រាជធានីភ្នំពេញ ៖ លោកឱម យ៉ិនទៀង ប្រធានអង្គភាពប្រឆាំងអំពើពុករលួយបានមានប្រសាសន៍កាលពីថ្ងៃទី៩ ធ្នូ ថា អង្គភាពប្រឆាំងអំពើពុករលួយ សូមជម្រាបជូនបងប្អូនជនរួមជាតិទាំងអស់ថា ឆ្នាំ២០១៣ ដែលនឹងមកដល់ក្នុងពេលឆាប់ខាងមុខនេះ គឺជាឆ្នាំប្រយុទ្ធប្រឆាំងនឹងអំពើពុករលួយមួយកម្រិតថែមទៀត។ ឆ្នាំថ្មីនេះ ពេញមួយខែមករា ជាការចាប់ផ្តើមប្រកាសទ្រព្យសម្បត្តិ និង
រាជធានីភ្នំពេញ ៖ លោកឱម យ៉ិនទៀង ប្រធានអង្គភាពប្រឆាំងអំពើពុករលួយបានមានប្រសាសន៍កាលពីថ្ងៃទី៩ ធ្នូ ថា អង្គភាពប្រឆាំងអំពើពុករលួយ សូមជម្រាបជូនបងប្អូនជនរួមជាតិទាំងអស់ថា ឆ្នាំ២០១៣ ដែលនឹងមកដល់ក្នុងពេលឆាប់ខាងមុខនេះ គឺជាឆ្នាំប្រយុទ្ធប្រឆាំងនឹងអំពើពុករលួយមួយកម្រិតថែមទៀត។ ឆ្នាំថ្មីនេះ ពេញមួយខែមករា ជាការចាប់ផ្តើមប្រកាសទ្រព្យសម្បត្តិ និងបំណុលជាលើកទី២សម្រាប់មន្រ្តីជាប់កាតព្វកិច្ចប្រកាសទ្រព្យសម្បត្តិ និងបំណុលជិត៣ម៉ឺននាក់។ ឆ្នាំថ្មី២០១៣ នេះ ក៏ជាឆ្នាំប្រយុទ្ធប្រឆាំងនឹងការយកលុយខុសច្បាប់ដោយគ្មានការលើកលែងមិនថា ស្ថាប័នណា ឬមូលដ្ឋានណាឡើយ ។ យើងនឹងអប់រំបង្ការទប់ស្កាត់ និងបង្រ្កាបអំពើពុករលួយឲ្យបានសកម្មថែមទៀត ។
ការប្រកាសកណ្តាប់ដៃដែករបស់លោកឱម យ៉ិនទៀង ប្រធានអង្គភាពប្រឆាំងនឹងអំពើពុករលួយ បានធ្វើឡើងនៅក្នុងឱកាសដែលលោកអញ្ជើញចូលរួមប្រារព្វទិវាប្រឆាំងអំពើពុករលួយថ្នាក់ជាតិកាលពីថ្ងៃទី៩ ធ្នូ នៅស្ថានីយទូរទស្សន៍អាស៊ីអាគ្នេយ៍ ។ លោកបន្តថា រាជរដ្ឋាភិបាលអង្គភាពប្រឆាំងអំពើពុករលួយ ក៏ដូចជាប្រជាជនទូទាំងប្រទេសសង្ឃឹមជឿជាក់ថា ដោយស្មារតី ដោយឆន្ទៈ ដោយសកម្មភាពប្រឆាំងនឹងអំពើពុករលួយនេះហើយតាំងពីរូបភាពដំបូងជាការដាក់ពិន័យក្នុងបក្ស ការដាក់ពិន័យរដ្ឋបាល និងឈានមកដល់បច្ចុប្បន្ននេះជាការផ្តន្ទាទោសដាក់ពន្ធនាគារតាមច្បាប់ ។
លោកឱម យ៉ិនទៀង បញ្ជាក់ថា បញ្ហាទាំងអស់ខាងលើនេះហើយដែលបានរួមចំណែកជាមួយផ្នែកការពារជាតិ ផ្នែកសេដ្ឋកិច្ច ផ្នែកសង្គម ផ្នែករដ្ឋបាល ផ្នែកអន្តរជាតិ ក្នុងការធ្វើឲ្យប្រទេសកម្ពុជាស្ថិតស្ថេរ និងរីកចម្រើនពីមួយឆ្នាំទៅមួយឆ្នាំប្រកបដោយមោទនភាព ។ យើងនឹងបន្តប្រយុទ្ធប្រឆាំងអំពើពុករលួយទៅតាមមាគ៌ាតាមឆន្ទៈកម្ពុជាមួយថ្មី ដែលមានការអភិវឌ្ឍមិនឈប់ឈរប្រកបដោយចីរភាព ក្រោមបរិស្ថានស្អាតស្អំ យុត្តិធម៌ គ្មានអំពើពុករលួយដែលយើងទាំងអស់គ្នាចង់បាន ។
លោក ឱម យ៉ិនទៀង បានបន្ថែមថា យើងទាំងអស់គ្នាបានឃើញយ៉ាងច្បាស់ហើយថា «បើមានអំពើពុករលួយ ព្រះមហាក្សត្ររបស់យើងលោកព្រួយព្រះទ័យយ៉ាងខ្លាំង» ។ បើសិនមានអំពើពុករលួយសម្តេចតេជោហ៊ុន សែន របស់យើងលោកព្រួយបារម្ភជាខ្លាំង ។ ព្រះរាជកង្វល់ និងកង្វល់ទាំងនេះពិតជានៅជាប់នឹងចង្វាក់បេះដូងរបស់យើងហើយទូន្មានយើងគ្រប់ពេលវេលាឲ្យវៀរចាកឲ្យឆ្ងាយពីអំពើពុករលួយ និងនាំគ្នាធ្វើដំណើរនៅលើមាគ៌ាស្អាតស្អំរបស់ព្រះរាជាណាចក្រសម័យថ្មីក្រោមចង្កូតយុទ្ធសាស្រ្តចតុកោណនាំផ្លូវរបស់យើង ៕
ចែករំលែកព័តមាននេះ