រាជធានីភ្នំពេញ ៖ លោកជំទាវម្នាក់កាលពីរសៀលថ្ងៃទី៤ ខែឧសភា ឆ្នាំ២០២២ ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃឃាត់ខ្លួន និងបញ្ជូនទៅសាលាដំបូងរាជធានីភ្នំពេញ ដោយរងនូវការចោទប្រកាន់ថា «ឆបោ.ក និងចេញមូលប្បទានប័ត្រគ្មានសាច់ប្រាក់ឲ្យអតិថិជន ពាក់ព័ន្ធសំណុំរឿងទិញ-លក់ដីធ្លី» ។
លោកជំទាវដែលរងនូវការចោទប្រកាន់នោះ មានឈ្មោះ ឈិន ដាណា អាយុ៤៧ឆ្នាំ ជាអគ្គនាយិកាក្រុមហ៊ុន «ម៉ា ឈិន ដាណាបាន ហេង ហេង គ្រុប» មានអាសយដ្ឋានស្នាក់នៅបុរីឌឺផ្លរ៉ា ផ្ទះលេខ០៣ វិថីឌឺផ្លរ៉ា១ ស្ថិតក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។
ហើយការនាំខ្លួនលោកជំទាវចូលតុលាការ គឺសមត្ថកិច្ចបានធ្វើឡើងតាមដីកាបង្គាប់ឲ្យចាប់ខ្លួនរបស់លោក កេត សុជាតិ ចៅក្រមស៊ើបសួរសាលាដំបូងរាជធានីភ្នំពេញ ក្រោមបទចោទប្រកាន់ ឆបោ.ក និងមិនបំពេញកាតព្វកច្ចចំពោះឧបករណ៍ដែលអាចជួញដូរបាន ដែលប្រព្រឹត្តនៅរាជធានីភ្នំពេញ កាលពីថ្ងៃទី០៦ ខែកក្កដា ឆ្នាំ២០២០ និងថ្ងៃទី២១ ខែតុលា ឆ្នាំ២០២០ ដោយយោងតាមមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ និងមាត្រា ២៣១ នៃច្បាប់ស្ដីពី ឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់ ។
ពាក់ព័ន្ធនៅអំឡុងចុងឆ្នាំ២០២០ លោកជំទាវ ឈិន ដាណា បានធ្វើកិច្ចសន្យាលក់ដីទំហំ៣ហិកតា ស្ថិតនៅស្រុកអូររាំង ខេត្តមណ្ឌលគិរី ក្នុងតម្លៃ៦០ម៉ឺនដុល្លារអាមេរិក ឲ្យទៅបុគ្គលម្នាក់ ។ ដោយមានការជឿជាក់លើលោកជំទាវ ឈិន ដាណា ភាគីដើមបណ្តឹងបានបង់ប្រាក់ថ្លៃដីគ្រប់ចំនួនឲ្យទៅលោកជំទាវ តែក្រោយពីបានលុយអស់ហើយ លោកជំទាវអត់មានដីឲ្យទៅដើមបណ្តឹងនោះទេ ។ សំណុំរឿងនេះ ត្រូវបានសមត្ថកិច្ចបញ្ជូនទៅដល់ដៃចៅក្រមស៊ើបសួរ ហើយចៅក្រមស៊ើបសួរក៏បានបើកការសាកសួរ រហូតដល់ព្រលប់ថ្ងៃដដែល ទើបសម្រេចឲ្យលោកជំទាវវិលត្រឡប់ទៅផ្ទះវិញ ដោយតម្រូវដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ។
ដូចតាមការចោទប្រកាន់ខាងលើនេះ កោះសន្តិភាពមិនអាចរកការទំនាក់ទំនងបំភ្លឺពីលោកជំទាវ ឈិន ដាណា បានទេ ។
ចែករំលែកព័តមាននេះ