រាជធានីភ្នំពេញ ៖ បន្ទាប់ពីទទួលបានព័ត៌មានពីភាពមិនប្រក្រតីចំពោះការដំឡើងតួនាទី និងឋានន្តរស័ក្តិរបស់មន្ត្រីនគរបាលមួយចំនួន សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យមានការត្រួតពិនិត្យម៉ត់ចត់បំផុតក្នុងការដំឡើងតួនាទី និងឋានន្តរស័ក្តិដល់មន្ត្រីនគរបាល ។
ការដាក់បទបញ្ជារបស់ប្រមុខដឹកនាំក្រសួងមហាផ្ទៃនេះ ដោយសារការត្រួតពិនិត្យ នាពេលកន្លងទៅ មានមន្ត្រីនគរបាលចំនួន២០០០នាក់ ក្នុងចំណោម៤០០០នាក់ ត្រូវបានដឹកនាំគេដោយមិនបានរៀនវគ្គជំនាញមូលដ្ឋាននៃវិជ្ជាជីវៈនគរបាលទាល់តែសោះ ។
ក្នុងពិធីប្រគល់រថយន្ត១៩គ្រឿងជូនដល់វរសេនាតូចនគរបាលការពារព្រំដែនដែលប្រចាំការនៅភូមិភាគទី១ ទី២ និងទី៣ នាថ្ងៃទី២៥ ខែមករា ឆ្នាំ២០២២ សម្តេច ស ខេង ក្រឡាហោម ស ខេងបានបញ្ជាឲ្យត្រួតពិនិត្យទៅលើមន្ត្រីដែលធ្វើការយូរឆ្នាំហើយ តែមិនបានឡើងស័ក្ត ខណៈមន្ត្រីខ្លះទើបចូលធ្វើការតែបានឡើងតួនាទី និងស័ក្តជាដើម ដោយសារតែមានសាច់សាលោហិត ជាអ្នកធ្វើការខ្សែធំ ។ សម្តេចក្រឡាហោមក៏បានលើកឡើងថា គ្រប់នគរបាលទាំងអស់ត្រូវតែធ្វើការឆ្លងកាត់វគ្គជំនាញមូលដ្ឋាន យ៉ាងហោចណាស់ឲ្យបាន៤ខែ ដោយមិនអនុញ្ញាតឲ្យដំឡើងតួនាទី និងឋានន្តរស័ក្តិដែលមិនបានធ្វើការរៀនសូត្រវគ្គមូលដ្ឋានឡើយ ។
សម្ដេចបានគូសបញ្ជាក់ថា ៖«តាមការត្រួតពិនិត្យនាពេលកន្លងទៅ មាននគរបាលខ្លះ ចាប់ពីអនុការិយាល័យឡើងទៅពុំបានទាន់ធ្វើការរៀនសូត្រមុខវិជ្ជានគរបាលមូលដ្ឋាននោះទេ ជាក់ស្តែងក្នុងចំណោម៤ពាន់មុខតំណែង គឺបានរកឃើញជាង២ពាន់តំណែង ដែលមិនបានឆ្លងវគ្គមូលដ្ឋាន ។ នេះហើយជាកំហុសឆ្គងដែលយើងចាំបាច់ត្រូវតែធ្វើការកែប្រែ ដោយបានរកឃើញបញ្ហានេះហើយយើងបានប្រជុំ ដើម្បីឯកភាពគ្នាដោះស្រាយរួចហើយនឹងធ្វើការណែនាំ នាពេលឆាប់ៗខាងមុខនេះ»។
សម្ដេចបានបន្ដថា មន្ត្រីនគរបាលខ្លះមានភ័ព្វវាសនាដោយក្នុងមួយឆ្នាំឡើងឋានន្តរស័ក្តមួយដង ខណៈមន្ត្រីខ្លះជាច្រើនឆ្នាំមកហើយពុំបានឡើងនឹងគេ ដូច្នេះហើយត្រូវនាំគ្នាពិនិត្យឲ្យបានច្បាស់លាស់ ដោយត្រូវបញ្ឈប់ការប្រើប្រាស់ មនោសចេតនា បងប្អូន មិត្តភក្តិ ដើម្បីតួនាទី និងឋានន្តរស័ក្តិ គប្បីក្រឡេកមើលមន្ត្រីណាដែលពួកគាត់ខិតខំធ្វើការងារល្អ ហើយត្រូវលើកទឹកចិត្ត និងលើកកម្ពស់តួនាទី និងឋានន្តរស័ក្តិដល់ពួកគាត់ ។
លើសពីនេះទៀត សម្ដេច ស ខេង បានបញ្ជាក់ថា គ្រប់មន្ត្រីនគរបាលដែលទើបតែជាប់ដោយការប្រឡងក្តីដោយការសម្ភាសន៍ក្តី ក្នុងករណីចាប់បាច់ណាមួយក្តីត្រូវតែទទួលបានការបណ្តុះបណ្តាល មុខវិជ្ជាជំនាញរបស់នគរបាលជាតិ ។
សម្តេចបន្ថែមថា កាលពីពេលកន្លងទៅការសិក្សារៀនសូត្រត្រូវមានរយៈពេល២ខែកន្លះ ហើយមកដល់ពេលនេះ តាមរយៈកិច្ចខិតខំប្រឹងប្រែងរបស់ក្រសួងមហាផ្ទៃ គឺបន្ថែមឲ្យមានរយៈពេល៤ខែក្នុងនោះក្រសួងគ្រោងបន្តពិនិត្យលទ្ធភាពលើផែនការរយៈពេលមធ្យមបង្កើនដល់៦ខែ ហើយផែនការរយៈពេលវែងអាចឈានទៅដល់៨ខែ ៕
ចែករំលែកព័តមាននេះ