គេសង្កេតឃើញកសិករម្នាក់ ដាំអំពៅលើចំការដែលមានផ្ទៃដីចំនួនជាង៣០ហិកតា ស្ថិតនៅក្នុងភូមិពេជ្រគីរី សង្កាត់ប៉ៃលិន ក្រុងប៉ៃលិន ខេត្តប៉ៃលិន បានត្អូញត្អែរពីតម្លៃទីផ្សារអំពៅ មានការ
ខេត្តប៉ៃលិន ៖ រហូតមកដល់ថ្ងៃទី០៧ ខែកញ្ញា ឆ្នាំ២០២២នេះ គេសង្កេតឃើញកសិករម្នាក់ ដាំអំពៅលើចំការដែលមានផ្ទៃដីចំនួនជាង៣០ហិកតា ស្ថិតនៅក្នុងភូមិពេជ្រគីរី សង្កាត់ប៉ៃលិន ក្រុងប៉ៃលិន ខេត្តប៉ៃលិន បានត្អូញត្អែរពីតម្លៃទីផ្សារអំពៅ មានការធ្លាក់ថ្លៃ ហើយលំបាករកកម្មករឱ្យចូលទៅប្រមូលផល។
បើតាមការរៀបរាប់ពីស្ត្រីម្នាក់ មានឈ្មោះ ប៊ូ សារឿន អាយុ៦៧ឆ្នាំ បានឱ្យដឹងថា ៖ គាត់ចាប់ផ្តើមដាំអំពៅនេះចាប់តាំងពីឆ្នាំ២០១៧ ដោយដាំដំបូងជួបនឹងបញ្ហាធ្លាក់ថ្លៃ រហូតដល់ឆ្នាំ២០១៨-២០១៩ មានការឡើងថ្លៃវិញ ហើយគាត់ចាប់ផ្តើមប្រមូលផលលក់ឱ្យឈ្មួញជារៀងរាល់ថ្ងៃផងដែរ។
គាត់បន្តទៀតថា តែនៅដើមឆ្នាំ២០២០នេះ ដោយសារតែបញ្ហាជំងឺកូវីដ១៩ ហើយមានអ្នកដាំច្រើន ធ្វើឱ្យតម្លៃទីផ្សារមានការធ្លាក់ចុះខ្លាំងស្ទើរតែងើបមុខលែងរួច។ ហើយការដែលគាត់ដាំអំពៅនេះ គឺគោលបំណងបញ្ចេញរាល់ថ្ងៃ មិនឱ្យស្ទះឡើយ ទោះបីជាថោក ឬថ្លៃក៏ដោយ។ តែដល់ពេលមានបញ្ហាវិបត្តិសេដ្ឋកិច្ច ដោយសារជំងឺរាតត្បាតធ្វើឱ្យអ្វីៗដែលគាត់កំពុងតែទទួលបានផល បែរជាខកចិត្តទៅវិញ។
ស្ត្រីខាងលើបន្តថា ចំពោះបញ្ហាសត្វល្អិតវិញ មិនមានការប៉ះពាល់ដល់ដំណាំអំពៅរបស់គាត់ឡើយ តែក៏មានបញ្ហាមេរោគចូលស៊ីរូងក្នុងថ្នាំងអំពៅម្តងដែរ ហើយគាត់ក៏រកវិធីទប់ស្កាត់ទាន់ពេលវេលា។ គាត់ចាប់ផ្តើមដាំក្នុងគោលបំណងដឹកយកទៅចូលរោងចក្រ ដែលជនជាតិថៃចូលមកបង្កើតនៅស្រុកសំពៅលូន ខេត្តបាត់ដំបង ហើយក្រោយមករោងចក្រនេះ ក៏ក្ស័យធនបាត់អស់ទៅដែរ ខណៈមេរោគកូវីដ១៩ ចូលមកវា.យលុកខ្លាំងទៀត។ ក្រោយមកគាត់ ក៏កាត់លក់ឯកជន ដោយសព្វថ្ងៃឈ្មួញទិញ១បាច់ (១០ដើម) តម្លៃ២០០០រៀលទៅ២៥០០រៀល ដោយជួលថ្លៃកម្មករ ជួលរថយន្តដឹក មិនមានការចំណេញប៉ុន្មាននោះទេ។
គាត់បញ្ជាក់ទៀតថា រហូតមកដល់សព្វថ្ងៃនេះ កម្មករអត់សូវមាន ហើយទារថ្លៃខ្ពស់ ធ្វើឱ្យគាត់មានការលំបាកខ្លាំង ក៏បន្ថយការដាំមកនៅសល់ត្រឹមតែ៥ទៅ៦ហិកតា ដើម្បីកាត់លក់ឱ្យប្រជាពលរដ្ឋទិញយកទៅគាបទឹកលក់តាមភូមិតែប៉ុណ្ណោះ។ ប៉ុន្តែសព្វថ្ងៃនេះ គាត់ក៏បានរៀនគាបទឹកអំពៅយកទៅធ្វើជាស្ករអំពៅ ដើម្បីលក់នៅតាមភូមិ សម្រាប់ផ្គត់ផ្គង់ជីវភាព ព្រោះស្ករនេះក៏មានរសជាតឈ្ងុយឆ្ងាញ់ផងដែរ៕
ចែករំលែកព័តមាននេះ