រាជធានីភ្នំពេញ ៖ ប្រឈមនឹងជីកសិកម្មឡើងថ្លៃទ្វេដងនាពេលនេះ លោកឧកញ៉ា ម៉ុង ឬទ្ធី ដែលជាសេដ្ឋីដូងប្រេងនៅកម្ពុជាបានលើកទឹកចិត្តឱ្យកសិករផលិតជីកំប៉ុសដោយខ្លួនឯងសម្រាប់ការដាំដុះ ។ ជាមួយគ្នានេះលោកក៍ចង់ឱ្យកសិករងាកចេញពីការដាំស្វាយកែវរមៀត ដែលគ្រប់គ្នាបានដាំនោះ…
រាជធានីភ្នំពេញ ៖ ប្រឈមនឹងជីកសិកម្មឡើងថ្លៃទ្វេដងនាពេលនេះ លោកឧកញ៉ា ម៉ុង ឬទ្ធី ដែលជាសេដ្ឋីដូងប្រេងនៅកម្ពុជាបានលើកទឹកចិត្តឱ្យកសិករផលិតជីកំប៉ុសដោយខ្លួនឯងសម្រាប់ការដាំដុះ ។ ជាមួយគ្នានេះលោកក៍ចង់ឱ្យកសិករងាកចេញពីការដាំស្វាយកែវរមៀត ដែលគ្រប់គ្នាបានដាំនោះ មកដាំស្វាយប្រភេទផ្សេងដែលមានទីផ្សារល្អជាង ។
សមាជិកព្រឹទ្ធសភា ឧកញ៉ា ម៉ុង ឬទ្ធី បានរៀបរាប់ថា បច្ចុប្បន្ននេះផ្លែស្វាយកែវរមៀតធ្លាក់ថ្លៃ ដែលមិនធ្លាប់ជួបប្រទះពីមុនមក ។ លោកថា កាលថ្ងៃទី ២៧ ខែកុម្ភៈ លោកបានលក់ស្វាយកែវរមៀត ទៅឱ្យឈ្មួញវៀតណាម បានត្រឹមតែតម្លៃ ៤០០ រៀលមួយគីឡូក្រាមតែប៉ុណ្ណោះ ប្រៀបធៀបរយៈពេលកន្លងមកបានតម្លៃជាមធ្យមពី ៨០០ ទៅ១.២០០ រៀល ។ លោកអះអាងថា បើនិយាយពីតម្លៃជីកសិកម្មប្រភេទ 20-20-15 វិញ កាលឆ្នាំទៅមានតម្លៃ ៤២០ដុល្លារអាមេរិកក្នុងមួយតោន តែបច្ចុប្បន្ននេះជាមធ្យម ៨២០ ដុល្លារអាមេរិកក្នុងមួយតោន ។
«ខ្ញុំចង់ឱ្យកសិករយើងងាកមកផលិតជីសេរីរាង្គដោយខ្លួនឯងវិញម្តង សម្រាប់ពេលនេះបើយើងទិញជីសេរីរាង្គនាំចូលតម្លៃ ៤២០ ដុល្លារអាមេរិកក្នុងមួយតោន ដែលពីមុនមកតម្លៃជាមធ្យមគឺតែ ២២០ ដុល្លារអាមេរិកក្នុងមូយតោន ។ តែបើខ្ញុំផលិតជាក់ស្តែងដោយផ្ទាល់វិញអស់តែ ២៤ ដុល្លារអាមេរិកក្នុងមួយតោនទេ» នេះបើតាមការបញ្ជាក់របស់លោកឧកញ៉ា ម៉ុង ឬទ្ធី នៅបណ្តាញទំនាក់ទំនងសង្គមរបស់លោក ។
ម្ចាស់ចម្លារដូងប្រេងតែមួយនៅកម្ពុជា ចង់ឱ្យកសិករប្តូរពូជស្វាយកែវរមៀត មកដាំស្វាយដកម៉ៃ, អេវិន, អាយវិន និងប៉ោមអូស្ត្រាលី ។ លោកថា ស្វាយបីបួនប្រភេទនេះ បច្ចុប្បន្នលក់បានតម្លៃជាមធ្យម ១៦.០០០ រៀលមួយគីឡូក្រាម ។
លោក គឹម សុងឈី អ្នកប្រចាំការនៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ឱ្យដឹងថា ក្រោយពីការប្រកាសរបស់លោកឧកញ៉ា ម៉ុង ឬទ្ធី មក មានប្រជាពលរដ្ឋបានទូរស័ព្ទមកសួរនាំអំពីដំណាំស្វាយនោះ ។លោកថា ពលរដ្ឋចង់ដឹងអំពីការបង្កាត់ទៅពូជស្វាយណាំដកម៉ៃ, អេវិន, អាយវិន និងស្វាយផ្សេងទៀតយកទៅដាំ ។
ទោះយ៉ាងណាលោកឧកញ៉ា ម៉ុង ឬទ្ធី បានបញ្ជាក់ថា ការដាំដុះស្វាយ ណាំដកម៉ៃ, អេវិន,ជាដើមនោះ បើដាំដុះខ្នាតតូចប្រើកម្លាំងខ្លួនឯងអាចចិញ្ចឹមឆ្នាំងបាន តែបើធ្វើខ្នាតធំកម្លាំងពលកម្មជួលគេ នោះក៍ពិបាករកចំណេញដែរ ៕
ចែករំលែកព័តមាននេះ