ផ្សាយឡើងវិញ
ខេត្ដកណ្ដាល ៖ ស្ដ្រីម្នាក់ និងកូនប្រុសស្រីចំនួន១០នាក់ រស់នៅក្នុងភូមិព្រែកក្មេង ឃុំព្រែកក្មេង ស្រុកល្វាឯម បានក្លាយជាស្ដ្រីមេម៉ាយ និងកូនកំព្រា បន្ទាប់ពីប្ដី និងឪពុកបានចង.កធ្វើអត្ដឃាត ធ្វើឱ្យគ្រួសារទាំងមូលរស់នៅតែលតោល និងមានជីវភាពក្រលំបាកបានព្រឹកខ្វះល្ងាចនោះ ពេលនេះសប្បុរសជនបានផ្ដល់អំណោយជាថវិកាដល់ ក្រុមគ្រួសារនេះចំនួន១៩០ដុល្លារអាមេរិក។
អំណោយនេះត្រូវបានសប្បុរសជនផ្ដល់តាមរយៈការិយាល័យនិពន្ធកោះសន្ដិភាព ហើយត្រូវបានភ្នាក់ងារប្រចាំនៅខេត្ដកណ្ដាល នាំយកទៅជូនដល់ក្រុមគ្រួសារដែលបានបាត់បង់ប្ដី និងមានជីវភាពក្រលំបាកនេះ ដោយមានការចូលរួមពីលោកមេប៉ុស្ដិ៍នគរបាលរដ្ឋបាលឃុំព្រែកក្មេងផងដែរ កាលពីព្រឹកថ្ងៃទី ១០ កុម្ភៈ ឆ្នាំ២០១០ ។
ជាមួយទឹកចិត្ដដ៏ថ្លៃថ្លារបស់សប្បុរសជនស្ដ្រីឈ្មោះម៉ុល ខុម អាយុ៤៨ឆ្នាំ មានមុខរបរជាកសិករ បានថ្លែងអំណរគុណយ៉ាងជ្រាលជ្រៅដល់សប្បុរសជន ដែលបានផ្ដល់ជាថវិកាដល់គាត់ និងបានថ្លែងអំណរគុណដល់សារព័ត៌មានកោះសន្ដិភាពផងដែរ ដែលជានិច្ចកាលតែងតែជួយឈឺឆ្អាល និងជួយរំលែកទុក្ខដល់គ្រួសារដែលមានជីវភាពក្រលំបាក។ ស្ដ្រីម៉ុល ខុម បានជូនពរដល់សប្បុរសជនទាំងអស់ ក៏ដូចជាលោកឧកញ៉ាថុង អ៊ុយប៉ាង អភិបាលសារព័ត៌មានកោះសន្ដិភាព និងសហការីទាំងអស់ សូមជួបប្រទះនឹងពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបី ឃ្លៀងឃ្លាតឡើយ ។
គួររំលឹកដែរថា បុរសឈ្មោះផាន់ វិត អាយុ៤៨ឆ្នាំ រស់នៅភូមិ-ឃុំព្រែកក្មេង ស្រុកល្វាឯម ជាកសិករ បានចង.កសម្លាប់ខ្លួននៅលើផ្ទះក្នុងខណៈពេលដែលស្ដ្រីជាប្រពន្ធ ឈ្មោះម៉ុល ខុម កំពុងដោតចង្កាក់ត្រីដើម្បីយកទៅលក់នៅឯផ្សារ ដែលហេតុការណ៍នេះបានកើតឡើងកាលពីថ្ងៃទី១៧ ធ្នូ ២០០៩ ។
ក្នុងករណីដែលបុរសផាន់ វិត ធ្វើអត្ដឃាតនេះ ស្ដ្រីជាប្រពន្ធឈ្មោះម៉ុល ខុម បានរៀបរាប់ឱ្យដឹងថា ក្រោយពេលដែលគាត់ និងប្ដីរបស់គាត់បានរៀបការរួចមក ក៏បានកូនចំនួន១០នាក់ក្នុងនោះមានកូនស្រីចំនួន៣នាក់ ដែលកូនបងមានអាយុ២៧ឆ្នាំ និងកូនពៅអាយុ៤ឆ្នាំ។ ស្ដ្រីម៉ុល ខុម បានបន្ដថា កន្លងមកប្ដីរបស់គាត់តែងតែដើរផឹកស្រាស្រវឹងជារៀងរាល់ថ្ងៃ មិនដែលជួយធ្វើកិច្ចការផ្ទះឡើយ ទុកឱ្យគាត់រកស៊ីចិញ្ចឹមកូនតែម្នាក់ឯង។ នៅពេលដែលប្ដីរបស់គាត់រាវលៀសយកទៅលក់បានលុយ ក៏មិនដែលជួយទំនុកបំរុងក្នុងគ្រួសារនោះទេ គឺយកទៅទិញស្រាផឹកអស់ ។
ស្ដ្រីម៉ុល ខុម បានឱ្យដឹងទៀតថា នៅព្រឹកថ្ងៃកើតហេតុខាងលើគាត់បានឱ្យប្ដីរបស់គាត់ជួយធ្វើចង្កាក់សំរាប់ដោតត្រី តែប្ដីរបស់គាត់មិនធ្វើតាមគាត់ប្រាប់ឡើយ ហើយនៅពេលនោះគាត់ក៏បានស្ដីបន្ទោសឱ្យបន្ដិចបន្ដួច ស្រាប់តែប្ដីរបស់គាត់ឡើងទៅលើផ្ទះយកក្រមាចង.កសម្លាប់ខ្លួនតែម្ដង ។
អំណោយជាទឹកប្រាក់១៩០ដុល្លារនេះ បានទទួលពីលោកណុប ច័ន្ទតារា សហការីកោះសន្ដិិភាពប្រចាំក្រុងឡងប៊ិច រដ្ឋកាលីហ្វ័រនីញ៉ា ដែលទទួលបានពី ៖
-លោកស៊ុយ ប៊ុនហេង និងអ្នកស្រីព្រំ គឹមយាង ១០០ដុល្លារ
-អ្នកស្រី មាន សុភា ២០ដុល្លារ
-អ្នកស្រីស៊ុយ វណ្ណា និង ស្វាមី ៤០ដុល្លារ
-ស៊ុយ វណ្ណៈ ១០ដុល្លារ
-ស៊ុយ វាន់នី ១០ដុល្លារ
-ស៊ុយ ធីតា ១០ដុល្លារ
សរុបទឹកប្រាក់២២០ដុល្លារ តែម្ចាស់អំណោយបានកាត់សំរាប់ថ្លៃវេរ និងសោហ៊ុយសំរាប់អ្នកយកព័ត៌មាន៣០ដុល្លារ ។
បញ្ជាក់ ៖ យើងខ្ញុំសូមអភ័យទោសចំពោះម្ចាស់អំណោយដែលមិនបានឃើញព័ត៌មាននេះ ដោយសារវ៉េបសាយយើងខ្ញុំស្ថិតក្នុងការសាកល្បង ដូចេ្នះមានព័ត៌មានមួយចំនួនបានបាត់បង់នៅលើគេហទំព័រដោយចៃដន្យ។
សូមអរគុណចំពោះការគាំទ្រ
ចែករំលែកព័តមាននេះ