ខេត្តកោះកុង ៖ កម្លាំងជំនាញនគរបាលព្រហ្មទណ្ឌកំរិតធ្ងន់ នៅវេលាម៉ោង១និង៤៥នាទីរសៀលថ្ងៃទី២៣ ខែឧសភា ឆ្នាំ២០២២ បានឃាត់ខ្លួនជនសង្ស័យម្នាក់ ធ្វើនៅចំណុចភូមិពាមកាយ ឃុំកោះស្តេច ស្រុកគីរីសាគរខេត្តកោះកុង តាមដីការបស់តុលាការ ។
លោកវរសេនីយឯក ឆឹង វាសនា ស្នងការរង ទទួលការិយាល័យនគរបាលព្រហ្មទណ្ឌកំរិតធ្ងន់ បានដឹកនាំកម្លាំងជំនាញនគរបាលព្រហ្មទណ្ឌកំរិតធ្ងន់ សហការជាមួយកម្លាំងជំនាញនគរបាលព្រហ្មទណ្ឌ នៃអធិការដ្ឋាននគរបាលស្រុកគីរីសាគរ បានចាប់ឃាត់ខ្លួនឈ្មោះ យ៉ន វីរៈ ភេទប្រុស អាយុ២២ឆ្នាំ ជនជាតិខ្មែរ មុខរបរកម្មករ មានទីលំនៅភូមិ២ ឃុំពាក្រសោប ស្រុកមណ្ឌលសីមា ខេត្តកោះកុង ពីបទហិ.ង្សាដោយចេតនាមានស្ថានទម្ងន់ទោស ដោយសារ មរណភាព នៃជនរងគ្រោះ ប្រព្រឹត្តនៅភូមិ១ សង្កាត់ដងទង់ ក្រុងខេមរភូមិន្ទ ខេត្តកោះកុង ។
លោកវរសេនីយឯក ឆឹង វាសនា បានឲ្យដឹងថា ការអនុវត្តចាប់ខ្លួនឈ្មោះ យ៉ន វីរៈ នេះធ្វើឡើងតាមដីកាបង្គាប់ឲ្យចាប់ខ្លួនលេខ១៥ ចុះថ្ងៃទី១៩ ខែមករា ឆ្នាំ២០២២ ចេញដោយលោក កែវ សុខា ប្រធានក្រុមប្រឹក្សាជំនុំជម្រះ នៃសាលាដំបូងខេត្តកោះកុង ។
លោកស្នងការរង បានបញ្ជាក់ថា ឈ្មោះ យ៉ន វីរៈ បន្ទាប់ពីធ្វើសកម្មភាពរួចបានរត់គេចខ្លួនរស់នៅជាច្រើនកន្លែង អស់រយៈពេលជាង ១ឆ្នាំ ប៉ុន្តែកម្លាំងជំនាញ នៅតែបន្តស្រាវជ្រាវ រហូតដល់ធ្វើការចាប់ខ្លួន បាននៅថ្ងៃខែដូចខាងលើនេះ ។
បច្ចុប្បន្ន ជនសង្ស័យ ត្រូវបានកម្លាំងជំនាញ កំពុងបំពេញបែបបទ បញ្ជូនទៅអយ្យការអមសាលាដំបូងខេត្តកោះកុង តាមនិតីវិធី ៕
ចែករំលែកព័តមាននេះ