឱ្យមានការចូលរួមកាន់តែច្រើនពីសំណាក់ប្រជាពលរដ្ឋក្នុងការថែរក្សា ការពារអភិរក្ស និងប្រើប្រាស់ធនធានជលផលប្រកបដោយនិរន្តរភាព រាជរដ្ឋាភិបាលបានរៀបចំជាសហគមន៍នេសាទក្នុងផ្នែករដ្ឋបាលជលផលព្រែកទាល់ដែលមានសហគមន៍នេសាទទាំងអស់ចំនួន២០ និងកន្លែងអភិរក្សត្រីមេពូជចំនួន២០កន្លែង។ កន្លែងអភិរក្សត្រូវបានរៀបចំជំរកសុវត្ថិភាពសំរាប់ត្រី តាមរយៈការដាក់លូ សំរាស់ និងបោះបង្គោលត្រឹមត្រូវ មាននៅបឹងរាំពេនបី, ស្ទឹងភាស, បឹងតាឯក, បឹងទឹកខ្មៅ, ព្រែកក្បាលកោះ, កោះជីវាំង និងអូរកោះជីតី។
លោកកក អ៊ីឡែន បានបន្តទៀតថា នៅឆ្នាំ២០០៩ បានរៀបចំថ្នាលបណ្តុះកូនឈើ់ចំនួន២កន្លែងមានចំនួន១៦.០០០ដើម ដាំក្នុងដែននេសាទចំនួន៦.០០០ដើម លើផ្ទៃដី១២ហិកតា និងដាំតាមកន្លែងអភិរក្ស និងសហគមន៍ស្រះជំរកត្រីចំនួន១០.០០០ដើម។ ដោយឡែកនៅថ្ងៃនេះ យើងបានយកកូនឈើចំនួន២.៥០០ដើម ដែលជាការអនុវត្តកិច្ចសន្យារបស់ឡូត៍នេសាទលេខ១០ សំរាប់ដាំលើផ្ទៃដីចំនួន៣ហិកតា នៅជុំវិញកន្លែងអភិរក្ស បឹងទឹកខ្មៅ។ ជាមួយនេះ ក៏មានការដុតបំផ្លាញវត្ថុតាងបទល្មើសនេសាទដែលរឹបអូសរួមមានឧបករណ៍នេសាទស្បៃមុងចំនួន៧៩មាត់ អាំងវែរទ័រឆក់ចំនួន១៣៣គ្រឿង ឡុកចាប់ត្រីចំនួន៦គ្រឿង អាគុយឆក់ចំនួន៣៥គ្រឿង ដងឆក់៧គូ រណារដៃ២គ្រឿង សាច់ម៉ាញ់១គ្រឿង កាំបិត១ សាច់មង និងអួនប្រវែង៣១០ម៉ែត្រ។
លោកណៅ ធួក បានថ្លែងថា ការរៀបចំប៉មយាម គឺជាការល្អ ប៉ុន្តែប៉មយាមនេះ គួរតែធ្វើឡើងអំពីដែក ឬបេតុង ព្រោះវាធានាជាប់បានយូរអង្វែង ហើយស្នើឱ្យអាជ្ញាធរឃុំ ស្រុក ត្រូវយកចិត្តទុកដាក់ជួយអភិរក្ស និងការពារព្រៃលិចទឹកក្នុងឃុំព្រែកនរិន្ទ នេះឱ្យបានគង់វង្ស និងបំផុសឱ្យប្រជាកសិករមានស្រះចិញ្ចឹមត្រី ដើម្បីឱ្យផលត្រីកើនឡើងសំរាប់បរិភោគផង ផ្តល់នូវសេដ្ឋកិច្ចគ្រួសារផង និងនាំឱ្យមានទឹកក្នុងស្រះ ផង ពេលដែលមានការប្រែប្រួលធាតុអាកាស។ បើសិនជាបងប្អូនណាចង់ចិញ្ចឹមត្រី ចង់រៀនបច្ចេកទេសភ្ញាស់ត្រី ត្រូវទៅចុះឈ្មោះនៅខណ្ឌរដ្ឋបាលជលផលលោកនឹងទទួលយកទៅបង្រៀន ពិសេសក្មួយៗដែលបោះបង់សាលារៀនកុំនាំគ្នាទៅធ្វើក្មេងទំនើង ត្រូវទៅរៀនភ្ញាស់ត្រី បង្កងក៏បានដែរ។
លោកប្រាជ្ញ ចន្ទ បានមានប្រសាសន៍ថា ការការពារដែនព្រៃលិចទឹកនៅដែនទន្លេសាប និងវិធានការមិនអនុញ្ញាតឱ្យប្រើប្រាស់ឧបករណ៍នេសាទខុសច្បាប់ គឺដូចជាការពារអាយុជីវិត របស់បងប្អូនដែលរស់នៅតាមដែនទន្លេសាបនេះដែរ។ ដូច្នេះបងប្អូនដែលរស់នៅក្នុងតំបន់ដែននេសាទជុំវិញបឹងទន្លេសាប ចាំបាច់ណាស់នូវការថែរក្សាធនធានជលផលរបស់យើង ដើម្បីការពារនិរន្តរភាពយូរអង្វែងសំរាប់យើងក៏ដូចជា កូនចៅប្រជាពលរដ្ឋរបស់យើងទៅតាមអ្វីដែលកំណត់ដោយច្បាប់ជលផលនោះ៕
ចែករំលែកព័តមាននេះ