ADផ្ទាំងផ្សព្វផ្សាយពាណិជ្ជកម្ម

សមត្ថកិច្ចសិង្ហបុរីចា.ប់.ខ្លួ.នអ្នកគ្រូសាលាមត្តេយ្យដែលធ្វើ.បា.បកូ.ន.ក្មេ.ង, គាត់អាចជា.ប់.គុ.ក៨ឆ្នាំ

1 ឆ្នាំ មុន

២៩ ខែ សីហា ឆ្នាំ ២០២៣ ម៉ោង ១៦:៥៩

មានករណីអ្នកគ្រូបង្រៀនម្នាក់នៅប្រទេសសិង្ហបុរីបៀតបៀនកូនសិស្សតូចៗជាច្រើនករណីនៅពេលកំពុងបង្រៀន។ សកម្មភាពរបស់គាត់ត្រូវបានថតជាប់ដោយកាមេរ៉ាសុវត្ថិភាព។ ឥឡូវនេះ សមត្ថកិច្ចចាប់ឃាត់ខ្លួនអ្នកគ្រូរូបនោះហើយដើម្បីយកទៅសាកសួរ។ ហេតុការណ៍នេះកើតឡើងនៅក្នុងសាលាមត្តេយ្យវូតលេន (Woodlands)។ អ្នកគ្រូបង្រៀនវ័យ៣៣ឆ្នាំរូបនេះត្រូវគេសង្ស័យថាបានប្រព្រឹត្តអំពើមិនសមរម្យចំពោះកូនសិស្សរងគ្រោះជាច្រើនករណី។

បន្ទាប់ពីទទួលបានរបាយការណ៍នៅម៉ោង១រសៀលថ្ងៃចន្ទ, សមត្ថកិច្ចចុះឆែកមើលកាមេរ៉ា និងពិនិត្យឃើញថាអ្នកគ្រូបានធ្វើបាបកូនសិស្សរបស់ខ្លួនឥតត្រាប្រណី។ វីឌីអូឃ្លីបចំនួន៣ឃ្លីបបង្ហាញរូបអ្នកគ្រូនៅក្នុងម៉ាតប្រចាំសាលាមត្តេយ្យ។ ពេលនោះ អ្នកគ្រូធ្វើសកម្មភាពហិង្សាដាក់កូនសិស្ស។ នៅក្នុងវីឌីអូឃ្លីប២ផ្សេងទៀត អ្នកគ្រូសម្លុតកូនសិស្សឱ្យផឹកទឹក ដោយចាប់ភ្ងើយក្បាលពួកគេមកក្រោយ។ ជួនកាល អ្នកគ្រូឱ្យកូនសិស្សអង្គុយ ឬដេកលើឥដ្ឋ។ រួចហើយ គាត់ចាក់បញ្ច្រកទឹកពីលើដើម្បីបញ្ចូលទៅក្នុងមាត់របស់ពួកគេ។ នៅក្នុងវីឌីអូឃ្លីបទី៣ គេឃើញអ្នកគ្រូស្រែកគំហកខ្លាំងៗដាក់កូនសិស្ស និងយកសៀវភៅវាយកូនសិស្សម្នាក់ជាច្រើនដង។

សាលាមត្តេយ្យនេះមានទីតាំងស្ថិតនៅមិនឆ្ងាយប៉ុន្មានពីលំនៅដ្ឋាននៃអ្នកតំណាងរាស្ត្រម្នាក់។ អ្នកស្រីតំណាងរាស្ត្ររូបនេះបង្ហោះនៅលើបណ្ដាញហ្វេសប៊ុកថាអ្នកស្រីបានជួយឈឺឆ្អាលនៅក្នុងរឿងនេះ និងផ្ដល់ជំនួយផ្នែកច្បាប់សម្រាប់កុមាររងគ្រោះទាំងនោះ និងប៉ាម៉ាក់របស់ពួកគេដើម្បីតវ៉ានៅក្នុងរឿងនេះ។ អ្នកស្រីយល់ថាទង្វើដែលគ្មានជំនាញវិជ្ជាជីវៈ និងអំពើហិង្សាស្ដែងៗរបស់អ្នកគ្រូម្នាក់នោះមិនអាចទទួលយកបានជាដាច់ខាត។

ក្រោយបែកធ្លាយរឿងនេះ, គណៈគ្រប់គ្រងសាលាមត្តេយ្យសម្រេចបណ្ដេញអ្នកគ្រូចេញពីក្របខណ្ឌការងារនៃស្ថាប័នរបស់ខ្លួន។ «ទីភ្នាក់ងារអភិវឌ្ឍកុមារតូច» (ECDA) ដែលជាអ្នកមើលការខុសត្រូវនៅតាមសាលាមត្តេយ្យកំពុងពិនិត្យមើលសំណុំរឿងនេះដើម្បីកំណត់ថាត្រូវចាត់វិធានការបែបណាជាបន្តទៀត។ នៅថ្ងៃនេះ សមត្ថកិច្ចសិង្ហបុរីអាចកំណត់អត្តសញ្ញាណអ្នកគ្រូបង្រៀនម្នាក់នោះបានហើយតាមរយៈក្រុមការងារផ្នែកស៊ើបអង្កេត។ ក្រោយមក គេក៏ចាប់ខ្លួនអ្នកគ្រូរូបនោះតែម្ដង។

មិនទុកយូរទេ, សមត្ថកិច្ចកំពុងកសាងសំណុំរឿង និងបញ្ជូនពាក្យបណ្ដឹងទៅតុលាការនៅថ្ងៃពុធស្អែកតែម្ដង។ នៅក្នុងពាក្យបណ្ដឹងនោះ អ្នកគ្រូត្រូវបានចោទប្រកាន់ពីបទប្រព្រឹត្តអំពើហិង្សាចំពោះកុមារតូច ឬមនុស្សវ័យក្មេង។ បើតុលាការរកឃើញថាអ្នកគ្រូពិតជាមានទោសកំហុសដូចការចោទប្រកាន់មែន គាត់អាចនឹងត្រូវផ្ដន្ទាទោសឱ្យជាប់ពន្ធនាគាររហូតដល់៨ឆ្នាំ ឬពិន័យជាប្រាក់រហូតដល់៨ពាន់ដុល្លារសិង្ហបុរី។ ឬមិនដូច្នេះទេ, គាត់ត្រូវតែទទួលនូវទោសបញ្ញត្តិទាំង២នេះតែម្ដង៕

ប្រភព៖ Channel News Asia, The Strait Times
https://www.channelnewsasia.com/singapore/preschool-teacher-kinderland-woodlands-arrested-abuse-3731616
https://www.straitstimes.com/singapore/teacher-under-investigation-for-allegedly-beating-grabbing-children-in-woodlands-pre-school