រាជធានីភ្នំពេញ ៖ តម្លៃប្រេងដែលបានកំពុងតែធ្លាក់ចុះបន្តិច កាលពីពេលថ្មីៗនេះទំនងជាមិនមានស្ថេរភាពយូរអង្វែងឡើយដោយសារតែតម្រូវការប្រេងមានការកើនឡើង ជាពិសេស គឺឥទ្ធិពលនៃការបើកទីផ្សារនៅក្នុងប្រទេសចិន។ ចាប់ពីថ្ងៃទី ១១ ដល់ថ្ងៃទី២០ ខែកុម្ភៈ…
រាជធានីភ្នំពេញ ៖ តម្លៃប្រេងដែលបានកំពុងតែធ្លាក់ចុះបន្តិច កាលពីពេលថ្មីៗនេះទំនងជាមិនមានស្ថេរភាពយូរអង្វែងឡើយដោយសារតែតម្រូវការប្រេងមានការកើនឡើង ជាពិសេស គឺឥទ្ធិពលនៃការបើកទីផ្សារនៅក្នុងប្រទេសចិន។
ចាប់ពីថ្ងៃទី ១១ ដល់ថ្ងៃទី២០ ខែកុម្ភៈ ឆ្នាំ២០២៣ នៅកម្ពុជាតម្លៃប្រេងធម្មតាចុះបន្តិចទេ ប៉ុន្តែម៉ាស៊ូតចុះច្រើន។ ដោយតម្លៃសាំងធម្មតាមានតម្លៃ៤.៤០០រៀល សាំងស៊ុបពែរ៥.០៥០រៀល រីឯម៉ាស៊ូ គឺចុះមកថោកជាងតម្លៃសាំង គឺត្រឹម៤.៣៥០រៀល នៅក្នុងមួយលីត្រ ប៉ុន្តែតម្លៃនេះទំនងជានឹងមិនស្ថេរភាពយូរនោះទេវានឹងមានការប្រែប្រួល។
តម្លៃសាំងនៅកម្ពុជាចុះថោក ខណៈដែលតម្លៃសាំងនៅទីផ្សារអន្តរជាតិគឺមានតម្លៃជាមធ្យម ៣,៤៧ ដុល្លារនៅក្នុងមួយហ្គាឡុងធ្លាក់ចុះ ៣ សេនក្នុងមួយហ្គាឡុងបើធៀបនឹងតម្លៃកាលពីពីសប្តាហ៍មុនគឺ៣,៥០ដុល្លារនៅក្នុងមួយហ្គាឡុង ស្របពេលដែលកាលពីខែមករាវាបានស្ទុះឡើងដល់ទៅ៩សេន។
ដោយឡែកតម្លៃប្រេងម៉ាស៊ូតជាមធ្យមបានធ្លាក់ចុះប្រមាណជា៧,៣ សេនក្នុងសប្តាហ៍មុន ដោយវាមានតម្លៃត្រឹមតែ៤,៥៣ដុល្លារក្នុងមួយហ្គាឡុង ដែលជាកម្រិតទាបបំផុតចាប់តាំងពីថ្ងៃទី៥ ខែមីនា ឆ្នាំ ២០២២មក។ទាំងនេះ គឺជាស្ថានភាពនៃតម្លៃប្រេងឥន្ធនៈនៅលើទីផ្សារអន្តរជាតិ ប៉ុន្តែទោះបីជាយ៉ាងណាក៏ដោយគេពិបាកនឹងព្យាករណ៍តម្លៃថាមពលដ៏សំខាន់នេះណាស់ស្របពេលដែលថ្មីៗនេះ អង្គការនៃក្រុមប្រទេសដែលបាននាំចេញប្រេងដែលហៅកាត់ថា OPEC មានសមាជិក១៣ ប្រទេស បានដំឡើងការព្យាករណ៍ពីកំណើនតម្រូវការប្រេងឆៅពិភពលោកនៅឆ្នាំ២០២៣ ខុសពីដើមឆ្នាំដូច្នេះវាមានន័យថា តម្លៃវានឹងអាចប្រែប្រួល។
តាមព័ត៌មានរបស់បណ្តាញសារព័ត៌មានពិភពលោកបានឲ្យដឹងថា អង្គការ OPEC បានដំឡើងការព្យាករអំពីតម្រូវការប្រេងឆៅពិភពលោកប្រចាំឆ្នាំ២០២៣ របស់ខ្លួនដោយសារតែការបន្ធូរបន្ថយការរឹតត្បិតវិធានការជំងឺកូវីដ-១៩ ដែលបានអនុវត្តនៅក្នុងប្រទេសចិន និងចក្ខុវិស័យសេដ្ឋកិច្ចពិភពលោកថ្មីខណៈដែលស្ថានភាពសង្គ្រាមនៅប្រទេសអ៊ុយក្រែននៅក្នុងសភាពមិនចាញ់មិនឈ្នះ។របាយការណ៍ប្រចាំខែរបស់អង្គការប្រទេសនាំចេញប្រេងឆៅដែលបានចេញកាលពីថ្ងៃទី១៤ថ្មីៗនេះបានអះអាងថា តម្រូវការប្រេងឥន្ធនៈសកលនៅលើពិភពលោកនឹងកើនឡើងខុសពីការរំពឹងទុកកាលពីចុងឆ្នាំ។
អង្គការOPEC បានអះអាងថា នៅឆ្នាំ២០២៣នេះតម្រូវការប្រេងឥន្ធនៈពិភពលោកនឹងកើនដល់ចំនួន២,៣២លានបារ៉ែលក្នុងមួយថ្ងៃ ខណៈដែលពីមុនការព្យាករណ៍គឺមានកម្រិតបរិមាណតិចជាងការព្យាករណ៍ថ្មីប្រមាណជា១០០.០០០ បារ៉ែល។
ប្រភពដដែលបានអះអាងថា ការដកបម្រាមដ៏តឹងរ៉ឹងលើបញ្ហាគោលនយោបាយប្រឆាំងកូវីដ១៩ បានធ្វើឲ្យតម្លៃប្រេងឥន្ធនៈដែលមានស្ថេរភាពមួយរយៈស្ទុះឡើងជាបន្តបន្ទាប់តាំងពីដើមឆ្នាំនោះនឹងបន្តមានឥទ្ធិពលដល់ទីផ្សារប្រេងឥន្ធនៈបន្ថែមទៀត ខណៈដែលចិនត្រូវបានគេដឹងថា មានប្រជាពលរដ្ឋច្រើនជាងគេមានសកម្មភាពសេដ្ឋកិច្ចស្ថិនៅក្នុងលំដាប់ទីពីរ ខណៈដែល តម្រូវការថាមពលក៏សម្បើមផងដែរ ។អង្គការនេះបានអះអាងថា ក្តីបារម្ភស្ថិតនៅត្រង់កម្រិត និងល្បឿននៃការស្ទុះងើបឡើងវិញ នៃសេដ្ឋកិច្ចរបស់ប្រទេសចិន និងឥទ្ធិពលជាបន្តបន្ទាប់ទៅលើតម្រូវការប្រេង។
តាមអង្គការ OPEC នៅពេលដែលទីផ្សារនៅចិនកម្រើកឡើងការព្យាករណ៍ សេដ្ឋកិច្ចក៏នឹងកម្រើកឡើង ដូច្នេះការប្រែប្រួលតម្លៃប្រេងឥន្ធនៈក៏នឹងប្រែប្រួលផងដែរ នាឆ្នាំ២០២៣ ប៉ុន្តែអង្គការនេះក៏បានឱ្យដឹងផងដែរថា ការថមថយសេដ្ឋកិច្ចនៅតែអាចកើតមានដោយលើក ឡើងពីអតិផរណាខ្ពស់ និងការរំពឹងទុកពីការដំឡើងអត្រាការប្រាក់ថែមទៀត។
អ្នកវិភាគបានអះអាងថា នៅពេលដែលទីផ្សារចិនបើកតម្រូវការប្រេងកើន ប៉ុន្តែប្រសិនបើក្រុម ប្រទេសមាជិកនៃអង្គការOPEC នៅតែរួបរួមគ្នាកាត់បន្ថយទិន្នផលប្រេងឆៅដើម្បីគាំទ្រតម្រូវកំណើននៃទីផ្សានោះតម្លៃប្រេងឥន្ធនៈមិនថា តែនៅកម្ពុជាទេនៅទីណាក៏នឹងឡើងថ្លៃបន្ថែម ទៀតហើយ ខណៈដែលគេព្យាករណ៍ថា តម្រូវការប្រេងសាំង និងប្រេងម៉ាស៊ូតនឹងបន្តកើនឡើងនៅក្នុងបរិមាណរហូតដល់ទៅ១,១លានបារ៉ែលនៅក្នុងមួយថ្ងៃ៕ដោយៈ ហេង ចេស្តា
ចែករំលែកព័តមាននេះ