រាជធានីភ្នំពេញ ៖ ប្រធានក្រុមប្រឹក្សាសមាគមផលិតស្បែកជើង និងកាបូបកម្ពុជាបានបង្ហាញពីការប៉ាន់ប្រមាណនៃការបញ្ជាទិញផលិតផលពីទីផ្សារខាងក្រៅប្រទេសនៅឆ្នាំ២០២៣នេះអាចនឹងមានការធ្លាក់ចុះរហូតដល់៤០%។ ដែលការធ្លាក់ចុះនេះ គឺដោយសារកត្តាធំៗមួយចំនួនដែលធ្វើតម្រូវការប្រើប្រាស់នៅខាងក្រៅថមថយ។ អ្នកឧកញ៉ា លីឃុន ថៃ ប្រធានក្រុមប្រឹក្សាសមាគមផលិតស្បែកជើងកម្ពុជាមានប្រសាសន៍ថា…
រាជធានីភ្នំពេញ ៖ ប្រធានក្រុមប្រឹក្សាសមាគមផលិតស្បែកជើង និងកាបូបកម្ពុជាបានបង្ហាញពីការប៉ាន់ប្រមាណនៃការបញ្ជាទិញផលិតផលពីទីផ្សារខាងក្រៅប្រទេសនៅឆ្នាំ២០២៣នេះអាចនឹងមានការធ្លាក់ចុះរហូតដល់៤០%។ ដែលការធ្លាក់ចុះនេះ គឺដោយសារកត្តាធំៗមួយចំនួនដែលធ្វើតម្រូវការប្រើប្រាស់នៅខាងក្រៅថមថយ។
អ្នកឧកញ៉ា លីឃុន ថៃ ប្រធានក្រុមប្រឹក្សាសមាគមផលិតស្បែកជើងកម្ពុជាមានប្រសាសន៍ថា « ការបញ្ជាទិញពីទីផ្សារខាងក្រៅនៅឆ្នាំ២០២៣នេះមើលទៅស្ថានភាពនៃការបញ្ជាទិញស្បែកជើង និងកាបូបមានការធ្លាក់ចុះ ហើយទំនោនៃការធ្លាក់ចុះនេះមានតាំងពីចុងឆ្នាំ២០២២។ការធ្លាក់ចុះបរិមាណនៃការបញ្ជាទិញផលិតផលស្បែកជើងនិងកាបូបនៅឆ្នាំ២០២៣នេះយើងមើលទៅមានប្រហែល៣០ឬ៤០%»។
អ្នកឧកញ៉ា គូសបញ្ជាក់ថា កត្តាដែលនាំឱ្យការបញ្ជាទិញមានការធ្លាក់ចុះនេះដោយសារបញ្ហាខាងក្រៅដូចជា សង្គ្រាមអ៊ុយក្រែ និងរុស្ស៊ី បានធ្វើឱ្យទំនិញនៅលើពិភពលោក វត្ថុធាតុដើមឡើងថ្លៃ។បញ្ហាជំងឺកូវីដ១៩ បានធ្វើឱ្យប៉ះពាល់ដល់សេដ្ឋកិច្ចពិភពលោក ជាហេតុធ្វើឱ្យប៉ះពាល់ទៅដល់ប្រាក់ចំណូលរបស់ប្រជាពលរដ្ឋនៅអឺរ៉ុប សហរដ្ឋអាមេរិក និងនៅតាមបណ្តាប្រទេសផ្សេងៗ។កាលណាប្រាក់ចំណូលពួកគាត់ធ្លាក់ចុះវាធ្វើឱ្យការលក់នៅលើទីផ្សារធ្លាក់ចុះតាម ហើយអ្នកបញ្ជាទិញដែលលក់ទំនិញមិនទាន់អស់ដល់អីចឹងការបញ្ជាទិញធ្លាក់ចុះ។
អ្នកឧកញ៉ា សង្កត់ធ្ងន់ថា«ការបញ្ជាទិញផលិតផលស្បែកជើង និងកាបូបធ្លាក់ចុះនេះ ខ្ញុំគិតថា និងធ្វើឱ្យកម្មករកាត់បន្ថយប្រាក់ចំណូល ហើយការថែមម៉ោងធ្វើការអត់មាន។លើសពីនេះនៅកន្លែងខ្លះអាច និងមានការកាត់បន្ថយបុគ្គលិកធ្វើការដោយសាររោងចក្រមិនទាន់បានការបញ្ជាទិញ ឬការបញ្ជាទិញមានតិចតួច»។
លោក អាត់ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឱ្យដឹងថា តាមពិតទៅការកម្ម៉ង់ទិញពីទីផ្សារអន្តរជាតិធំៗនៅអឺរ៉ុប និងសហរដ្ឋអាមេរិកជាដើមនេះ គឺមានរយៈពេល៣ខែ ៦ខែ ១ឆ្នាំឬ២ឆ្នាំ ទៅតាមរយៈពេលកំណត់ដែលយើងធ្លាប់សិក្សា ឬពិភាក្សាគ្នា។លោកលើកឡើងថា នៅប៉ុន្មានឆ្នាំចុងក្រោយនេះការកម្ម៉ង់ទិញពីទីផ្សារក្រៅលែងមានរយៈពេលដល់២ឆ្នាំទៀតហើយ មានតែ៣ខែ៦ខែនិង១ឆ្នាំប៉ុណ្ណោះ។ការកម្ម៉ង់ទិញដែលមានរយៈពេលខ្លីវាមិនមែនមានន័យថា វាផ្តល់ភាពងាយស្រួលសម្រាប់អ្នកផ្គត់ផ្គង់ទេ ឬអ្នកបញ្ជាទិញខ្លួនឯងនោះទេ ដោយសារវាគ្មានជម្រើសដោយសារវាមានហានិភ័យ គេបារម្ភខ្លាចបញ្ជាទិញហើយអ្នកផ្គត់ផ្គង់គេផលិតបានហើយបែរជាអត់យកក៏ទទួលខុសត្រូវដែរ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាមានប្រសាសន៍ថា«យើងមើលឃើញនៅក្នុងឆមាសទីមួយ ដើមឆ្នាំ២០២២កន្លងមកគឺមានការកម្ម៉ង់ទិញឥវ៉ាន់មានច្រើនមែនទែន។ តែមកដល់ចុងឆ្នាំ២០២២ការកម្ម៉ង់ទំនិញមានការធ្លាក់ចុះហើយមកដល់ដើមឆ្នាំ២០២៣នេះ ការកម្ម៉ង់ក៏មានមិនច្រើនដែរ បើយើងប្រៀបធៀបទៅ និងឆមាសទី១ ដើមឆ្នាំ២០២២អាចមានការថមថយពី១០ទៅ២០% ។មានន័យថា ការកម្ម៉ង់ទំនិញនៅឆ្នាំ២០២៣នេះ អាចមានភាពប្រហាក់ប្រហែលទៅ និងការកម្ម៉ង់កាលឆមាសទីពីរឆ្នាំ២០២២»។តាមរយៈពេលយើងបានសិក្សា ឬបានជួបក្រុមអ្នកបញ្ជាទិញខ្លះៗមិនថា ផលិតផលសម្លៀកបំពាក់នោះទេ អាចសូម្បីតែផលិតផលកាបូប និងស្បែកជើងអាចមានការថមថយប្រហាក់ប្រហែលគ្នា»។
លោកបន្តថា ជាការពិតនៅពេលការកម្ម៉ង់ទំនិញពីទីផ្សារខាងក្រៅ មានការធ្លាក់ចុះប្រាកដណាស់ អ្នកផលិត និងជួបការលំបាកព្រោះអត់មានអ្វីផលិតហើយកម្មករក៏អត់មានការងារធ្វើដែរ។ដូចនេះដើម្បីដោះស្រាយបញ្ហានេះត្រូវធ្វើយ៉ាងម៉េចឱ្យមានការកម្ម៉ង់ទំនិញមានច្រើនជាងមុន បើមិនដូច្នោះទេនឹងមានការព្យួរការងារនោះនិងធ្វើឱ្យកម្មករជួបការលំបាក។
បើតាមលោកអាត់ធន់ ការបញ្ជាទិញឬការកម្ម៉ង់ពីទីផ្សារខាងក្រៅ មានធ្លាក់ចុះដោយសារកត្តាGSPនៅអាមេរិកមិនទាន់ផ្តល់ឱ្យតាំងពីដើមឆ្នាំ២០២០ ហើយក្រុមហ៊ុនដែលបញ្ជាទិញត្រូវបង់ពន្ធដោយខ្លួនឯង។ ហេតុដូច្នេះគាត់រំពឹងថា និងបានចំណែកនៃការបញ្ជាទិញពីសហរដ្ឋអាមេរិកមកវិញតាមការបង់ពន្ធ។តែបើមានការចុះកិច្ចព្រមព្រៀងថ្មីនោះទេ ខាងក្រុមហ៊ុនត្រូវបង់រហូតធ្វើឱ្យគាត់ខាត។កត្តាEBAនៅខាងអឺរ៉ុបភាពអនុគ្រោះ២០%ត្រូវបានកាត់ផ្តាច់ហើយប៉ុន្មាន%ផ្សេងទៀតអាចនិងមានបញ្ហាដែរ,បញ្ហាសង្គ្រាមរវាងរុស្ស៊ីនិងអ៊ុយ។លើសពីនេះគួបផ្សំជាមួយកម្ពុជារៀបចំការបោះឆ្នោតថ្នាក់ជាតិផងនោះ ធ្វើឱ្យអ្នកបញ្ជាទិញមានការប្រយ័ត្នប្រយែង បើទោះបីនៅពេលធម្មតាមានការបញ្ជាទិញច្រើនគេអាចមានការកាត់បន្ថយឬបញ្ជាទិញក្នុងរយៈពេលខ្លី។
លោកបណ្ឌិត គីសេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាមើលឃើញថា«ក្នុងវិស័យកាត់ដេរក្នុងករណីទីផ្សារនៅខាងអឺរ៉ុបមិនមានការបញ្ជាទិញទំនិញដូចមុនឬការបញ្ជាទិញមានការថមថយនោះ យើងឃើញថាមានការបញ្ជាទិញនៅខាងទីផ្សារសហរដ្ឋអាមេរិក។ជាចក្ខុវិស័យយើងមើលវិស័យវាយនភណ្ឌ កាត់ដេរសម្លៀកបំពាក់ និងស្បែកជើងនេះមិនមានការថមថយនៅកំម្លាំងផលិតនោះទេ គឺនៅមានសន្ទុះទៅមុខជាសន្សឹមៗខណៈវិបត្តិនៅអឺរ៉ុបនៅតែបន្តកើតមានដោយសារតែទីផ្សារគាំទ្ររបស់កម្ពុជាមួយទៀតគឺទីផ្សារសហរដ្ឋអាមេរិក»៕
ចែករំលែកព័តមាននេះ