ខេត្តបាត់ដំបង ៖ ស្ត្រីម្នាក់ និងបុរសម្នាក់បានត្រូវសមត្ថកិច្ចឃាត់ខ្លួនកាលពីព្រឹកថ្ងៃទី១៥ ធ្នូ ខណៈកំពុងធ្វើដំណើរតាមផ្លូវដល់ភូមិអូរចំណិប ឃុំតាស្ដា ស្រុកសំពៅលូន ក្រោយពីសង្ស័យថា ពួកគេមានរក្សាទុកគ្រឿងញៀននៅជាប់ខ្លួន ។ លោកពេជ្រ សារ៉ែន អធិការនគរបាលស្រុកសំពៅលូនឱ្យដឹងថា សមត្ថកិច្ចរបស់លោកបានរកឃើញថ្នាំញៀនប្រភេទមេតំហ្វេតាមីនចំនួន២០០គ្រាប់ ក្រោយពីឃាត់ខ្លួនឆែកឆេរលើខ្លួនពួកគេ ។
ជនសង្ស័យទាំង២នាក់នេះម្នាក់ឈ្មោះជួន មឿន ភេទប្រុស អាយុ៣៩ឆ្នាំ និងម្នាក់ទៀតឈ្មោះសាយ ផល្លា ហៅ ផល ភេទស្រី អាយុ២៨ឆ្នាំ ពួកគេរស់នៅក្នុងភូមិអូរដា ឃុំបួ ស្រុកភ្នំព្រឹក ។ លោកអធិការបញ្ជាក់ថា ជនទាំងពីរនាក់នេះបាននាំយកថ្នាំញៀនទាំងនោះបម្រុងមកលក់បន្តនៅក្នុងមូលដ្ឋានរបស់លោក តែត្រូវសមត្ថកិច្ចជំនាញបង្ក្រាបទាន់ពេលវេលា ។
ស្ត្រីឈ្មោះសាយ ផល្លា ហៅផលនិយាយថា ខ្លួនទើបប្រកបរបរនេះជាលើកទី២ តាមគេតាមឯងដើម្បីរកកម្រៃចិញ្ចឹមកូន ព្រោះខ្លួនជាស្ត្រីមេម៉ាយ ។ រីឯឈ្មោះជួន មឿន សារភាពថា ខ្លួនពិតបានរក្សាទុកថ្នាំញៀនទាំងនោះមែន ។ ជននេះបញ្ជាក់ថា ខ្លួនតែងនាំថ្នាំញៀននេះពីប្រទេសថៃចូលមកស្រុកខ្មែរ ហើយលក់បន្តទៅតាមបណ្ដាស្រុកនានាតាមតំបន់ព្រំដែន ។
មន្ត្រីជំនាញបញ្ជាក់ដែរថា ជនសង្ស័យទាំង២នាក់ខាងលើនេះគឺជាមុខសញ្ញាដែលយើងទើបកំណត់បានថ្មីៗ ហើយកម្លាំងជំនាញក៏តាមដានសកម្មភាពពួកគេរហូតឈានដល់ការបង្ក្រាបបានតែម្ដង ។ មន្ត្រីដដែលបន្តថា ជនសង្ស័យទាំង២នាក់ត្រូវបានកសាងសំណុំរឿងបញ្ជូនទៅសាលាដំបូងរួមជាមួយនឹងវត្ថុតាង ៕
ចែករំលែកព័តមាននេះ