រាជធានីភ្នំពេញ ៖ ដើម្បីជំរុញការធ្វើអាជីវកម្មថ្មធម្មជាតិ និងការនាំចេញថ្មធម្មជាតិ ឲ្យបានកាន់តែប្រសើរឡើង នាយករដ្ឋមន្ត្រីកម្ពុជា បានសម្រេចចុះអត្រាពន្ធអាករ ចំពោះការមុនទំនិញថ្មធម្មជាតិខ្មែរ ទៅកាន់ទីផ្សារអន្តរជាតិ ។…
រាជធានីភ្នំពេញ ៖ ដើម្បីជំរុញការធ្វើអាជីវកម្មថ្មធម្មជាតិ និងការនាំចេញថ្មធម្មជាតិ ឲ្យបានកាន់តែប្រសើរឡើង នាយករដ្ឋមន្ត្រីកម្ពុជា បានសម្រេចចុះអត្រាពន្ធអាករ ចំពោះការមុនទំនិញថ្មធម្មជាតិខ្មែរ ទៅកាន់ទីផ្សារអន្តរជាតិ ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់នៅថ្ងៃទី២៩ ខែកញ្ញា ឆ្នាំ២០២៣ យ៉ាងដូច្នេះថា ៖ «ថ្ងៃនេះ ខ្ញុំបានចុះហត្ថលេខាលើអនុក្រឹត្យ អនុញ្ញាតឲ្យបញ្ចុះអត្រាអាករ នាំចេញលើមុខទំនិញថ្មធម្មជាតិ សម្រាប់នាំចេញមួយចំនួន ក្នុងគោលដៅជួយសម្រាលបន្ទុក ដល់ក្រុមហ៊ុននាំចេញថ្មធម្មជាតិ និងជួយដល់ការប្រកួតប្រជែង នៃផលិតផលថ្មធម្មជាតិខ្មែរ នៅលើទីផ្សារអន្តរជាតិ» ។
ការសម្រេចរបស់ប្រមុខរាជរដ្ឋាភិបាលនេះ បន្ទាប់ពីសម្តេចធិបតី និងគណប្រតិភូ ចុះពិនិត្យតាមស្តង់ពិពណ៌លក់ផលិតផលរបស់កម្ពុជា នៅទីក្រុងណាននីង ប្រទេសចិន ក្នុងឱកាសចូលរួមពិពណ៌អាស៊ាន-ចិន លើកទី២០ កាលពីថ្ងៃទី១៧ កញ្ញា កន្លងទៅថ្មីៗនេះ ខ្ញុំបានជួបជាមួយប្អូនស្រីម្នាក់ដែលជាតំណាងក្រុមហ៊ុនធ្វើអាជីវកម្មថ្មធម្មជាតិ នៅកម្ពុជា ដែលពេលនោះប្អូនស្រី បានស្នើអោយរាជរដ្ឋាភិបាលកម្ពុជា ពិនិត្យលទ្ធភាពផ្តល់ការជួយបន្ថែមដល់ការធ្វើអាជីវកម្មថ្មធម្មជាតិ នៅកម្ពុជា ។
សម្តេចធិបតី លើកឡើងថា ជាការឆ្លើយតបទៅនឹងសំណូមពរនោះ ក៏ដូចជាសំណូមពរស្រដៀងគ្នាពីបងប្អូនផ្សេងទៀតនៅកម្ពុជា ដែលខ្ញុំបានទទួល ខ្ញុំបានប្រគល់ភារកិច្ចជូនឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដើម្បីសម្របសម្រួលកិច្ចប្រជុំរវាងស្ថាប័នពាក់ព័ន្ធ ដែលរួមមានក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល ជាមួយនិងសមាគមថ្មក្រានីតកម្ពុជា និងក្រុមហ៊ុនធ្វើអាជីវកម្មថ្មអារ ដើម្បីស្តាប់នូវកង្វល់ និងសំណូមពរផ្សេងៗ និងដើម្បីដាក់ចេញនូវដំណោះស្រាយសមស្រប និងទាន់ពេលវេលា ក្នុងគោលបំណងជំរុញការធ្វើអាជីវកម្មថ្មធម្មជាតិ និងការនាំចេញថ្មធម្មជាតិ ឲ្យបានកាន់តែប្រសើរឡើង ។
សម្តេចធិបតី បានលើកឡើងថា ជាលទ្ធផល កិច្ចប្រជុំបានរៀបចំជាសំណើ ដើម្បីសុំគោលការណ៏សម្រេចរបស់រាជរដ្ឋាភិបាល ដែលថ្ងៃនេះ ខ្ញុំបានចុះហត្ថលេខា លើអនុក្រឹត្យ អនុញ្ញាតឱ្យបញ្ចុះអត្រាអាករ នាំចេញលើមុខទំនិញ នាំចេញមួយចំនួន ក្នុងគោលដៅជួយសម្រាលបន្ទុកដល់ក្រុមហ៊ុននាំចេញថ្មធម្មជាតិ និងជួយដល់ការប្រកួតប្រជែង នៃផលិតផល ថ្មធម្មជាតិរបស់ខ្មែរ នៅលើទីផ្សារអន្តរជាតិ ។
សូមជម្រាបថា បើយោងតាមអនុក្រឹត្យ ស្តីពីការកែសម្រួលអត្រាអាករ នាំចេញលើមុខទំនិញថ្មធម្មជាតិ របស់សម្តេចធិបតី ហ៊ុន ម៉ាណែត នៅថ្ងៃទី២៩ កញ្ញា បានសម្រេចបញ្ចុះអត្រាអាករនាំចេញលើមុខទំនិញ នាំចេញមួយចំនួន ដូចខាងក្រោម ៖
-ពី ៣០% មក ១០% លើមុខទំនិញ ថ្មធម្មជាតិមិនទាន់កែច្នៃ ចំនួន ៨ បន្ទាត់ពន្ធ នៃតារាងពន្ធគយកម្ពុជាជាធរមាន ក្នុងទីតាំងរងលេខ ២៥១៥.១១.០០, ២៥១៥.១២.១០, ២៥១៥.២០.០០, ២៥១៦.១១.០០, ២៥១៦.១២.១០, ២៥១៦.២០.១០, ២៥១៦.២០.២០ និង ២៥១៦.៩០.០០ ។
-ពី ៣០% មក ៥% លើមុខទំនិញ ថ្មធម្មជាតិមិនទាន់កែច្នៃ ទម្រង់ឆ្នាំង ចំនួន ២ បន្ទាត់ពន្ធ នៃតារាងពន្ធគយកម្ពុជាជាធរមាន ក្នុងទីតាំងរងលេខ ២៥១៥.១២.២០ និង ២៥១៦.១២.២០ ។
-ពី ២០% មក០% លើមុខទំនិញ ថ្មធម្មជាតិកែច្នៃ ចំនួន ១២ បន្ទាត់ពន្ធនៃតារាងពន្ធគយកម្ពុជាជាធរមាន ក្នុងទីតាំងរងលេខ ៦៨០១.០០.០០, ៦៨០២.១០.០០, ៦៨០២.២១.០០, ៦៨០២.២៣.០០, ៦៨០២.២៩.១០, ៦៨០២.២៩.៩០, ៦៨០២.៩១.១០, ៦៨០២.៩១.៩០, ៦៨០២.៩២.០០, ៦៨០២.៩៣.១០, ៦៨០២.៩៣.៩០ និង ៦៨០២.៩៩.០០។ អនុក្រឹត្យនឹងចាប់ផ្តើមអនុវត្តចាប់ពីថ្ងៃទី១ ខែតុលា ឆ្នាំ២០២៣ តទៅ៕
ចែករំលែកព័តមាននេះ